Bible Society of South Africa
Izicwangciso zokufunda
To The Word – Bible Reading Challenge
To The Word – Day 103

To The Word – Day 103

Isaiah 44–47, Matthew 12–13

Itekisi yeBhayibhile

UISAYA 44

UNdikhoyo kuphela koThixo

1“Phulaphula, Yakobi sicaka sam,

wena Sirayeli endimnyulileyo,

2uthi *uNdikhoyo, umenzi wakho

owakubumba esizalweni,

yena owahlala ekunceda:

Ungabi naxhala, Yakobi sicaka sam;

ungumnyulwa wam endimthandayo.

3Ndowuphokozel' amanzi umhlaba onxaniweyo,

kuqukuqele imilambo enkangala,

inzala yakho ndiyithululele uMoya wam,

intsikelelo yam ifukame phezu kwayo.

4Iya kuhluma njengengca eludadeni,

njengemingcunube phezu komlambo.

5Uthile wothi: ‘NdingokaNdikhoyo;’

omnye azibandakanye nendlu kaYakobi;

wumbi agximfizwe ‘Ndikhoyo’ esandleni,

naye azibize ngokuba ngumSirayeli.”

6UNdikhoyo uKumkani kaSirayeli noMkhululi wakhe,

nditsho uSomandla-onke, uthi:

“Ndingowokuqala;

ndikwangowokugqibela;

akukho Thixo wumbi ngaphandle kwam.

7Kakade ngubani onjengam? Makavele!

Makakuvakalise kaloku okwênzekáyo

okoko ndamisela abantu bam mandulo.

Makazixele iziganeko ezizayo;

ewe, makazixele!

8Sanukuphakuzela, musan' ukuxhalaba;

kaloku ndatsho kwamandulo, unangoku ke.

Kambe nina ningamangqina am.

Ngaba kukho Thixo wumbi na?

Ngaba likho na elinye iXhadi?

Unotshe! Mna andizange ndilibone.”

Imifanekiso eqingqiweyo yimfeketho

9Akanto yanto umntu oqingqa *umfanekiso; naloo mfanekiso azidla ngawo yimfeketho. Abo bayithelelayo ziimfama; abaliqondi ihlazo labo. 10Kunceda ntoni ukuqingqa umfanekiso uwenze *uthixo? 11Wonke umntu owenza loo nto uhlazekile. Andithi na kaloku le mifanekiso iqingqwa ngabantu? Mabeze enkundleni kaloku, uya kubona bosuka barhwaqele – abakho lihlazo.

12Umkhandi uthatha ubhedu, alusebenze ngomlilo. Ngezo zigalo zakhe uthatha isando, alukhande elulungisa. Esasebenza njalo uyanxanwa, uyalamba, uyadinwa, yonke loo nto.

13Kanti ke umchweli uyawulinganisa umthi. Uzoba loo nto afuna ukuyenza ngetshokhwe; usebenzisa izixhobo zakhe ewukrola, aze ke akhuphe into efana nomntu (inzwana yomfo) ayithathe ayifake endlwini.

14Ehlathini phaya uthatha nawuphi na umthi; ingangumsedare, um-oki, okanye ipayini. Kanti usengatyala nawuphi na umthi, awulinde ukhuliswe yimvula. 15Inxalenye yomthi umntu uyayithatha abase enze umlilo, aze kwangaloo mthi enze umfanekiso awunqule. Ewe, wotha umlilo awubase ngomthi; aze kwalapho apheke isonka atye; kanti ngenxalenye yaloo mthi uza kwenza umfanekiso, awunqule esithi nguthixo. 16Kwangaloo mthi uyabasa, ose inyama, atye ade adikwe. Ewe, wotha umlilo ade ancome athi: “Kutsho kwamnandi; kufudumele.” 17Kanti ke oseleyo umthi uza kweza umfanekiso ngawo, ajike akhahlele kuwo. Uzibika kuwo athi: “Nceda undihlangule, thixo wam!”

18Abantu abanjalo ke zizititsi ezingayaziyo into eziyenzayo. Amehlo nengqondo yabo ivaleke mba; abayazi inyaniso. 19Umntu oqingqa umfanekiso aze awunqule uncitheke kangangokuba angabi nabuganga bakuthi: “Ikwangulo mthi lo ndiwubasayo ndipheke ngawo, ndize ngokunjalo ndose inyama ndiyitye. Ndingathini ukwenza kwangawo intw' enezothe, ndize ndikhahlele isikhuni somthi?”

20Ufana nomntu otya uthuthu. Ubhanxeke mpela; ngoku uyaphuphutheka, futhi akukho buyambo. Kaloku akavumi ukuba le nto ayiphetheyo ngamampunge.

UNdikhoyo nguMdali noMkhululi

21Utsho *uNdikhoyo ukuthi:

“Zikhumbule ezi zinto kaloku, Yakobi;

kaloku wena usisicaka sam, Sirayeli.

