Intuthuzelo evela kwiLizwi – Day 34

₁Yini na, *Ndikhoyo? Wachasela?

Kutheni? Wazifihla ngexesha longxunguphalo?

₄Libathe lwale ikratshi abantw' abagwenxa;

bade bazikhohlise ngokuthi: “Akukho Thixo ngandawo!”

₅Zinempumelelo zonk' iinzame zabo,

kodwa imiyalelo yakho ikude lee kubo.

Bayazeya zonke iintshaba zabo.

₁₂Lamla, Ndikhoyo; caca ukuba unguThixo!

Sukubalibal' abantw' abahlelelekileyo!

₁₄Ewe, wena uzijongile wazibona iintlupheko neentsizi,

khon' ukuze ulungele ukusisiza.

Ewe, zibalekela kuwe nazo iindwayi,

wena ongumncedi weenkedama.

₁₆Ngukumkani uNdikhoyo kuya kude kube nini-nini.

Zobhanga ziphele nya emhlabeni iintshaba zakhe.

₁₇Ndikhoyo, uyaziva izicelo zabantw' abathobekileyo;

uyabavuselela, uziphendule izicelo zabo.

₁Ngenene uThixo umphethe kakuhle uSirayeli;

ulungile kwabantliziyo zinyulu.

₂Kodwa ke mna suka ndathandabuza,

ewe, gcwizi ndityibilike,

₃kuba ndinekhwele ngabaqhayisayo,

kukubona inkqubela yabakhohlakeleyo.

₁₆Ndizamile ukuyiphonononga le nyewe,

kodwa suka yayinkinge kum.

₁₇Ndide ke ndabhenela engcweleni kaThixo,

ndacacelwa ke sisiphelo sabo.

₂₃Kambe ke ndisoloko ndikuwe;

undithe chu ngesandla.

₂₄Ewe, wena uyandithundeza;

kamva ke wondamkelela ewongeni.

₂₅Ndikholosa ngawe usemazulwini;

ungowam nje ke, andilinanze nganto ihlabathi.

₂₈Kum ke kuluyolo ukuba kufuphi kuwe, Thixo.

Nkosi yam *Ndikhoyo, ndikhuselwa nguwe,

ukuze ndibalise ngemisebenzi yakho.