Intuthuzelo evela kwiLizwi – Day 41

₁Thixo, ndiyakhala;

nceda undiphulaphule.

₂Ndibhenela kuwe ndisekudeni;

ndisuke ndanengevane.

Nceda undikhokele,

undise entabeni ephakamileyo.

₃Kaloku wena uyinqaba yam;

uyandikhusela ezintshabeni.

₄Ndiya kuhlala kwakho njalo-njalo,

ndithi ncwaba phantsi kwaloo maphiko.

₅Kaloku, wena Thixo, uzivile izithembiso zam;

undinike ilifa labakuhloniphayo.

₁Awu, khawundihlangule, Thixo!

Ndithe gabhu ngentamo emanzini.

₂Ndiyazika eludakeni olubizelayo,

apho kungekho nokuxhathisa.

Ndithe dyumpu esizibeni;

umsinga uyandintywilisela.

₃Sendikhale zada zoma,

kungokunje ndom' umqala;

amehlo afiphele kukujong' enkalweni,

ndilangazelela wena, Thixo wam.

₄Abo bandithiyileyo ngaphandle kwesizathu

bagqitha inani leenwele zentloko yam.

Zizigantsontso ezifuna ukunditshabalalisa,

ezindihlasela ngokundityhola.

Ndingathini ukuhlawula ndingebanga nje?

₅Ke wena, Thixo wam, uyasazi isono sam;

amatyala am' aselubala kuwe.

₆Awu, *Ndikhoyo, Thixo onamandla onke,

mandingabahlazisi abo bakholosa ngawe;

abakulangazelelayo mabangangcikivwa

ngenxa yam, Thixo kaSirayeli.

₇Kaloku kungenxa yakho ndinyeliswa nje;

ngoku sendintywil' ehlazweni.

₈Sendaba yintlanga kumawethu;

ndingumhambi kwiinto zikabawo.

₉Ke kona ukuzondelela indlu yakho kundongamele;

izithuko zabakunyelisayo ziphezu kwam.

₁₀Ndalila ezimathontsi, ndizila ukutya,

kodwa naleyo yaba sisingcikivo.

₁₁Ndithi ndakunxiba ezirhwexayo zokuzila

ndisuke ndibe ngundaba-mlonyeni.

₁₂Bancokola ngam ezimbuthweni;

sendide ndayingoma yamanxila.

₁₃Kambe ke, Ndikhoyo, mna ndiyakuthandaza.

Ngeli xesha lifanelekileyo, Thixo,

nangenxa yendyebo yezibele zothando lwakho,

khawuncede undiphendule.

Ngenxa yokuthembeka kwakho ndihlangule;

naku sendizika eludakeni.

₁₄Ndisindise ezintshabeni zam;

ndikhuphe emanzini anzongonzongo.

₁₅Ewe, mandingantywiliselwa ngumsinga;

mandingarhaxwa kwisiziba esimnyama;

mandingaginywa yinzonzobila.

₁₆Hayi ubuhle bezibele zakho!

Ndikhoyo, ndivelele undiphendule;

ewe, ngokobuninzi beenceba zakho ndive!

₁₇Musa ukusifulathela isicaka sakho.

Ndibandezelekile; nceda undiphendule.

₁₈Sondela undisindise;

ndikhulule ezintshabeni zam.

₁₉Uyayazi indlela endingcikivwa ngayo;

uyazi ukuba andinto yanto, ndihlazekile;

uyazazi zonke iintshaba zam.

₂₀Izinyeliso ziwaphule umoya wam;

kungokunje ndivikivekile.

Ndathemba ukukhuzwa, kodwa nya!

Nokuthuthuzelwa andakufumana.

₂₁Ndaweni yokutya ndanikwa ityhefu;

endaweni yamanzi yaba yiviniga.

₂₂Mabenzakaliswe kwakukutya kwabo,

amatheko abo abe ngumgibe kubo.

₂₃Mabamfanyekiswe bangaboni;

umzimba wabo mawutyhutyhwe lidumbe.

₂₄Mabagutyungelwe yingqumbo yakho;

mabatshiswe ngumsindo wakho.

₂₅Mawube linxuwa umzi wabo,

makungahlali nabani kuwo,

₂₆kuba bayamtshutshisa ombethileyo,

baphoxise ngaye omenzakalisileyo.

₂₇Bancine ngesona sohlwayo;

mabaphoswe yinceba yakho.

₂₈Mabacinywe kwincwadi yoludwe lwabaphilayo,

mabangadweliswa namalungisa.

₂₉Kambe ke ndiyajwaqeka yintlungu;

ndonyule undisindise, Thixo.

₃₀Ndiya kumemelela ndibonge uThixo;

ndiya kumncoma ndidomboze.

₃₁Lo ke wona umbulelo ubalasele;

ungaphezulu kokubulela ngethole kuNdikhoyo,

uyidlula lee inkunzi yenkomo.

₃₂Ke bona abahlelelekileyo baya kuvuya;

abamlangazelelayo uThixo bokhuthazeka.

₃₃Kaloku uNdikhoyo uyabeva abahlelelekileyo;

akabacekisi abakhe ababanjiweyo.