Ndakudalela ukuba ube sisicaka sam;

ndaye ke andisoze ndikulibale.

22Ukundivukela kwakho ndikuphuthisile;

isono sakho sithe shwaka okwenkungu.

Buyela kum; ndim umkhululi wakho.”

23Memelelani ngemihlali, mazulu;

mazidume kaloku neenzonzobila.

Ngqungqani nisine, nani zintaba,

ningqiyaze nani, mithi yamahlathi.

Kaloku uNdikhoyo uzibonakalisile;

ewe, ukukhulule, wena Yakobi;

utyhile amandla akhe ngawe, Sirayeli.

24UMkhululi wakho uNdikhoyo uyathetha;

yena owakubumbayo kwasesizalweni uthi:

“NdinguNdikhoyo uMenzi weento zonke;

ndim owawatwabululayo amazulu,

ikwandim owawolulayo umhlaba;

ewe, zange ndincedwe bani.

25Mna ndizitsho zibhanxeke izanuse,

ndidlale ngabo ke oosiyazi;

ubuciko bezilumko ndiyabutshitshisa,

butsho budule ubutyhakala bazo.

26Ndiyaluphumelelisa udaba lwezicaka zam,

ndizifezekise izihlabo zabathunywa bam.

IJerusalem ndithi isaza kumiwa,

iidolophu zakwaJuda zibuye zakhiwe,

kuvuke izixeko kuloo mabhodlo.

27Mna ndithetha ngezwi kuphela

neelwandle zitsho zome khonkqo.

28Ke kuKoreshi ndithi:

‘Nguwe oza kundalusela;

nguwe oza kufezekisa icebo lam.

Wena uya kuyalela uthi:

“Mayakhiwe iJerusalem.”

Malunga nendlu kaThixo uya kuthi:

“Mazimiswe iziseko zayo.” ’ ”

UISAYA 44XHO96Vula kumfundi weBhayibhile

UISAYA 45

Ukumiselwa kukaKoreshi

1Wenjenje *uNdikhoyo ukuthetha

nomthanjiswa wakhe uKoreshi,

amthe jize ngegunya namandla oloyiso jikelele,

khon' ukuze avuthulule ookumkani,

avulelwe zonke iingcango,

angathintelwa ngamasango esixeko:

2“Ndim ngokwam oya kukutshayelela;

iinduli neentaba ndosuka ndizilebele,

amasango enziwe ngobhedu ndiwakroboze,

nemivalo yentsimbi ndiyivuthulule.

3Ndokunika ubutyebi obunqatyisiweyo;

ewe, obugcinwe kwiindawo ezifihlakeleyo.

Uya kutsho uqonde ukuba ndinguNdikhoyo uThixo kaSirayeli;

ngenene ndim okubize ngegama.

4Ngenxa yesicaka sam uYakobi,

nditsho uSirayeli endimnyulileyo,

ndikubize ngegama,

ndakuthi jize ngesihomo nesithozela,

nangona wena ungandazi nje.

5“Ndim uNdikhoyo; akukho Thixo wumbi.

Ndiya kukuxhobisa utsho uqine

nangona wena ungandazi.

6Le nto ndoyenza ukuze baqonde bonke,

bazi emhlabeni wonke jikelele,

baqonde ukuba mna ndinguNdikhoyo,

bazi ukuba akukho Thixo wumbi.

7Ndikudalile ukukhanya,

kanti ke nobumnyama;

ivela kum impumelelo,

ngokunjalo neshwangusha;

ndim mna Ndikhoyo ozenzayo ezi zinto.

8Ndokuthobela ulungelelwano lune njengemvula,

ke wona umhlaba uya kulwamkela

kutsho kuthi qhakra inkululeko nobulungisa.

Ndim mna Ndikhoyo unobangela wezi zinto.”

NguNdikhoyo kuphela iNkosi

9Mawoo kulowo uphikisana noMenzi wakhe!

Imbiza nje yomdongwe ingathini ukusuka iphikisane nombumbi wayo?

Ungathini umdongwe ukuthi kumbumbi: “Wenza ntoni kodwa?”

Ingakhalaza na imbiza ithi: “Uliqhithala, mbumbindini”?

10Umntwana angamkhalazela na uyise nonina,

athi: “Nindizalele ntoni?”

11*UNdikhoyo, uThixo oYedwa kaSirayeli,

umdali wakhe, uthi:

“Ningathini na ukundithethisa ngekamva,

nindinkqangise ngabantwana bam,

nide nindixelele ngemfanelo yam?

12Ndim owalenzayo ihlabathi;

ndim owadala uluntu kulo;

ngezam izandla ndawatwabulula amazulu;

ndiyayilawula inyambalala yawo.

13Ngobulungisa bam ndim oxhokonxe uKoreshi;

ndoyityeneneza indlela ayihambayo.

