44 – Isiseko sobulumko kukuthobela uNdikhoyo

₂Ezi zafobe ziluncedo:

umntu ziyamqeqesha, zimnike ubulumko,

abe nokuziqonda neentetho ukuba ngaba zezengqondo na.

₃Ewe, zimenza aqeqesheke, akwazi ukuziphatha,

abe ngumntu owenza okulungileyo, nothe ngqo engenagobe.

₄Ongekabi namava zimenza abe krele-krele,

nomfana atsho akwazi ukwenza izigqibo ngobulumko.

₅Isilumko siyeva, sivune ulwazi;

kanti nengcaphephe itsho ifumane amacebo aphilileyo,

₆khon' ukuze ikwazi ukuqonda izaci nezafobe,

nditsho amazwi ezilumko nokuntsonkotha kwawo.

₇Isiseko sobulumko kukuthobela *uNdikhoyo,

kambe ke zona izityhakala zibujongele phantsi ubulumko nengqeqesho.

₈Mfo wam, yithobele ingqeqesho kayihlo,

ungazityesheli neziluleko zikanyoko.

₉Zona ziya kuyiphuhlisa ihambo yakho,

oku kwentsimbi ehombisa intloko,

nditsho oku kwamaso anika intamo umfaneleko.

₁₀Nyana wam, sukuvuma

xa uwexulwa ngoongantweni.

₁₁Mhlawumbi bangathi: “Yiza silalele umntu ongenatyala,

ukuze simhlasele simbulale engacingele nto.”

₁₂Basenokuthi: “Yiza, siza kumcim' igama njengosengcwabeni,

abe ngathi uginywe lelabafileyo,

₁₃size ke thina sizithathele konke okunexabiso,

izindlu zethu zitsho zizale ngamaxhoba.

₁₄Hayi, mfondini, yiza, uzibandakanye nathi;

yoba nye ingxowa yethu sonke.”

₁₅Nyana wam, zikhwebule kwiindlela zabo,

ulubuyise nonyawo lwakho kuzo.

₁₆Kaloku iinyawo zabo aziva ntambo ukuleqeka esonweni;

bayakhawuleza ukuphalaza igazi.

₁₇Nakuba kungancedi nto nje ukuthiyela intaka

xa isibona isabatha eso,

₁₈kodwa bona balalela elabo igazi;

ewe, bazonda owabo umphefumlo.

₁₉Sinjalo ke isiphelo sazo zonke izikrelemnqa:

ophila ngobugebenga ufa kwangobugebenga.

₂₀Ke bona ubulumko bumemeza nasezitalatweni;

kanti ke bude bukhwaze nasezindaweni zembutho.

₂₁Izwi labo aligqunyelelwa nayingxolo yasezitalatweni;

ewe, buvakala nasemasangweni ezixeko:

₂₂“Ziyathandini, koda kube nini nithe nca ebudengeni?

Yaz'ba koda kube nini na abagculeli bekuvuyela ukuphoxisa?

Koda kube nini izityhakala ziluthiyile ulwazi?

₂₃Kambe ke xa beninokukugqala ukukhalima kwam,

bendinganiphokozela umoya wobulumko,

ndabelane nani ngolwazi lwam.

₂₄Kaloku ndibe ngabiza, anisabeli;

ndibe nganolulela isandla sam, akukho bani usamkelayo!

₂₅Ewe, anilikhathalele icebiso lam;

anivumi kusamkela nesilumkiso sam.

₂₆Ke mna ndiya kuhlekisa ngani nakungena enkathazweni;

ndiya kuphoxisa ngani ngomhla wonxunguphalo.

₂₇Ewe, nditsho naxa senirhwaqele lunxunguphalo,

lunihlasela njengesaqhwithi;

seningathi nirhiwulwa sisivunguvane,

imbandezelo neenzingo zinifikele.

₂₈“Ngenene, niya kuzibika kum, kodwa ke mna ndingasabeli.

Niya kuba ngabhadula nindifuna, ningandizuzi.

₂₉Kaloku nisuke naluthiya ulwazi,

anakukhathalela ukuthobela *uNdikhoyo.

