Intuthuzelo evela kwiLizwi – Day 21

₉Ndenzele inceba, Ndikhoyo, ndibandezelekile.

Atsho adumba kukulila amehlo am,

nam ndiphelile kukudinwa.

₁₀Ziyandaluphaza iinkxwaleko zam,

nemihla yam iphelela ekungcungcuthekeni.

Ndiphelelwe ngamandla ngenxa yeentlupheko,

namathambo am selegugile.

₁₁Ndiyintlekisa kwiintshaba zam,

isigculelo kubamelwane bam.

Abandaziyo bayandoyika, bandibaleke,

xa badibana nam esitalatweni.

₁₂Sele ndalityalwa mpela;

ndinjengomfi ongasakhunjulwayo;

sendalahlwa kwesinomhlwa.

₂₂Ukothuka kwam ndathi ndilahlelwe kude nawe,

kodwa wandiva ndakuzibika kuwe.

₅Zitsho zabhidla izilonda zam,

kuthi phuu ngenxa yobudenge bam.

₆Ndibandezelekile, ndiphelile,

kangangokude ndizile imini yonke.

₇Ndiyapena-pena ziintlungu;

andinampilo konke.

₈Ndoyisakele kwaphela;

ndiyagcuma ziintlungu nalixhala.

₉Nkosi yam, uyawazi umnqweno wam,

uyaziva zonke iincwina zam.

₁₀Ndinovalo, ndiphelelwe ngamandla,

namehlo am selebona kaluzizi.

₂₁Zungandifulatheli, Ndikhoyo;

Thixo wam, mus' ukuchasela kum.

₂₂Khawuleza undincede, Nkosi, Msindisi wam!

₁Njengenxala elikhothekileyo kukunxanwa

nam ndikwanjalo ukukulangazelela wena, Thixo.

₂Ewe, intliziyo yam iyakulangazelela, Thixo,

nditsho wena Thixo ophilayo.

Yaz'ba koda kube nini na

ukuze ndide ndibe nonxibelelwano nawe, Thixo?

₃Imini nobusuku ndiyinyhididi kukugixa.

Ke zona izibhoxi zasoloko zindiphoxa zisithi:

“Ude abe phi na lo Thixo wakho?”

₄Kambe ke ndithi ndakukhumbula mandulo

ijijitheke intliziyo yam.

Kaloku fudula ndiwukhokela loo mngcelele

uya endlwini kaThixo.

Ewe, sasingumkhosi wochulumacho

sonwabile, simemelela sidumisa.

₅Hee! Ngani ukuba ndidakumbe kangaka?

Ngani ukuba ndikhathazeke kangaka?

Hayi bo! Mandikholose ngoThixo,

khon' ukuze ndibuyele ekumdumiseni uMsindisi noThixo wam.

₁Ndathi: “Ndiya kuzilumkela iindlela zam,

ndingoni ngokuthetha,

ndilubambe ulwimi lwam xa ndiphakathi kwamatshijolo.”

₂Ndathi cwaka, andathetha nto.

Ukuthula kwam akuncedanga nto,

kodwa noko yona inkxwaleko yathath' unyawo.

₃Ndavalwa luvalo ndisacamanga,

ndavukwa ngumva-ndedwa,

ndavakala ndibuza ndisithi:

₄“*Ndikhoyo, ndazise isiphelo sobomi bam

nenani lemihla yokuphila kwam.

Ewe, ndazise ubufutshane bobomi bam.

₅Kaloku imihla yam uyicuthe kakhulu;

àyinto konke kuwe imihla yobomi bam;

umntu ufana nomphunga nje kuwe.

₆Uhla enyuke njengesithunzi silandelelana nomntu;

ubila esoma nje ngenxa yelize;

uqweba indyebo engazi nokuba yoba yekabani na.

₇“Xa kunjalo ke, Nkosi, mna ndikholose ngantoni?

Elam ithemba likuwe.

₈Ndikhulule kuzo zonke izono zam,

ndingade ndihlekwe nazizidenge.

₉Ndiya kuthi cwaka, ndingathethi,

kuba nguwe ondifake kule meko.

₁₀Mus' ukuba sandohlwaya;

mus' ukundinkula ndide ndenzakale.

₁₁Ngokumohlwaya umntu, umbonisa isono.

Uyidlavula njengenundu loo nto ayithandayo.

Ewe, kambe, umntu ufana nomphunga nje kuwe.

₁₂“Ndikhoyo, wubazel' iindlebe umthandazo wam;

ndive, ndakuzibika kuwe.

Ungàthi cwaka xa ndikhala kuwe,

kuba ndiselugcinweni lwakho,

nam ndisisibhadu-bhadu njengookhokho.