Isixeko sam iJerusalem wobuya asivuse;

uza kubakhulula abantu bam abathinjiweyo.

Loo nto woyenza ngaphandle kwembuyekezo;

kaloku uthethile uNdikhoyo uSomandla-onke.”

14KuSirayeli utsho uNdikhoyo ukuthi:

“Ubutyebi beJiputa neKushe bobákhó,

iingxilimbela zaseSebha ngamakhoboka akho.

Zona ziza kulandela zikhonxiwe;

zokhahlela kuwe zivuma zisithi:

‘Nini kuphela abanoThixo;

akukho wumbi.’ ”

15Thixo kaSirayeli, uyabahlangula abantu bakho;

wena unguThixo ofihlakeleyo.

16Abaqingqi *bemifanekiso basehlazweni;

ngenene ke bona bonyoshoza bephoxekile.

17Ke yena uSirayeli wahlangulwa nguNdikhoyo;

olwakhe usindiso lohlala luhleli;

yena akasoze ahlazeke aphoxeke nanini nanini.

18UNdikhoyo nguye umdali wamazulu;

ngenene nguye oyena-yena Thixo.

Ihlabathi eli labunjwa nguye;

walenza waza walizinzisa.

Akalenzanga laba ngumqwebedu obharhileyo;

walenzela ukuze limiwe luluntu.

Yena ke uthi: “Ndim uNdikhoyo;

akukho Thixo wumbi.

19Ewe, mna andithethanga ekusitheleni,

nenjongo yam andizange ndiyifihle.

Mna andiyixhamlanga indlu kaYakobi,

ndingatshongo nokuba mayindifune enkqantosini.

NdinguNdikhoyo; mna ndiyayithetha inyaniso,

mna ndiyakuvakalisa oko kuqinisekileyo.

20“Qokelelanani, nonke zizwe;

nditsho nina, mingqandanda esindileyo.

Yizani kaloku nizokuxoxa,

bantundini bazizityhakala ezingazi nto,

nina batyethe imifanekiso yomthi,

nina banqula *oothixo abangento yanto.

21Yizani kuxoxa enkundleni;

mabathetha-thethane abamangalelwa.

Ngubani owayixela kwamandulo le nto?

Ngubani owayivakalisa ingekenzeki?

Asindim na Ndikhoyo?

NdinguThixo osindisayo, olilungisa;

ngaphandle kwam akukho Thixo.

22“Khangelani kum nisindiswe,

nina zizwe zehlabathi liphela.

Kaloku ndim uThixo, akukho wumbi.

23Ngenene ndiyafunga,

yaye esam isifungo sinyanisekile;

ewe, sona soze siguquke:

Zonk' iintlanga zokhahlela kum,

zifunge ukuba zondithobela.

24Zovuma zithi: ‘KukuNdikhoyo kuphela ukuzuzwa kosindiso namandla.’ ”

Ke bona abamthiyileyo bohlazeka.

25Kodwa ngenxa kaNdikhoyo yonk' inzala kaSirayeli yogwetyelwa

ize imdumise.

UISAYA 45XHO96Vula kumfundi weBhayibhile

UISAYA 46

Izithixo zeBhabheli

1“Namhlanje uBhele uthotyiwe; uNebho uwe bhaxa!

*Oothixo ebenikade nijikeleza nabo

namhlanje batyabula imiqolo yezilwanyana.

Ngenene baluxanduva lomthwalo.

2Nâzo izilwanyana zisiwa zivuka.

Akukho kusinda kuzo;

zithinjwa kunye nomthwalo wazo.

3“I-i-i-nzwi ke wena, ndlu kaYakobi!

Ndiphulaphuleni nina masalela endlu kaSirayeli,

nina endanixhasa kwasekukhawulweni kwenu,

ndaza ndanisingatha kwasekuzalweni kwenu.

4Noda niguge nibe ziingwevu

mna ndisengulowo unixhasayo.

Nenziwa ndim, ngoko ke ndonisingatha;

ewe, ndonigcina ndinihlangule.

5“Kodwa-kodwa ndolinganiswa nabani?

Ngubani na onjengam endinokufaniswa naye?

6Abantu bakhupha igolide engxoweni,

isiliva bayilinganisa esikalini,

basuke baqeshe ingcibi, ibenzele uthixo;

kamva ke basuka bee guqaqa bamnqule.

7Bambeka emagxeni, bamtyathe;

bambeke endaweni yakhe, eme bhuxe.

Kaloku yena lutiniko olungashukumiyo.

Udl' imu noba umntu uyazibika kuye;

akakwazi kuhlangula mntu ezingxakini.

8“Khumbulani le nto nizikise;

khaniyiguqu-guqule, nina bavukeli.

9Khanikhumbule iziganeko zamandulo,

nivume ukuba mna ndinguThixo;

ewe, akukho thixo ufana nam.