₃₀Ewe, anilamkelanga icebiso lam,

anivumanga naxa ndinilumkisa.

₃₁Ngoko ke niya kuvuna loo nto niyilimileyo;

amacebo enu lawo niya kuwatya nide niwatyekeze.

₃₂Kaloku iziyatha zifa kuba zibumangala ubulumko;

zona izityhakala zizibhubhisa ngokungakhathaleli nto.

₃₃Kambe ke bona abandiphulaphulayo bahlala bekhuselekile;

ewe, bathi zava, bengaxhalele kwenzakaliswa nto.”

₁Mfo wam, wathathele ingqalelo amazwi am,

ungaze uyishiye imiyalelo yam.

₂Ewe, bubazele iindlebe ubulumko,

nentliziyo yakho uyilahlele ekwazini.

₃Kubizele kuwe ukuqiqa,

uliphakamisele ilizwi lakho ekuqondeni.

₄Ubulumko buzingele njengesiliva,

ubufune njengobutyebi obombelweyo.

₅Ukuba uyenzile loo nto uya kukuqonda into okuyiyo ukuthobela *uNdikhoyo,

utsho ufikelele ekumazini uThixo.

₆Kaloku nguNdikhoyo onika ubulumko;

luphuma emlonyeni wakhe ulwazi nokuqonda.

₇Abo bathembekileyo ubathululela ingqiqo,

aze abe likhaka lâbo banyanisekileyo.

₈Uhlala eyalusa indlela yamalungisa,

aze abakhusele kwihambo yabo âbo banyanisekileyo kuye.

₉Ukuba uyandiphulaphula uya kuba nako ukubuqonda ubulungisa,

ukwazi okufanelekileyo nokulungileyo.

Ewe, uya kutsho uyazi yonke indlela ethe ngqo.

₁₀Kaloku ubulumko buya kuhlala entliziyweni yakho,

umphefumlo wakho uchwayite lulwazi.

₁₁Ukuba neembono eziphangaleleyo kuya kukugcina;

ukuqonda kuya kukukhusela,

₁₂utsho ukhwebuke ekwenzeni izinto ezigwenxa,

usinde kubantu abaphembelela iinkathazo –

₁₃nditsho asebazilahlayo iindlela ezithe ngqo,

asebehamba ngeendlela zobumnyama.

₁₄Abo ke bangabantu abavuyayo xa besenza into embi,

abayichwayitelayo imikhwa ephuthileyo yobubi.

₁₅Ewe, aba bantu ngamaqhophololo;

iindlela zabo zingamagoso-goso.

₁₆Ngenene uya kutsho usinde kumfazi ongakwaziyo ukuziphatha,

umfazi wasemzini omazwi alalanisayo.

₁₇Nditsho lowo ungathembekanga nasendodeni awazimanya nayo kwasebutsheni bakhe,

ongawukhathalelanga nomnqophiso awawenza phambi koThixo wakhe.

₁₈Kaloku indlela eya emzini wakhe iya ekufeni,

nabo bonke ke abahamba ngayo basinga kwelabafileyo.

₁₉Ewe, kuloo mzi wakhe akuyi lubuyayo;

uthi umntu angangena khona angaze aphinde ayifumane indlela yobomi.

₂₀Ngoko ke hamba ekhondweni labantu abalungileyo,

uziphathe ngeendlela zamalungisa.

₂₁Kaloku ngabantu abanyanisekileyo abaya kuma kweli lizwe;

ewe, ngâbo bamsulwa abaya kuhlala behleli kulo.

₂₂Ke bona abantu abakhohlakeleyo baya kunqanyulwa elizweni;

abo bangamatshijolo baya kuncothulwa kulo.

₁Mfo wam, sukuyilibala imfundiso yam,

koko mayihlale ihleli imiyalelo yam engqondweni yakho.

₂Kaloku imfundiso yam iya kukongezela imihla emininzi,

ikwandisele iminyaka noxolo.

₃Ungaze wahlukane nentembeko nokunyaniseka.

Maxa onke ezi zinto mazibe sisivatho entanyeni yakho.

Ewe, zikrole elucwecweni lwentliziyo yakho.

