To The Word – Day 1

₁Hay' inyhweba yabantu abamsulwa;

nditsho abo baziphatha ngokwemiyalelo *kaNdikhoyo.

₂Banoyolo abo bayithobelayo imfundiso kaNdikhoyo,

abayilulamelayo ngomxhelo wabo wonke,

₃abantu abangabenziyo ububi,

koko abahamba endleleni kaNdikhoyo.

₄Kaloku wena, Ndikhoyo, wasinika imimiselo yakho,

ukuze siyithobele ngenyameko.

₅Akwaba bendingachul' ukunyathela,

ndiyinonophele imithetho yakho.

₆Ukuba ndizibambile iziyalo zakho,

andisoze ndibhaqwe lihlazo.

₇Ndakusazi isigwebo sakho esingenagobe,

ndiya kukuncoma ngenene nangenyaniso.

₈Mna ndiya kuyithobela imithetho yakho;

awu, nceda ungandilahli kuphele.

₉Lungaziphatha kanjani ulutsha ukuze ihambo yalo ibe nyulu?

Ngokuthobela ilizwi lakho.

₁₀Ndizimisele ukukulandela ngokupheleleyo;

ndincede ndingaze ndizidele iziyalo zakho.

₁₁Ndihamba ngokomlomo wakho,

khon' ukuze ndingoni.

₁₂Awu! Bayethe, *Mhlekazi!

Khawundifundise imithetho yakho.

₁₃Mna ndiya kuzibhengeza zonke izigqibo zakho.

₁₄Kum ziluyolo izithethe zakho;

zingaphezu kwabo bonke ubutyebi.

₁₅Ndiya kucamngca ngemimiselo yakho,

ndizinyamekele iindlela zakho.

₁₆Ndiyayithakazelela imithetho yakho;

soze ndilityeshele ilizwi lakho.

₁₇Ndazelele, mna sicaka sakho,

ukuze ndibudle ubomi, ndilithobele ilizwi lakho.

₁₈Nceda undivule amehlo,

ndiziqonde iintsonkotha ezisemyalelweni wakho.

₁₉Ndilundwendwe apha emhlabeni;

ndicacisele imiqathango yakho.

₂₀Umoya wam uhlala wonganyelwe

kukulangazelela isigwebo sakho.

₂₁Wena uyabakhalimela abaziphakamisayo;

baseshweni abanxaxhayo kwiziyalo zakho.

₂₂Ndihlambe kwizinyeliso nezigculelo,

kuba ndiyayithobela imfundiso yakho.

₂₃Nokuba zingade zindibhunge iziphathamandla,

mna sicaka sakho ndiya kucamngca ngemithetho yakho.

₂₄Kambe ke andiziva ngezithethe zakho,

kuba ziyintonga yam yasekhosi.

₂₅Awu, ndiphelelwe, ndiyimvuthuluka;

ndihlaziye ngokwesithembiso sakho.

₂₆Undivile ndakuzandlala;

nceda undifundise imithetho yakho.

₂₇Ndifundise amasolotya emimiselo yakho,

khon' ukuze ndicamngce ngemimangaliso yakho.

₂₈Iinzingo ziwuvikivile umoya wam;

khawundomeleze ngokwelizwi lakho.

₂₉Ndihlangule kuyo inkohliso;

ewe, ndibabale undifundise imiyalelo yakho.

₃₀Ndenze isigqibo sokuba ndinyaniseke;

ndizimisele ukusithobela isigwebo sakho.

₃₁Ndinamathele kwizithethe zakho, *Ndikhoyo,

ngoko ke mandingaphoxeki.

₃₂Ndiya kuhamba ngokwemiqathango yakho,

kuba wena uyivulile ingqiqo yam.

₃₃Awu, *Ndikhoyo, ndifundise imithetho yakho,

ukuze ndihlale ndiyithobela maxa onke.

₃₄Ndivule ingqondo, ndiwuthobele umyalelo wakho;

ndiya kuwulandela ngomxhelo wam wonke.

₃₅Ndikhokele ngeziyalo zakho,

kuba zona ziligugu lam.

₃₆Intliziyo yam mayinxanele imfundiso yakho

ndaweni yokusukelana nenzuzo yobuqhophololo.