10Isiphelo ndasixela kwasekuqaleni;

kwamandulo ndazivakalisa izinto ezizayo.

Ndatsho ukuba icebo lam soze liwe,

koko ndokufezekisa oko ndikumisileyo.

11Mna ndibize umfo empumalanga;

sisitshu esiya kurhiwula njengokhetshe.

Yena woyifezekisa yonke injongo yam;

njengoko ndithethile kuya kuba njalo kanye.

12Phulaphulani, bantundini baneenkani,

nina banxaxhileyo elusindisweni.

13Umhla wosindiso wona ndiyawusondeza;

ngenene awukude kuya phi.

Ukusindisa kwam akuyi kulibazisa;

ewe, ndiza kuyihlangula iZiyon,

uSirayeli ndimzisele isidima nesithozela.”

UISAYA 46XHO96Vula kumfundi weBhayibhile

UISAYA 47

Ukuwa kweBhabheli

1*UNdikhoyo uthi:

“Yihla esihlalweni, ntombindini Bhabheli;

ewe, yiza nawe ukhe ugqush' eluthulini.

Wena wakhe wayinzwakazi yentombi;

oko kuguda nokuthamba ngoku kumkile.

2Thath' ilitye, usil' ingqolowa;

ewe kaloku, sikhulule isigqubuthelo;

finyeza kaloku, uwel' imilambo.

3Kaloku ngoku buza kudlula ubuze bakho;

awukho kukuphoxeka nalihlazo.

Kaloku mna ndiza kuziphindezela;

ibe ke andizi kuba nalusini konke.”

4UMkhululi wethu nguYedwa kaSirayeli;

igama lakhe nguNdikhoyo uSomandla-onke.

5UNdikhoyo uthi:

“Yithi cwaka, ntombindini Bhabheli, uhlale ebumnyameni.

Kaloku wena ngoku akusayi kuthiwa uyikumkanikazi yezizwe.

6Besendinomsindo ngakubantu bam;

ndide ndalishwabulela ilifa labo;

suka ndabayekela esandleni sakho.

Ke wena awubanga nanceba konke,

neengwevu usuke wagadalala nakuzo.

7Ubusithi wena woba sisimakade,

uhlale uhleli uyikumkanikazi.

Khange uzikhathaze nganto;

khange uzidube nangokujonga isiphelo.

8“Phulaphula ke, wena mthandi weziyolo;

nditsho wena uzicingela ukuba ukhuselekile,

nditsho wena uzilinganisa noThixo,

wena othi nguwe okhoyo, akukho wumbi.

Ubusithi wena soze ube mhlolokazi;

soze ulahlekelwe bantwana.

9Kodwa ngephanyazo nje – ngamini-nye –

ilahleko yabantwana kunye nobuhlolokazi

iza kukufikela nawe zikho ezo ngwebedla zakho,

ekho loo makhubalo akho namaqwili;

ewe, zofika ziphelelise.

10Ubusithi uza kukhuselwa yinkohlakalo;

usithi akukho bani ukubonayo.

Ubulumko bakho nolwazi bukulahlekisile;

usitsho nje ukuthi nguwe okhoyo, akukho wumbi.

11Ngoku wena uzelwa sisithwakumbe,

ibe nemilingo yakho ayinakuma ngaphambili.

Uza kuqutyulwa sisibetho ongenakusingxengxezela,

ufikelwe sisihelegu ongazange wasicinga.

12“Bambelela kuloo makhubalo nezo ziphondo,

njengoko kaloku walunyulelwa kuzo!

Hleze kuthi kanti zisenokunceda;

mhlawumbi ngazo ungazigrogrisa iintshaba.

13Namacebiso lawo akuqobile;

mabeze kaloku oosiyazi bakuhlangule,

nditsho abo bacalula iinkwenkwezi,

abo bazoba amazulu ngezigaba zawo,

abo baphicotha ubume benyanga nganye,

baze bambulule baxele izinto ezizayo.

14Bona baza kufana nemvuthuluka yengca,

kuze kuthi gqi umlilo ubatshise.

Sobe babe nako nokuzihlangula;

amadangatye onqanqaza batsho bathi shuu!

Kaloku lowo asinguwo umlilo wokothiwa.

15Usizo lwazo luphelel' apho ezo zazi zakho walunyulelwa kuzo.

Zonke zophephetheka ngeendlela zazo,

kube kungekho bani ungakuhlangulayo!”

UISAYA 47XHO96Vula kumfundi weBhayibhile

UMATEWU 12

Imfundiso kaYesu malunga noMhla wokuPhumla

(Marko 2:23-28; Luka 6:1-5)

1Ngelo xesha uYesu wacanda emasimini *ngoMhla wokuPhumla baza bathi abafundi bakhe belambile, bakha izikhwebu zengqolowa, batya. 2*AbaFarasi, bekubona oko, bathi kuye: “Khangela, abafundi bakho benza okungavumelekanga ngoMhla wokuPhumla.”