₄Ukuba uyayenza ke loo nto uya kuhlala wamkelekile,

ube negama elihle kuThixo nasebantwini.

₅Kholosa *ngoNdikhoyo ngomxhelo wakho wonke,

ungaze ungqiyame ngezakho iimbono.

₆Mkhumbule uNdikhoyo kuyo yonke ihambo yakho,

waye ke yena eya kukukhokela kuzo zonke iindlela zakho.

₇Musa ukuzibona usisilumko wena ngokwakho;

ndaweni yaloo nto hlala umhlonela uNdikhoyo, ubucezele ububi.

₈Loo nto iya kuwunika impilo umzimba wakho,

atsho omelezeke amathambo akho.

₉Rhuma ngobuncwane bengeniso yakho, uzimase uNdikhoyo;

ewe, menzele umnikelo ngolibo lwemveliso yakho.

₁₀Ukuba uyayenza le nto ziya kutsho zizale izisele zakho yindyebo;

kanti ke neentsuba zakho ziya kuhlala ziphuphuma yiwayini entsha.

₁₁Mfo wam, musa ukuyidela ingqeqesho kaNdikhoyo,

ungasicekisi isiluleko sakhe.

₁₂Kaloku uNdikhoyo uyamluleka umntu amthandayo,

kwanjengokuba uyise emohlwaya unyana anebhongo ngaye.

₁₃Unenyhweba kambe umntu obufumeneyo ubulumko;

nditsho lowo ukuzuzileyo ukuqonda.

₁₄Kaloku bona ubulumko yingeniso engaphezu kwayo nesiliva;

nditsho negolide ayithathi nto kubo.

₁₅Ewe, bungaphezulu lee nakumatye axabisekileyo.

Kuzo zonke izinto onokuzinqwenela ayikho edlula ubulumko.

₁₆Kaloku isandla sabo sokunene siqhelezela bubomi,

kanti kwesokhohlo buxakathe ubutyebi nesidima.

₁₇Iindlela zabo ziindlela ezimnandi;

ewe, xa zizonke zizisa uxolo.

₁₈Bungumthi wobomi kwababambelela kubo;

bonwabile abo babuzuzileyo.

₁₉Kaloku uNdikhoyo ihlabathi waliseka ngobulumko,

namazulu ngokwawo wawazinzisa ngengqiqo yakhe.

₂₀Bubugcisa bakhe obagqabhuza iinzonzobila,

namafu atsho afukama avuza umbethe.

₂₁Mfo wam, buxabise ubuchule ndawonye nobulumko bokuvisisana;

ezi zinto mazingasitheli emehlweni akho.

₂₂Ziya kukuthi jize ngobomi,

zibe sisihombiso sentamo yakho,

₂₃utsho uhambe ungenaxhala,

unyawo lwakho lungenakukhubeka ntweni.

₂₄Ngokuhlwa uya kungqengqa ungaphaphazeli,

ulale uthi yoyi ubusuku bonke.

₂₅Awuyi kuba sayixhalela intshabalalo equbulayo,

ngokunjalo nesibetho esifikela izikhohlakali.

₂₆Kaloku uNdikhoyo uya kukugcina ukhuselekile;

soze aluyekele unyawo lwakho lungene emgibeni.

₂₇Musa ukwala nento elungileyo konelungelo ngayo,

ngakumbi xa kusemandleni akho ukumnceda.

₂₈Musa ukuthi kummelwane wakho:

“Hamba, uze uphinde ubuye;

ndiya kukunika ngomso,”

kanti unalo uncedo kuwe.

₂₉Ungaze umenzele iyelenqe ummelwane wakho;

kaloku uhlala ngakuwe ekuthembile.

₃₀Musa ukuxabana nomntu ngaphandle kwesizathu,

engakwenzanga nto imbi.

₃₁Musa ukuyilangazelela inzuzo yomntu okhohlakeleyo;

ndaweni yaloo nto zicezele iindlela zakhe.

₃₂Kaloku ulisikizi kuNdikhoyo umntu olitshijolo;

kodwa abathe tye bangamathenjwa akhe.