₃₄Dandulukani, mazulu nani hlabathi, nimbonge,

nani zilwandle nako konke okushukumayo kuni!

₃₅Kuba uThixo uya kuyisindisa iZiyon,

aphinde azakhe izixeko zakwaJuda.

Izicaka zakhe ziya kuba ngabemi bakhona,

₃₆izizukulwana zona zidle ilifa,

bathi nabamthandayo bahlale khona.

₁Ndiyakhwaza, ndibhekisa kuThixo;

ndikhala kuye, ukuba andiphulaphule.

₂Ngomhla wenkathazo ndibhenela eNkosini;

ebusuku ndiyazingisa, ndiziphakamisela kuyo izandla,

umoya wam ungavumi ukuthuthuzeleka.

₃Ndakucinga ngoThixo, ndiba nesingqala;

ndakucamngca, uyatyhafa umoya wam.

₄Andisabazi nobuthongo;

ndixakwe nakukuthetha ziinkathazo.

₅Hay' imihla yamfamlibe;

ndikhumbul' iminyaka yamandulo.

₆Ebusuku ndidliwa ngumva-ndedwa;

ndiyacamngca ndiyicikida intliziyo yam, ndisithi:

₇“Ngaba yondilahla kuphele iNkosi,

ingaze ibuye indamkele?

₈Ngaba lutshitshile na uthando lwayo?

Sibhangile na isithembiso sayo?

₉Selekulibele na uThixo ukubuya ngetarhu?

Ngaba umsindo wakhe uluvalile uvelwano?”

₁₀Ndide ndithi: “Nantsi eyona indixhelayo:

kukunqamka kwamandla kaPhezukonke.

₁₁Ndikhumbula izenzo zakho, *Ndikhoyo;

ewe, ndicinga ngemimangaliso yamandulo.

₁₂Ndicamngca ngemisebenzi yakho;

ndetyisa izenzo zakho ezikhwankqisayo.”

₁₃Hayi ke beth' ubunyulu bukaThixo!

Thixo wuphi ofana noThixo wethu?

₁₄Wena unguThixo owenza imimangaliso;

amandla akho abonakele phakathi kwabantu;

₁₅Wabakhulula ngamandla akho abantu;

ewe, nditsho oonyana bakaYakobi nabakaJosefu.

₁₆Uthi wakuvela wena, Thixo, arhwaqel' amanzi,

nenzongonzongo yolwandle ingcangcazele.

₁₇Amafu wona atsho avuz' amanzi,

isibhakabhaka sona sagragrama,

imibane yona yaphithizela.

₁₈Izithonga zeendudumo zazihamba nezaqhwithi,

imibane yalikhanyisa lonke ihlabathi,

umhlaba wangcangcazela wanyikima.

₁₉Wena wadabul' ulwandle,

wacand' amanzi anzongonzongo.

Ke wona umkhondo wakho awufumaneki.

₂₀Wabakhokela njengomhlambi abantu bakho

ngesandla sikaMosis noAron.

₁Khawusabele, *Ndikhoyo, undilungiselele;

kaloku mna ndiyimpula kalujaca.

₂Ndikhusele kaloku, kuba ndiyakuthobela;

sihlangule isicaka esikholosa ngawe.

₃UnguThixo wam, ndibabale, Nkosi.

Kaloku mna ndihlala ndikhala kuwe.

₄Ewe, khawusonwabise isicaka sakho.

Nkosi, ndiwunyusela kuwe umthandazo wam.

₅Kuba wena, Nkosi, ulungile, uyaxolela;

uphuphuma luthando kwabo bakholosa ngawe.

₆Ndikhoyo, wuve umthandazo wam;

khawundivele, ndiyakubongoza.

₇Ndakuba sengxakini, ndibhenela kuwe,

kuba wena uyavelana nam.

₈Nkosi, kubo bonke *oothixo akakho onjengawe,

engekho nonemisebenzi enjengeyakho.

₉Zonke izizwe owazidalayo

ziya kukhahlela kuwe, Nkosi,

zibonga zibabaza igama lakho.

₁₀Kuba wena uyingangalala, uyamangalisa;

ewe, nguwe wedwa uThixo.

₁₁Khawundifundise iindlela zakho, Ndikhoyo,

khon' ukuze ndinamathele enyanisweni.

Ewe, ndifundise ukukuhlonela, Nkosi;

ndikunqule ndingankwalambisi.

₁₂Ndikubulela ngomxhelo wam wonke, Nkosi;

Thixo wam, ndolidumisa njalo igama lakho,

₁₃kuba ziyandimangalisa izibele zakho;

undihlangule enzonzobileni yengcwaba.

₁₄Awu, Thixo, zindivukele izibhoja.

Ewe, izikrelemnqa ziyandizingela;

zona azikukhathalele nganto.

₁₅Kambe ke wena, Nkosi,

unguThixo onenceba nesisa.

Wena ucaphuka kade,

uphuphuma uthando nokunyaniseka.

₁₆Buya uvelane nam;

khawusomeleze isicaka sakho,

umhlangule unyana wesicakazana sakho.

₁₇Ndinike umqondiso wokundazelelela kwakho,

ukuze abandithiyileyo babone badane,

kuba wena, Ndikhoyo, undincedile wandithuthuzela.