3Wathi kubo: “Anizange nikufunde na awakwenzayo uDavide mhla walamba yena neqela lakhe? 4Kaloku wangena endlwini kaThixo, wazitya izonka ezazinikelwe kuThixo. Kanti ngokomthetho ezi zonka yena neqela lakhe babengamelwe kuzitya. Ngababingeleli kuphela ababenelo lungelo. 5Khona, anifundanga na *emthethweni kaMosis okokuba ababingeleli bayawaphula umthetho woMhla wokuPhumla endlwini kaThixo, bangabi natyala noko? 6Ke ndithi kuni, lo ulapha mkhulu kunendlu. 7Ukuba benisazi okokuba ithetha ukuthini na le ndawo ithi *eziBhalweni: ‘Ndithanda inceba, andithandi mbingelelo,’ ngeningabagwebanga abangenatyala. 8Kaloku *uNyana woLuntu uyiNkosi yawo noMhla wokuPhumla.”

Ukuphiliswa kowome isandla

(Marko 3:1-6; Luka 6:6-11)

9Emkile apho uYesu, waya kungena *kwindlu yesikhungo. 10Apho babona umntu owome isandla. Abantu abathile, benenjongo yokummangalela uYesu, bambuza besithi: “Ngaba kuvumelekile na ukuphilisa *ngoMhla wokuPhumla?”

11Waza wathi kubo: “Ukuba ngaba kukho ubani kuni enegusha, yaza loo gusha yeyela emngxunyeni ngoMhla wokuPhumla, akayi kuyirhola na? 12Ubeke phi ke umntu ukuxabiseka kunegusha? Ngoko ke kulungile ukwenza inceba ngoMhla wokuPhumla.” 13Wathi ke kuloo mntu: “Solule isandla sakho.”

Wasolula, saza saphila isandla sakhe, safana nesinye. 14Baphuma ke abaFarasi, babhunga ukumbulala uYesu. 15Ekwazile oko, uYesu wemka apho.

Esona siCaka sikaThixo

UYesu walandelwa ngabantu abaninzi, waza wabaphilisa bonke, 16ebayala ukuba bangaxeleli bani ngaye, 17ukuze lizaliseke ilizwi likaThixo elathethwa *ngumshumayeli uIsaya lisithi:

18“Naso isiCaka sam endisinyulileyo,

eso sisenyongweni kum, endikholiweyo siso.

Ndosifaka uMoya wam,

sizazise isigwebo iintlanga.

19Asiyi kuba nephike sikhwaze,

lingayi kuviwa bani ezitalatweni izwi laso.

20Ingcongolo eyaphukileyo asiyi kuyiqhawula,

nesibane esilozizayo asiyi kusicima.

Siya kubuzinzisa bude bongame ubulungisa.

21Kananjalo iintlanga zokholosa ngaso.”

UYesu uyaphoxwa

(Marko 3:20-30; Luka 11:14-23)

22Kwathi kwaziswa kuYesu umntu ophethwe yindimoni, eyimfama, esisimumu. UYesu wamphilisa loo mntu, wathetha, wabona nokubona. 23Samangaliswa sonke isihlwele, sathi: “Akungebi nguNyana kaDavide lo?”

24Kodwa bona *abaFarasi, bakukuva oku, bathi: “Iindimoni ezi uzikhupha ngoSathana, umphathi weendimoni.”

25UYesu, ezazi iingcamango zabo, wathi kubo: “Bonke uburhulumente obuvukelana bodwa buyabhanga; nedolophu, nokuba ngumzi, ovukelana wodwa, awunakuba nankqubela. 26Ke ukuba uSathana ukhupha uSathana, evukelene kwayedwa nje, lothini na ukungawi ulawulo lwakhe? 27Ukuba iindimoni ndizikhupha ngoSathana, bazikhupha ngabani bona oonyana benu? Mabaphendule, nigwetywe ngabo. 28Ukuba ke ndizikhupha ngoMoya kaThixo iindimoni, ulawulo lukaThixo aluthwasanga, lugalelekile kuni.

29“Angathini umntu ukungena endlwini yegorha, ahluthe impahla yalo, engathanga kuqala alibophe igorha elo, aze ke andule ukuyiphanga indlu leyo.

30“Lowo ungekho kwicala lam, uchasene nam, nalowo ungandincedisiyo ukuqokelela, uyachitha. 31Ke ngoko, ndithi kuni, zonke izono nezinyeliso baya kuzixolelwa abantu, kodwa kona ukunyelisa uMoya oyiNgcwele akuyi kuxolelwa. 32Othe wathetha ilizwi elichasene naye *uNyana woLuntu uya kuxolelwa, kodwa othe wathetha elichasene noMoya oyiNgcwele akayi kuxolelwa kweli phakade nakwelizayo.”