₃₇Ndincede ndingalibali zizinto eziphuthileyo;

mandiphile ngokwenza ukuthanda kwakho.

₃₈Idinga lakho malifezekiswe kum, mna sicaka sakho;

kaloku lelâbo bakuthobelayo.

₃₉Ndihlangule ezenyelisweni, kuba ndiyazoyika;

ke zona izigqibo zakho zifezekile.

₄₀Ewe, andiziva ngemimiselo yakho;

ndihlaziye ngobulungisa bakho.

₄₁*Ndikhoyo, ndibonise ububele bakho;

mandiluxhamle usindiso ngokwesithembiso sakho.

₄₂Ndiya kuba nako ke ukujongana nabandenyelisayo,

kuba ndikholosa ngelizwi lakho.

₄₃Ndincede ndiyithethe inyaniso,

kuba ithemba lam zizigqibo zakho.

₄₄Ndohlala ndiwuthobela umyalelo wakho;

ewe, kude kube ngunaphakade.

₄₅Mna ndiya kuxhamla inkululeko,

kuba ndihamba ngemimiselo yakho.

₄₆Izithethe zakho ndozivakalisa nakwizinxiba-mxhaka,

kuba kaloku mna andinadyudyu,

₄₇kuba iqhayiya lam ziziyalo zakho –

andizithandi ngako, ndiphupha ngazo!

₄₈Ndiyayihlonela imiqathango yakho,

nditsho leyo ndiyithandayo;

ewe, ndicamngca ngemithetho yakho.

₄₉Ungalilibali idinga lakho kwisicaka sakho.

Andithi kaloku wandithembisa!

₅₀Nasebunzimeni ndiyathuthuzeleka,

kuba isithembiso sakho siyandihlaziya.

₅₁Abangakhathalele Thixo baphoxisa ngam;

kambe ke mna andihexi emyalelweni wakho.

₅₂Ndakukhumbula izimiso zakho zantlandlolo,

nditsho ndithuthuzeleke, *Ndikhoyo.

₅₃Ndikhathazeka gqitha ndakubona abanxaxhayo,

abo bangawukhathalelanga umyalelo wakho.

₅₄Imithetho yakho yingoma yam;

ndimemelela ngayo xa ndikwelasemzini.

₅₅Ndicinga ngawe noba ndilele, *Ndikhoyo;

ewe, ndiyayithobela imiyalelo yakho.

₅₆Ngenene mna andinakumbi,

koko ndithobela imimiselo yakho.

₅₇Ndathi ke mna: Isabelo sam nguwe, *Ndikhoyo;

ndiya kulithobela ilizwi lakho.

₅₈Awu, velana nam, ndiyakubongoza;

ndibabale ngokwesithembiso sakho.

₅₉Ndiyiqondile indlela endiziphethe ngayo;

ngoko ke ndibuyela kwizithethe zakho.

₆₀Sendingxamile, andisayi kulibazisa;

ndozithobela iziyalo zakho.

₆₁Noba bangandirhintyela abakhohlakeleyo,

soze ndiwulibale umyalelo wakho.

₆₂Nasezinzulwini zobusuku ndiyavuka;

ewe, ndivuka ndikudumise ngenxa yokusulungeka kwesigwebo sakho.

₆₃Amaqabane am ngabakuthobelayo,

abahamba ngemimiselo yakho.

₆₄Ihlabathi liphuphuma izibele zakho, Ndikhoyo;

nceda undifundise imithetho yakho.

₆₅*Ndikhoyo, usazelelele isicaka sakho;

wenze ngokwesithembiso sakho.

₆₆Ndithi jize ngobulumko nokuqonda,

kuba mna ndikholosa ngemiqathango yakho.

₆₇Phambi kokuba undohlwaye ndandibhadula,

kodwa ngoku ndiyalithobela ilizwi lakho.

₆₈Hay' ukulunga kwakho, uyindlezane!

Khawundifundise imithetho yakho.

₆₉Izikhohlakali zindityabeka ngobuxoki,

kodwa mna ndithobela imimiselo yakho ngomxhelo wam wonke.

₇₀Zona zingamagumasholo angachukumisekiyo;

ke mna ndithakazelela umyalelo wakho.

₇₁Ewe, tshotsh' undohlwaye, Ndikhoyo,

ukuze ndiyifunde imithetho yakho.