₁₃Khawundenzele umnyinyivana, khe ndiphefumle,

ngoku ndingekemki kweli hlabathi.”

₁Njengenxala elikhothekileyo kukunxanwa

nam ndikwanjalo ukukulangazelela wena, Thixo.

₂Ewe, intliziyo yam iyakulangazelela, Thixo,

nditsho wena Thixo ophilayo.

Yaz'ba koda kube nini na

ukuze ndide ndibe nonxibelelwano nawe, Thixo?

₃Imini nobusuku ndiyinyhididi kukugixa.

Ke zona izibhoxi zasoloko zindiphoxa zisithi:

“Ude abe phi na lo Thixo wakho?”

₄Kambe ke ndithi ndakukhumbula mandulo

ijijitheke intliziyo yam.

Kaloku fudula ndiwukhokela loo mngcelele

uya endlwini kaThixo.

Ewe, sasingumkhosi wochulumacho

sonwabile, simemelela sidumisa.

₅Hee! Ngani ukuba ndidakumbe kangaka?

Ngani ukuba ndikhathazeke kangaka?

Hayi bo! Mandikholose ngoThixo,

khon' ukuze ndibuyele ekumdumiseni uMsindisi noThixo wam.

₆Ke kaloku ndinomva-ndedwa,

ngoku ke ndikhumbula wena, kobu bugxwayiba ndikubo,

kwezi ntili zeJordan, ngakwiintaba zeHermon, neenduli zaseMiza.

₇Iziziba ezinzongo-nzongo ziyamemezana

ngokukrotsha kweengxangxasi zakho.

Amaza eze ngendlu yawo,

ngokunjalo kwaneempuphuma.

Ewe, ziwugubungele umphefumlo wam.

₈Kambe ke, ngeny' imini, *Ndikhoyo,

luya kubalasela uthando lwakho.

Ndiya kuphikelela ndikudumise ebusuku,

ndithandaze kuThixo endixhomekeke kuye.

₉Ndiyakhala kuwe, mqolomba wam, Thixo:

“Ngani ukuba undilibale?

Ngani ukuba ndihlale ndizibambe ngeenkophe

ngenxa yokubandezelwa ziintshaba?”

₁₀Ewe, sendixushekile zizenyeliso zabo.

Kaloku basoloko bendigcolodela besithi:

“Ude abe phi na lo Thixo wakho?”

₁₁Hee! Ngani ukuba ndidakumbe kangaka?

Ngani ukuba ndikhathazeke kangaka?

Hayi bo! Mandikholose ngoThixo,

khon' ukuze ndibuyele ekumdumiseni uMsindisi noThixo wam.

₁Ngamana wandigwebela, Thixo.

Ewe, mandiphume phambili

ekumangalelweni ngabantu abakuchasileyo.

Ndihlangule kubantu abanamaqhinga nobuqhokolo.

₂Kaloku ùnguThixo endizimela ngaye.

Ngani ke ukuba undilahle?

Ngani ukuba ndihlale ndizibambe ngeenkophe

ngenxa yokubandezelwa ziintshaba?

₃Mandikhanyiselwe nguwe,

ndikhokelwe yinyaniso yakho.

Mazindise entabeni yakho engcwele,

endlwini elikhaya lakho.

₄Ke mna mandingene *esibingelelweni sakho,

wena Thixo ongumonwabisi wam.

Ndiya kubeth' intambula ndintyiloze

ndidumise wena, Thixo – Thixo wam!

₅Hee! Ngani ukuba ndidakumbe kangaka?

Ngani ukuba ndikhathazeke kangaka?

Hayi bo! Mandikholose ngoThixo,

khon' ukuze ndibuyele ekumdumiseni uMsindisi noThixo wam.

₁Ndincede uwubekele iindlebe umthandazo wam, Thixo.

Ndibhenela kuwe; sukundifulathela.

_2-3Sabela, undiphendule.

Kaloku iinkathazo zindongamele.

Ngenxa yezisongelo zeentshaba zam ndididekile;

ingcinezelo yabangendawo indixinile.

Bafumba inkxwaleko phezu kwam;

futhi bandingcikiva ngolunya.

₄Ndiyajijitheka ngaphakathi;

izoyikiso zokufa zindivingcele.

₅Andoyiki ndiyagubha!

Ukunkwantya kuyandirhwaqelisa.

₆Ndide ndithi: “Akwaba bendinamaphiko njengehobe!

Bendiya kuntinga ndiye kuphumla kude lee.

₇Ewe, bendiya kubethwa ngumoya,

ndihlale entlango.

₈Ndandiya kukhawuleza ndizifunele umqolomba,

ndiyizimele kuyo imimoya ebhudlayo.”