Umthi neziqhamo zawo

(Luka 6:43-45)

33“Ukuba nithi umthi ulungile, mawuvelise iziqhamo ezilungileyo; ukuba ke nithi ngumthi ombi, mawuvelise iziqhamo ezibi. Kaloku umthi uqondwa ngeziqhamo zawo. 34Nzalandini yamarhamba, ningáthini na ukuba nako ukuthetha okulungileyo, nikhohlakele nje? Kaloku umlomo womntu uphuphuma oko intliziyo izele kuko. 35Umntu olungileyo uvelisa ukulunga okukuye. Ke okhohlakeleyo uvelisa inkohlakalo ekuye.

36“Ke, ndithi kuni, ngomhla womgwebo abantu baya kuziphendulela ngelizwi ngalinye eliphuthileyo abathe balithetha. 37Umntu uya kugwetywa, okanye akhululwe, ngokwamazwi akhe.”

Umqondiso kaJona

(Marko 8:11-12; Luka 11:29-32)

38Abathile kubachazi-mthetho *nabaFarasi bathi kuYesu: “Mfundisi, sicela ukuba usibonise umqondiso.”

39Wabaphendula wathi kubo: “Sisizukulwana esikhohlakeleyo, esikrexezayo ngokunganyaniseki kuThixo, esifuna umqondiso; kanti asiyi kunikwa mqondiso, ingenguwo umqondiso kaJona; 40kuba njengokuba uJona wayemihla mithathu nabusuku buthathu esiswini sesilo esikhulu solwandle, wothi naye *uNyana woLuntu abe mihla mithathu nabusuku buthathu emathunjini omhlaba. 41Ngomhla womgwebo abantu baseNiniva bophakama babamangalele abantu besi sizukulwana, kuba bona bâguquka ngentshumayelo kaJona, kanti ke omkhulu kunoJona nanku phakathi kwenu. 42Ngomhla womgwebo ukumkanikazi wasezantsi wophakama abamangalele abantu besi sizukulwana, kuba wavela eziphelweni zomhlaba, esiza kuva ubulumko bukaSolomon, kanti ke omkhulu kunoSolomon nanku phakathi kwenu.”

Ukubuya kwendimoni

(Luka 11:24-26)

43“Xa indimoni ithe yaphuma emntwini, icanda ezinkqantosini, ifuna indawo yokuphumla; ize yakuba ingayifumani, 44isuke ithi: ‘Ndiya kubuyela endlwini yam endaphuma kuyo.’ Ithi yakufika, iyifumane izé, itshayelwe, ilungisiwe; 45ize ke ijike iye kuphuthuma ezinye iindimoni ezisixhenxe ezikhohlakeleyo kunayo, zingene ke zihlale khona; ize imeko yamva yaloo mntu ibe mbi kuneyakuqala. Kuya kuba njalo nakwesi sizukulwana singendawo.”

Ezona zizalwana zikaYesu

(Marko 3:31-35; Luka 8:19-21)

46Kwathi uYesu esathetha nesihlwele, kwafika abantakwabo nonina, bema phandle, befuna ukuthetha naye. 47Kwaza kwakho othi kuye: “Nanku unyoko nabantakwenu phandle, befuna ukuthetha nawe.”

48Waphendula wathi kulowo wayesitsho: “Ngubani umama? Ngoobani bona abantakwethu?” 49Esalatha abafundi bakhe ngesandla, wathi: “Nanku umama, naba abantakwethu. 50Kaloku lowo uyenzayo intando kaBawo osezulwini nguye ongumntakwethu, nodade wethu, nomama.”

UMATEWU 12XHO96Vula kumfundi weBhayibhile

UMATEWU 13

Umzekeliso ngomhlwayeli

(Marko 4:1-9; Luka 8:4-8)

1Kwangaloo mini uYesu waphuma endlwini, waya kuhlala ngaselwandle. Sahlanganisana ngakuye isihlwele, 2saba sikhulu kangangokuba yena waya kukhwela esikhitshaneni, wahlala kuso. Isihlwele sona sema elunxwemeni.

3UYesu ke wasifundisa isihlwele izinto ezininzi ngemizekeliso, esithi: “Kwakukho umhlwayeli owaphuma waya kuhlwayela. 4Ekuhlwayeleni kwakhe inxenye yembewu yawa endleleni, zeza iintaka zayichola zayigqiba. 5Enye imbewu yawa endaweni elulwalwa, apho ibingenamhlaba waneleyo; yantshula ke kwangoko, ngenxa yokungabi nabunzulu bamhlaba. 6Kuthe ke, lakuba shushu ilanga, yatsha, yathi ngenxa yokuba ingenazingcambu zendeleyo, yoma kwaphela. 7Enye yawa endaweni enokhula, olwathi lwakukhula lwayiminxa. 8Enye yawa kumhlaba olungileyo, yavelisa isiqhamo: enye yanika ikhulu, enye amashumi amathandathu, nenye amashumi amathathu. 9Oneendlebe zokuva makeve.”