₇₂Umyalelo wakho kum ubhetele kunobutyebi,

nditsho nkqu nekhipha legolide nesiliva.

₇₃Ndinje nje nje ndidalwe nguwe;

ndifundise ndiziqonde iziyalo zakho.

₇₄Abakuthobelayo bovuya bakundibona,

kuba mna ndikholosa ngamadinga akho.

₇₅Ndiyakuvuma ukufaneleka kwesigwebo sakho;

ewe, *Ndikhoyo, undohlwaye ngakhona.

₇₆Ndithuthuzele ngezibele zakho,

njengoko wasithembisayo isicaka sakho.

₇₇Velana nam, ukuze ndiphile,

kuba iqhayiya lam ngumyalelo wakho.

₇₈Zona izibhoja mazihlazeke,

kuba zindirhintyela ngobuqili;

ke mna ndocamngca ngemimiselo yakho.

₇₉Mabeze kum bonke abakuthobelayo,

abo bayiqondayo imfundiso yakho.

₈₀Mandingabi nabala kwimithetho yakho,

khon' ukuze ndingahlazeki.

₈₁*Ndikhoyo, kuncamekile kum, ndisindise!

Ithemba lam lilizwi lakho.

₈₂Amehlo amnyama kukujong' enkalweni;

yaz'ba uya kundithuthuzela nini na?

₈₃Andinto yanto, ndigqole oku kwentsuba yewayini esemsini;

kambe ke andiyilibalanga imithetho yakho.

₈₄Koda kube nini sinyamezele isicaka sakho?

Ngani ungabohlwayi nje abanditshutshisayo?

₈₅Abanekratshi bayandithiyela,

abo bangawuthobeliyo umyalelo wakho.

₈₆Imiqathango yakho ithembekile;

nceda, nâbo bendibhijela ngobuxoki.

₈₇Sebephantse bandicim' igama,

kanti ke unotshe ukuba ndiyilahle imimiselo yakho.

₈₈Ngenxa yezibele zakho ndihlaziye,

ukuze ndihambe ngokwezithethe zakho.

₈₉*Ndikhoyo, ilizwi lakho sisimakade;

lithe zinzi emazulwini.

₉₀Wena uya kuhlala uthembekile;

ihlabathi walenza, soze lashukuma.

₉₁Izigqibo zakho zohlala zihleli;

iinto zonke zikhahlela kuwe.

₉₂Ukuba bendingawulangazeleli umyalelo wakho

ngezindibulele iimbandezelo.

₉₃Soze ndiyityeshele imimiselo yakho,

kuba ndibufumana kuyo ubomi.

₉₄Mna ndingowakho, ndisindise,

kuba ndiyayilandela imimiselo yakho.

₉₅Abakhohlakeleyo bafuna ukunditshabalalisa;

ke mna ndiyayetyisa imfundiso yakho.

₉₆Ndiyaqonda ukuba ayikho into efezekileyo;

ke yona imiqathango yakho ayinantanga ngemfezeko.

₉₇Ndiyawuthanda kambe umyalelo wakho;

ndiphicothana nawo imini yonke.

₉₈Iziyalo zakho zendele kum;

zindenza ndilumke kuneentshaba zam.

₉₉Ndibavelele nabafundisayo,

kuba ndizinonelele iimfundiso zakho.

₁₀₀Ngokuqonda nditshatshele nakwabadala,

kuba ndiyazithobela izithethe zakho.

₁₀₁Ndiyazicezela iindlela ezinengozi,

kuba ndithobela ilizwi lakho.

₁₀₂Andiphambuki kwisigwebo sakho,

njengoko wandifundisayo.

₁₀₃Izithembiso zakho zimnandi, ziyanandipheka;

ewe, ziyolile kunobusi.

₁₀₄Imfundiso yakho indivul' ingqondo,

ngoko ke ndibuthiyil' ubugwenxa.

₁₀₅Ilizwi lakho sisibane sendlela yam;

liyandikhanyisela eluhambeni.

₁₀₆Ndizibophelele ngesifungo;

ndiya kusithobela isigwebo sakho.

₁₀₇*Ndikhoyo, ndixhwaleke ngokungathethekiyo;

ndihlaziye ngokwedinga lakho.

