Bible Reading Plan – Day 270

₂“Hoyina, nani nina zilumko;

khanibek' iindlebe, nani zingqondi!

₃Ukutya kungcanyulwa lulwimi,

ke yona intetho iviwa ziindlebe.

₄Makhe sikhethe oko kulungileyo;

ewe, masiphicothe oko kufanelekileyo.

₅“Kaloku uYobi uthi: ‘Ndimsulwa,

kodwa uThixo undivimb' ubulungisa.

₆Nangona ndinyanisekile, ndiphathwa okwexoki;

nangona ndingenatyala, utolo lwakhe lundingxwelerhile.’

₇Wakha wakho phi ofana noYobi lo,

osoloko ehlalele ukuphoxisa,

₈umnt' osoloko ethene mbende nabenzi bobubi,

ohlal' eqhogene nezikhohlakali?

₉Kaloku yena uthi:

‘Akumncedi lutho umntu

ukuzimisela ukukholisa uThixo.’

₁₀“Kambe ke ndiphulaphuleni, zingqondi:

kukude lé kuThixo ukwenza ububi,

kuSomandla ukwenza ubugwenxa.

₁₁Kuye umntu uvuna loo nto ayilimileyo;

umntu umphatha ngokwehambo yakhe.

₁₂Hayi bo, uThixo akayenzi inkohlakalo;

uSomandla akabugqwethi ubulungisa.

₁₃Kakade ngubani owammiselayo ukuba alawule ihlabathi?

Ngubani owambeka ukuba alongamele lonke elimiweyo?

₁₄Xa ebenokusuka azimisele

awunqamle umoya wakhe nempefumlelo yakhe

₁₅konke okuphilayo kungasuka kutshabalale,

noluntu lonke lubuyele kwaseluthulini.

₁₆“Ngaba uyaqiqa na – phulaphula ke!

Bek' iindlebe ndithethe.

₁₇Umchasi-mthetho angalawula njani?

Ke wena ungamgweba njani uThixo

eyingangalala yelungisa nje?

₁₈Kaloku nakukumkani yena unokuthi: ‘Awunto yanto;’

aze kwizidwangube athi: ‘Nizizinto ezikhohlakeleyo.’

₁₉UThixo akakhethi buso nakumatshawe;

nesityebi akasilungiseleli ngaphezu kwehlwempu;

kaloku bonke bangumsebenzi wezandla zakhe.

₂₀Bafa ngephanyazo ezinzulwini zobusuku;

bayagungqiswa abantu, bafe;

kwanezihandiba ziyawa zingawiswanga mntu.

₂₁“Kaloku yena uzijongile iindlela zabantu;

uwabona onke amanyathelo abo.

₂₂Kaloku akukho thunzi nantsunguzi yabumnyama

apho abenzi bobubi bangazifihla khona.

₂₃KuThixo akuyomfuneko ukubancwina ngakumbi abantu

xenikweni ebasa ematyaleni.

₂₄KuThixo akukho mfuneko yaluphando

xa abakhiqayo abasezintanjeni,

aze amisele abanye ezikhundleni zabo.

₂₅Kaloku uyazazi izenzo zabo;

ubabhukuqa ngobusuku babhange.

₂₆Xa sukuba ebohlwaya ngenxa yobugwenxa babo,

loo nto uyenza esidlangalaleni.

₂₇Andithi na kaloku basuke bakreqa,

ababi sazikhathalela iindlela zakhe?

₂₈Ohlelelekileyo bamtsho wazibika kuThixo,

waza ke yena wasiva isikhalo sabasweleyo.

₂₉Xa athe cwaka ngubani ongamgwebayo?

Naxa efihle ubuso bakhe ngubani ongambonayo?

Nguye ngokwakhe olawula uluntu nezizwe,

₃₀ukuze athintele isikhohlakali ekulawuleni,

singababekeli umgibe abantu.

₃₁“Ukuba ngaba umntu ebenokuthi kuThixo:

‘Ndikuvukele, kodwa andiyi kuphinda ndone.

₃₂Ndifundise oko ndingenako ukukubona.

Ukuba ndenze ubugwenxa andisayi kuphinda ndenjenjalo.’

₃₃Ngaba uThixo uthi useza kumohlwaya

ngenxa yokumvukela kwakhe?

Zikhethele ngokwakho, ingabi ndim.

Into oyaziyo yithethe.

₃₄“Kambe ke iingqondi zosuka zithi,

ewe, izilumko zona zingathi:

₃₅‘UYobi uthethiswa kukungazi;

ewe, akathethi, koko uyabhibhidla.’

₃₆Akwaba uYobi ebenokucikidwa ngokupheleleyo,

kuba impendulo yakhe ifana neyendoda ekhohlakeleyo.

₃₇Ewe, esi sono sakhe uyasandisa,

kuba kaloku usuka adlongozele,

aqhwabe ngolunya izandla zakhe phakathi kwethu,

atheth' umlembelele ngoThixo.”

₂“Ucinga ukuba bubulungisa na obu?

Kaloku uthi: ‘Ndiya kugwetyelwa nguThixo.’

₃Kanti ubhekisa kuThixo usithi:

‘Khon' ukuba ndonile ke?

Kundinceda ngani ukungoni?’

₄“Ke ngoku mna ndiza kukuphendula,

wena ngokunjalo nabahlobo bakho.

₅Khawuqethuke ujonge amazulu,

uwabone la mafu aphezu kwakho.