Injongo yemizekeliso

(Marko 4:10-12; Luka 8:9-10)

10Beza kuYesu abafundi bakhe, bathi kuye: “Kutheni na ukuba uthethe nabo ngemizekeliso?”

11Waphendula wathi: “Kungenxa yokuba nina nikunikiwe ukuzazi iimfihlelo ezingolawulo lukaThixo, kodwa bona abakunikwanga. 12Lowo unako uya kunikwa, abe nako nangaphezulu; kodwa lowo ungenako uya kuhluthwa kwanoko anako. 13Ngenxa yoko ndithetha nabo ngemizekeliso. Kaloku bebona nje, ababoni; besiva nje abeva, bengaqondi nakuqonda. 14Kwenzeka kubo njengoko *umshumayeli uIsaya walithethayo ilizwi likaThixo esithi:

“ ‘Nàkuphulaphula niphulaphule, ningaqondi noko;

nàkujonga nijonge, ningaboni nto.

15Kuba ingqiqo yaba bantu ibuthuntu,

bazivingcile iindlebe zabo, bawavala namehlo abo.

Kungenjalo babeya kubona,

beve ngeendlebe zabo, baqonde ngeengqondo zabo,

baze babuyele kum, ndize ndibaphilise.’

16“Kodwa nina ninoyolo, kuba ninamehlo abonayo, kwaneendlebe ezivayo. 17Ke ndithi kuni, inene, baninzi *abashumayeli nabantu abangamalungisa ababenqwenela ukuzibona izinto enizibonayo, àbazibona, nokuziva izinto enizivayo, àbaziva.”

Ingcaciso yomzekeliso ngomhlwayeli

(Marko 4:13-20; Luka 8:11-15)

18“Nina ke, yiveni ingcaciso yomzekeliso ngomhlwayeli. 19Ukuba ubani uthi azive iindaba ezingolawulo lukaThixo, angàziqondi, uyeza ongendawo akuhluthe oko kwakuhlwayelwe entliziyweni yakhe. Yiyo leyo imbewu ehlwayelwe endleleni. 20Imbewu eyahlwayelwa elulwalweni ifanekisa lowo uzivayo iindaba ezi, athi kwangoko azamkele ngovuyo. 21Onjalo akanazingcambu zendeleyo; uma okomzuzwana kuphela, athi kwakufika imbandezelo okanye intshutshiso ngenxa yeendaba ezi, oyisakale kwangoko. 22Eyahlwayelwa endaweni enokhula izekelisa lowo uzivayo iindaba ezi, aze ke amaxhala eli phakade, nokulukuhla kobutyebi, kuziminxe iindaba, kungabikho siqhamo. 23Eyahlwayelwa emhlabeni olungileyo ifanekisa lowo uzivayo aziqonde iindaba ezi, aze avelise isiqhamo, omnye ikhulu, omnye amashumi amathandathu, nomye amashumi amathathu.”

Umzekeliso ngokhula

24Wabenzela nomnye umzekeliso uYesu, esithi: “Ukulawula kukaThixo kunokufaniswa, nomntu owahlwayela imbewu elungileyo entsimini yakhe. 25Kwathi ke, xa baleleyo abantu, kwafika utshaba lwakhe, lwahlwayela ukhula phakathi kwengqolowa, lwemka. 26Yakudubula ke ingqolowa, iqala ukuba neenkozo, lwabonakala ukhula. 27Zaza izicaka zaya kumnini-mzi, zathi kuye: ‘Nkosi, ibingeyombewu ilungileyo na oyihlwayeleyo entsimini yakho? Ngaba luvela phi na ke ukhula?’ 28Wathi kuzo: ‘Le nto yenziwe lutshaba.’ Zaza izicaka zathi kuye: ‘Ngaba ufuna siye kuluncothula na ukhula?’ 29Kodwa yena wathi: ‘Hayi, hleze kuthi xa nincothula ukhula, nincothule kwanengqolowa. 30Luyekeni ukhula, lukhule kunye nengqolowa, kude kube lixesha lokuvuna. Xa kuvunwayo ke, ndothi kubavuni: “Kuqala qokelelani ukhula, nilubophe izithungu, nilutshise, nize ke ingqolowa niyiqokelelele esiseleni sam.” ’ ”

Umzekeliso ngokhozo lwembewu yemostade

(Marko 4:30-32; Luka 13:18-19)

31Wabenzela nomnye umzekeliso uYesu, esithi: “Ukulawula kukaThixo kunokufaniswa nokhozo lwembewu yemostade, athe ubani waluthatha, waluhlwayela entsimini yakhe. 32Ukhozo lwemostade lolona luncinane kunazo zonke iintlobo zembewu, kanti lwakukhula luba lukhulu kunayo yonke imifuno, lube ngumthi omkhulu kangangokuba neentaka zifike, zakhele emasebeni awo.”