₁₀₈Ndikhoyo, wamkele umbulelo wam,

undazise izigqibo zakho.

₁₀₉Ubomi bam buhlala busesichengeni,

kodwa andishenxi kumyalelo wakho.

₁₁₀Abakhohlakeleyo bayandithiyela,

kodwa andiphambuki kwimimiselo yakho.

₁₁₁Imfundiso yakho lilifa lam nanini na;

ewe, iluyolo entliziyweni.

₁₁₂Ndizimisel' ukuyenza imithetho yakho;

ewe, ndoyithobela kude kube sekupheleni.

₁₁₃Ndibathiyile abantu abambaxa,

kodwa ndiyawuthanda umyalelo wakho.

₁₁₄Wena ulikhaka nekhusi lam;

ndiqamele ngelizwi lakho.

₁₁₅Khanindiyeke, nina bantu bangcolileyo,

ndithobele imiqathango yoThixo wam.

₁₁₆Ndixhase ngokwesithembiso sakho,

khon' ukuze ndibudle ubomi;

mandingadani kukufadalala kwethemba lam.

₁₁₇Ndomeleze, khon' ukuze ndisinde,

ndihlale ndinonelele imithetho yakho.

₁₁₈Wena ubachasile abanxaxhayo emithethweni yakho;

kona ukundweba kwabo ngamampunge.

₁₁₉Wena izikhohlakali uzishenxisa njengenkunkuma;

ngoko ke ndiyazithanda izithethe zakho.

₁₂₀Ke mna ndiziva ndikoyika;

sona isigwebo sakho siyandirhwaqelisa.

₁₂₁Ndizithobele izimiso zakho, andinabala;

sukundiyekela ngabo banditshutshisayo.

₁₂₂Ndivelele undilungiselele, mna sicaka sakho;

mandingaxhatshazwa zizijama-nkungwini.

₁₂₃Amehlo am selenikezela, ejonge ukusindiswa,

nditsho ukufezekiswa kwesithembiso sakho.

₁₂₄Ndazelelele ngokokuphuphuma kwezibele zakho,

undifundise imithetho yakho.

₁₂₅Ndingowakho, ndiphe ukuqonda,

ukuze ndizazi izithethe zakho.

₁₂₆Ngoku ke kungawe, *Ndikhoyo;

abantu bawunyathele umyalelo wakho.

₁₂₇Iziyalo zakho ndiyazithanda

ngaphezu kwayo negolide yodidi;

₁₂₈kungoko ndiyilandela imimiselo yakho;

ke kona ukunxaxha ndikuthiyile.

₁₂₉Imfundiso yakho ibalulekile;

ndoyithobela ngomxhelo wam wonke.

₁₃₀Lithi lakuchazwa ilizwi lakho kutsho kuthi qwenge;

abangazi nto libanika ukuqonda.

₁₃₁Ndisuka ndikhefuze ndithe nkebe,

kuba ndiyazilangazelela iziyalo zakho.

₁₃₂Khawuze kum undibabale,

kakade wenjenjalo kwabakuthandayo.

₁₃₃Khawundisekele ngokwesithembiso sakho,

ungandiyekeli ndonganyelwe bububi.

₁₃₄Ndikhulule kwingcinezelo yabantu,

ukuze ndiyenze imimiselo yakho.

₁₃₅Ndivelele undazelelele,

undifundise imithetho yakho.

₁₃₆Ngenxa yabantu abangawuthobeliyo umthetho wakho

zitsho ziphalale iinyembezi kum.

₁₃₇Hayi kambe ukulunga kwakho, *Ndikhoyo!

Ewe, isigwebo sakho asinagobe.

₁₃₈Usinika imfundiso enobulungisa;

ewe, inolungelelwano, ithe ngqo.

₁₃₉Ikhwele lindongamele ngenxa yeentshaba

ezingalikhathalelanga ilizwi lakho.

₁₄₀Izithembiso zakho zivavanyiwe zagqwesa;

ke mna ndizixabise gqitha.

₁₄₁Nakuba ndidelekile, ndingazelwa nto,

andishenxi kwimimiselo yakho.

₁₄₂Ubulungisa bakho bohlala buhleli,

nomyalelo wakho wohlala uthembekile.

