Intuthuzelo evela kwiLizwi – Day 18

₁Thixo wam, Thixo wam, undishiyeleni na?

Kudala ndizigixa, ndicel' uncedo,

kodwa andikalufumani unangoku!

₂Thixo wam, emini ndikhalela kuwe, kodwa akundiva.

Nasebusuku ndiyakhala,

ndingafumani kuphumla phezu koko.

₄Babekholose ngawe ookhokho bethu;

babekuthembile, wabahlangula wena.

₅Bakhala kuwe, wabakhulula wena;

babethembele ngawe, akwabadanisa.

₂₄Kaloku akazideli engazicekisi iintsizi zehlwempu;

uyaziva izicelo zalo, angalifulatheli.”

₁Awu, khawundihlangule, Thixo!

Ndithe gabhu ngentamo emanzini.

₂Ndiyazika eludakeni olubizelayo,

apho kungekho nokuxhathisa.

Ndithe dyumpu esizibeni;

umsinga uyandintywilisela.

₃Sendikhale zada zoma,

kungokunje ndom' umqala;

amehlo afiphele kukujong' enkalweni,

ndilangazelela wena, Thixo wam.

₂₉Kambe ke ndiyajwaqeka yintlungu;

ndonyule undisindise, Thixo.

₃₀Ndiya kumemelela ndibonge uThixo;

ndiya kumncoma ndidomboze.

₃₁Lo ke wona umbulelo ubalasele;

ungaphezulu kokubulela ngethole kuNdikhoyo,

uyidlula lee inkunzi yenkomo.

₃₂Ke bona abahlelelekileyo baya kuvuya;

abamlangazelelayo uThixo bokhuthazeka.

₃₃Kaloku uNdikhoyo uyabeva abahlelelekileyo;

akabacekisi abakhe ababanjiweyo.

₉Ndenzele inceba, Ndikhoyo, ndibandezelekile.

Atsho adumba kukulila amehlo am,

nam ndiphelile kukudinwa.

₁₀Ziyandaluphaza iinkxwaleko zam,

nemihla yam iphelela ekungcungcuthekeni.

Ndiphelelwe ngamandla ngenxa yeentlupheko,

namathambo am selegugile.

₁₁Ndiyintlekisa kwiintshaba zam,

isigculelo kubamelwane bam.

Abandaziyo bayandoyika, bandibaleke,

xa badibana nam esitalatweni.

₁₂Sele ndalityalwa mpela;

ndinjengomfi ongasakhunjulwayo;

sendalahlwa kwesinomhlwa.

₁₃Ewe, ndiyivile intlebendwane yabanye;

kuthe saa luloyiko macal' onke,

lo gama bandenzela amayelenqe, beceba ukundibulala.

₁*Ndikhoyo, ndiyazibika kuwe;

ndikhala kuwe ndibindekile.

₂Awu, Nkosi, ndive ndiyakuthandaza,

usiphulaphule isikhungo sam.

₃Ukuba ubuzigcina izono zabantu, Ndikhoyo,

ngubani obengasindayo?

₄Kambe ke wena uyaxolela,

khon' ukuze uhlonitshwe.

₅Ndithembele ngokupheleleyo kuNdikhoyo;

ewe, ndikholosa ngelizwi lakhe.

₆Umoya wam ukholosa ngoNdikhoyo ngenzondelelo,

ngaphezu komlindi ojonge ukusa,

nangaphezu komantshingilane ojong' umsobomvu.

₇Sirayeli, thembela kuNdikhoyo, kuba yena unobubele,

futhi yena ukhulula ngokupheleleyo.

₈Ewe, yena uya kumkhulula uSirayeli

kuzo zonke izono zakhe.