₆Noba uyona awumchukumisi nganto uThixo;

ewe, awumenzi nto noba ungade uphinda-phinde!

₇Ukulungisa kwakho kumnceda ngantoni ke?

Ewe, uThixo akazuzi nto esandleni sakho.

₈Ukona kwakho kuphazamisa kwa-abantu,

nokulungisa kwakho kunceda kwabona.

₉“Abantu bayakhala ngenxa yobuninzi bengcinezelo;

balangazelela ukukhululeka kwisandla sabanamandla.

₁₀Kodwa yinqaba ukubhenela kuThixo uMdali wabo

ozisa ithemba xa sukuba lixubayele.

₁₁Nguye osinika ulwazi kunezilwanyana;

yena usenza silumke kuneentaka.

₁₂Abantu noba sebekhala, uThixo akaphenduli,

kuba abakhohlakeleyo bathiwe lwale likratshi.

₁₃Inene, uThixo akangeke awaphulaphule amampunge;

uSomandla akawasi so tu.

₁₄Kunjalo maxa usithi akumboni uThixo,

usithi umcimbi wakho uphambi kwakhe,

usithi ulinde yena,

₁₅naxa uthi uThixo akacaphuki ohlwaye,

usithi akasihoyi isono.

₁₆Ke uYobi uthetha amampunge,

wenza umlembelele engenalwazi.”

₂“Kambe ke khawundinyamezele kancinci,

kuba kusekho ekufuneka ndikuthethe ndimele uThixo.

₃Olwam ulwazi luvela kude;

lucacisa ukuba uThixo, uMdali wam, lilungisa.

₄Kaloku akukho buxoki kula mazwi am –

ophakathi kwenu unolwazi olugqibeleleyo.

₅UThixo womelele, kodwa akadeleli mntu;

unamandla, nolwazi lwakhe alugungqi.

₆Izikhohlakali akaziyeki zidle ubomi,

kodwa uyabazelelela abo bahlelelekileyo.

₇Akawasusi amehlo akhe kumalungisa.

Nguye obeka ookumkani ezihlalweni,

abanye abayeke apho ixesha elide.

Kodwa ukuba bayaziphakamisa

₈bakhonkxwa ngamatyathanga,

bebanjiwe ngezintya zeentlupheko.

₉UThixo ubatyhilela izenzo zabo,

esalatha izikreqo zabo xa babeziphakamisa.

₁₀Kaloku yena ubenza balulamele ululeko;

ubayalela ukuba bahlukane nobugwenxa.

₁₁Ukuba ke bayamva bemthobela uThixo,

boyigqiba imihla yabo bexhamla indyebo,

neminyaka yabo ibe yeyokwaneliseka.

₁₂Kambe ke xa bengeva baya kutshabalala ngekrele,

bafe ngenxa yokuswela kwabo ulwazi.

₁₃“Abantliziyo zingenaThixo bazongezelela ingqumbo yakhe;

abazibiki kuye naxa bekhonkxiwe.

₁₄Bona bafa besebatsha,

bexhwalekile ngamahlazo abahlala kuwo.

₁₅Kambe uThixo uyabafundisa abantu nangehambo-nzima;

ubavula iindlebe ngokusebenzisa nembandezelo.

₁₆“Nawe wakukhupha enkathazweni,

wakutsho waxhamla intlala-kahle,

usitya uhlutha, ungaswele nto.

₁₇Kodwa ngoku isohlwayo esifanele abakhohlakeleyo siphezu kwakho;

ukugwetywa nokohlwaywa kukufikele.

₁₈Lumka ke umsindo wakho ungawenzi umgibe wokubambisa abanye,

ungazimiseli ukusebenzisa ukunyoba okukhulu ukuguqula imeko.

₁₉Ngaba kukubhomboloza kwakho na okunokukunceda?

Hayi bo, yonke imigudu yakho ayingeke incede.

₂₀Sukulangazelela ukuza kobusuku,

xesha elo batshabalala ngalo abantu.

₂₁Lumka ungayi ebubini;

ungazilahleli kubo ngenxa yokubandezeleka.

₂₂Kaloku uThixo yimbalasane ngamandla;

ke kumba wokufundisa uyingcungela.

₂₃UThixo akaxelelwa mntu amakakwenze;

ngubani onokuthi kuye: ‘Wenze okugwenxa’?

₂₄Khumbula uwuphakamise umsebenzi wakhe,

lowo abantu bawubongayo ngeengoma.

₂₅Bonke abantu bayayibona imisebenzi yakhe,

noxa beyibona bekude nje.

₂₆Hayi ukuba mkhulu kukaThixo!

Uyiphakamele ingqiqo yethu;

inani leminyaka yakhe aligocagoceki.

₂₇“Nguye ofunxa amanzi emhlabeni,

awajike awenze amathontsi emvula,

₂₈mvula leyo ina iphuma emafini,

ibe zizandyondyo kumntu wonke.

₂₉Ngubani okuqondayo ukuhamba kwamafu,

nokuzongoma kweendudumo ezulwini phaya?

₃₀Yena utshawuzisa umbane esibhakabhakeni;

nguye ogubungela inzonzobila yolwandle.

₃₁Le yindlela aluxhasa ngayo uluntu,

aluthi jize ngendyikityha yendyebo.

₃₂Ke yona imibane iselulawulweni lwesandla sakhe;

uyayiyalela itsho ichan' ucwethe.

₃₃Kambe ke sona isiphango sixelwa ziindudumo,

nditsho neenkomo ziyakwazi ukuza kwaso.”