₁₄₃Ndiphahlwe ziinzima neenkathazo,

kodwa ke mna andiziva ngeziyalo zakho.

₁₄₄Imfundiso yakho iya kuhlala ifezekile;

ndiphe ukuqonda, ukuze ndiphile.

₁₄₅Yo-o-o! Khawundivelele, *Mhlekazi!

Ke yona imithetho yakho ndiya kuyithobela.

₁₄₆Ndizibika kuwe, ndikhulule;

imfundiso yakho ndoyithobela.

₁₄₇Ndikhala kuwe kusathi qheke ukusa;

kaloku ndikholosa ngezwi lakho.

₁₄₈Ndivuk' ezinzulwini zobusuku;

ndicamngca ngezithembiso zakho.

₁₄₉Ngenxa yezibele zakho, *Ndikhoyo, sabela,

undihlaziye ngokwesigqibo sakho.

₁₅₀Abandenzela amayelenqe bayasondela,

bona abayikhathalelanga imiyalelo yakho.

₁₅₁Kanti ke wena ukufutshane nam, Ndikhoyo,

neziyalo zakho zithembekile.

₁₅₂Kwantlandlolo ndizifundile izithethe zakho;

zaye ke zona zisisimakade.

₁₅₃Velana nam, kuba ndibandezelekile, undisindise,

kuba andishenxi emyalelweni wakho.

₁₅₄Zabalaza undihlangule;

ndihlaziye ngokwesithembiso sakho.

₁₅₅Kwizikhohlakali usindiso luthe qelele,

kuba aziyikhathalele imithetho yakho.

₁₅₆Ke wena, *Ndikhoyo, unguSozinceba;

ndihlaziye ngokwesigqibo sakho.

₁₅₇Zininzi iintshaba nabandibandezelayo,

kodwa andishenxi kwimfundiso yakho.

₁₅₈Ndiyakhamnqa ndakubona abangcatshi;

kaloku bona abalise so idinga lakho.

₁₅₉Ndiyayithanda kambe imimiselo yakho, Ndikhoyo;

ngokwezibele zakho ndazelele ebomini.

₁₆₀Oyena ndoqo wodaba lwakho yinyaniso;

xa zizonke izigqibo zakho soze zithini.

₁₆₁Iziphathamandla ziyanditshutshisa ngaphandle kwesizathu;

ke mna ndiyalihlonipha ilizwi lakho.

₁₆₂Izithembiso zakho ziyandonwabisa;

nditsho ndifane nomntu oxhaphaza isisulu.

₁₆₃Ndibuthiyil' ubutshijolo, bunezothe kum;

kanti ke umyalelo wakho ndiyawuthanda.

₁₆₄Lide liye kutshona ndikubulela

ngenxa yokulunga kwezigqibo zakho.

₁₆₅Abathobela umyalelo wakho bahlala banelisekile;

kaloku akukho nto ingabaphazamisayo.

₁₆₆Ndikhoyo, ndijonge kuwe, ndisindise;

kaloku ndizithobele iziyalo zakho.

₁₆₇Imfundiso yakho ndiyilandela ngomoya wam wonke;

kaloku andizenzi, ndiyayithanda.

₁₆₈Ndiyayithobela imimiselo nezithethe zakho,

kambe ke wena wazi konke ngam.

₁₆₉Ndiyatarhuzisa; ndive, *Nkosi;

ndivul' ingqondo ngokwesithembiso sakho.

₁₇₀Ndiyakubongoza, ndiphulaphule;

ndihlangule njengoko wathembisayo.

₁₇₁Ndiya kusoloko ndikuncoma, ndikubonga,

kuba uyandifundisa imithetho yakho.

₁₇₂Ingoma yam ngamadinga akho;

kaloku iziyalo zakho zilungile.

₁₇₃Hlala ulungele ukundinceda;

kaloku ndizikhethele imimiselo yakho.

₁₇₄Wowu! Ndiyakulangazelela ukusindiswa!

*Ndikhoyo, andiziva ngemithetho yakho!

₁₇₅Ndiphe ubomi, ukuze ndikudumise;

isigqibo sakho masindixhase.

₁₇₆Ndibhadula njengegusha elahlekileyo.

Awu, phuthuma usifune isicaka sakho,

kuba andiyilibali imiqathango yakho!