Umzekeliso ngegwele

(Luka 13:20-21)

33UYesu wabenzela nomnye umzekeliso, esithi: “Ukulawula kukaThixo kunokufaniswa negwele awalithathayo umfazi, walixovulela kumgubo ozizitya ezithathu, laza layinyusa intlama.”

UYesu uyazekelisa

(Marko 4:33-34)

34Zonke ezi zinto uYesu wazithetha kwizihlwele ngemizekeliso. Akathethanga nto kuzo kungengamizekeliso. 35Ngokwenjenjalo wakuzalisekisa okwathethwayo *ngumshumayeli esithi:

“Ndiya kuthetha ngemizekeliso,

ndizityhile izinto ezazifihlakele kwasekusekweni kwehlabathi.”

Ingcaciso yomzekeliso ngokhula

36Wazindulula ke izihlwele uYesu, wangena endlwini. Beza kuye abafundi bakhe, bathi: “Khawusicacisele umzekeliso ngokhula olusentsimini.”

37Waphendula wathi: “Lowo uhlwayela imbewu elungileyo *nguNyana woLuntu. 38Intsimi le lihlabathi. Yona imbewu elungileyo ngabantu abalawulwa nguThixo. Ke lona ukhula ngabantu bongendawo. 39Utshaba oluluhlwayelayo ngumtyholi. Ukuvuna kukupheliswa kweli phakade. Abavuni zizithunywa zezulu. 40Njengoko luqokelelwayo ukhula, lutshiswe, koba njalo ekuphelisweni kweli phakade. 41UNyana woLuntu wozithuma izithunywa zakhe, zibaqokelele bangabikho apho alawula khona bonke abalahlekisayo, nabo bonke abenza okuchasene nomthetho, 42zibaphose kwiziko elivutha umlilo, apho kuya kubakho ukulila nokungcungcutheka. 43Bothi ke abangamalungisa baqaqambe ngokwelanga bekwikomkhulu likaYise. Oneendlebe zokuva makeve.”

Umzekeliso ngobutyebi obufihlwe entsimini

44“Ukulawula kukaThixo kunokufaniswa nobutyebi obufihlwe entsimini, waza ubani wabubhaqa, wabugqumelela kwakhona, wathi, evuya kakhulu, waya kuthengisa konke anako, wayithenga loo ntsimi.”

Umzekeliso ngeperile exabisekileyo

45“Kananjalo ukulawula kukaThixo kunokufaniswa nomrhwebi ohamba efuna *iiperile ezintle, 46othi akubhaqa perile ithile ixabisekileyo, aye kuthengisa konke anako, ayithenge loo perile.”

Umzekeliso ngomnatha

47“Kananjalo ukulawula kukaThixo kunokufaniswa nomnatha owaphoswa elwandle, wabambisa iintlobo ngeentlobo zeentlanzi; 48ekuthe, wakuzala, watsalelwa elunxwemeni, kwahlalwa phantsi, ezilungileyo zaqokelelwa esityeni, ezimbi zalahlwa. 49Kuya kuba njalo ekuphelisweni kweli phakade. Zophuma izithunywa zezulu, zibakhethe abakhohlakeleyo kwabalungileyo, 50zibaphose kwiziko elivutha umlilo, apho kuya kubakho ukulila nokungcungcutheka.”

Okutsha nokudala

51UYesu wathi: “Ngaba nikuqondile na konke oku?”

Baphendula bathi: “Ewe.”

52Waza wathi kubo: “Ke ngoko, umchazi-mthetho ngamnye othe waba ngumfundi wezolawulo lukaThixo, ufana nomninimzi onokukhupha izinto ezintsha kwanezindala kuvimba wakhe.”

Ukudelwa kukaYesu eNazarete

(Marko 6:1-6; Luka 4:16-30)

53Kwathi, uYesu akugqiba ukuyenza le mizekeliso, wemka apho. 54Efikile kowabo, wafundisa endlwini yesikhungo. Bâmangaliseka kakhulu abo bamváyo, besithi: “Ngaba ubufumene phi na obu bulumko? Le mimangaliso yona? 55Akanguye na unyana womchweli? Unina akanguye na uMariya? Abantakwabo asingabo na ooYakobi, noYose, noSimon, noJuda? 56Noodade wabo àbahlali apha bonke na? Ngaba lo mntu uzifumene phi zonke ezi zinto?” 57Ngenxa yale nto ke bambukula.

Waza uYesu wathi kubo: “Kakade umshumayeli uyayinikwa imbeko; kukwelakowabo kuphela, ekhayeni lakhe, apho angayifumani khona.” 58Ngenxa yokungakholwa kwabo akenzanga mimangaliso mininzi apho.

UMATEWU 13XHO96Vula kumfundi weBhayibhile
Bible Society of South Africav.4.26.9
SIFUMANE KU-