₃₃UNdikhoyo uwushwabulele umzi womntu okhohlakeleyo;

kanti ke wona umzi welungisa uyawuthamsanqela.

₃₄Ke bona abantu abagxekayo uphoxisa ngabo,

aze abenzele isisa abo bazithobayo.

₃₅Abantu abalumkileyo baya kulidla ilifa udumo;

ke zona iziyatha ziya kwambathwa lihlazo.

₁Yiphulaphuleni, bonyana, ingqeqesho kayihlo;

yigqaleni, khon' ukuze nizuze ukuqonda.

₂Ndininika eyona mfundiso iyiyo,

ngoko ke musani ukuwutyeshela umyalelo wam.

₃Ngokuya ndandiseyinkwenkwana katata,

ndiselula, ndinguyedwa kamama,

₄utata wayendiyala athi:

“Wazikise engqondweni yakho amazwi am,

ungayilibali imiyalelo yam;

yigcine imithetho yam, uphile.

₅Thabatha, nabu ubulumko, nantsi ingqiqo!

Ungaze wahlukane okanye ushenxe kumazwi omlomo wam!

₆Ungaze ubushiye ubulumko, ke bona buya kukulondoloza.

Thandana nabo, khon' ukuze bukukhusele.

₇Ubulumko ngoyena ndoqo, bufunisise!

Fumana ingqiqo, nokuba kudle konke onako.

₈Ewe, bunonelele ubulumko, ke bona buya kukuphakamisa;

bukhwaphe, ke bona buya kukuthi jize ngesihomo.

₉Boba njengentsimbi ehombisa intloko yakho,

bukuthi jize ngesithsaba esingayiwayo.”

₁₀Phulaphula, nyana wam, uwathathele ingqalelo amazwi am,

uze udle ubomi iminyaka emininzi.

₁₁Mna ngokwam ndikufundisile ubulumko,

ndakukhokelela endleleni ethe ngqo.

₁₂Xa uhamba, ukunyathela kwakho akuyi kuphazanyiswa,

ngokunjalo naxa ubaleka akuyi kukhubeka.

₁₃Ungaze wahlukane nengqeqesho, koko bambelela kuyo;

yilondoloze, kuba ibubomi bakho.

₁₄Musa ukuhambisana nabantu abakhohlakeleyo,

ungahambi nasekhondweni labenzi bobubi.

₁₅Ewe, ndithi zicezele iindlela zabo, ungahambi ngazo.

Shenxa kuzo, uhambe uzigqithe.

₁₆Kaloku izikhohlakali azaneli kukulala zingenzanga nto imbi.

Ewe, ziphuthelwa ubusuku bonke, zide zibe zenzakalise umntu.

₁₇Kaloku inkohlakalo sisonka abasidlayo;

ubundlobongela yiwayini abayiselayo.

₁₈Ke yona indlela yamalungisa ifana nemitha yokusa,

yona iya iqaqamba ngokuqaqamba de ibe yimini epheleleyo.

₁₉Kambe ke zona iindlela zabakhohlakeleyo zingumnyam' ombonde-mbonde.

Naxa bekhubeka abayazi into abakhubeka kuyo.

₂₀Ke wena, mfo wam, wagqale amazwi am,

uyibazele iindlebe into endikuxelela yona.

₂₁Amazwi am makangacimi emehlweni akho,

koko wamilisele phakathi entliziyweni yakho.

₂₂Ewe, abubomi kwabo bawafumeneyo;

ayimpilo kumzimba xa uwonke.

₂₃Eyona nto emawuyilondoloze ngaphezu kwazo zonke ezinye yintliziyo yakho,

kuba yona ingumthombo wobomi.

₂₄Mabungabikho ubuxoki emlonyeni wakho,

nentetho ekhohlisayo ibe kude lee emilebeni yakho.

₂₅Makathi ntshoo phambili amehlo akho,

neenkophe zamehlo akho zithi ngqo.

₂₆Qiqa phambi kokuba ubeke unyawo lwakho endleleni,

ukuze ihambo yakho iqiniseke.

₂₇Musa ukujika-jika uye ngasekunene nangasekhohlo;

unyawo lwakho malubucezele ububi.