Bible Reading Plan – Day 262

Itekisi yeBhayibhile

UYOBI 1

Intshayelelo

₁KwelaseUze kwakukho indoda egama linguYobi. Wayengumfo olungileyo engenabala, umfo omhlonelayo uThixo eyithiyile into embi. ₂Wayenoonyana abasixhenxe neentombi ezintathu. ₃Wayefuyile eneegusha ezingamawaka asixhenxe, amawaka amathathu eenkamela, newaka leenkabi zeenkomo, needonki ezingamakhulu amahlanu. Ngokunjalo ke lo mfo wayenenyambalala yezicaka. Ke uYobi lo wayeyeyona ndoda isisinhanha kubo bonke abantu kwelasempuma.

₄Ke kaloku oonyana bakaYobi babedla ngokuqokelelana benze umbhiyozo endlwini yalowo yayiyimini yakhe. Babemema noodade babo abathathu ukuza kutya basele kunye nabo. ₅Wakuba lo mbhiyozo ujikeleze kubo bonke uYobi wayedla ngokubabiza abantwana bakhe ukuze abahlambulule. Wayevuka kusasa kakhulu, abenzele amadini atshiswayo ngabanye ngabanye. Kaloku uYobi wayesithi: “Mhlawumbi kusenokwenzeka ukuba abantwana bam bonile bamtshabhisa uThixo ezintliziyweni zabo.” Wayesenjenjalo ke uYobi ngayo yonke imihla yakhe.

UYobi uyavavanywa

₆Ngamhla uthile izidwangube zakwaThixo zaya *kuNdikhoyo, noSathana ke ephakathi kwazo. ₇UNdikhoyo ke wathi kuSathana: “Uvela phi wena?”

Ke yena uSathana waphendula uNdikhoyo wathi: “Ndivela ekubhaduleni, ndisihla ndinyuka, ndijikeleza ehlabathini.”

₈UNdikhoyo wathi kuSathana: “Usiqondile kodwa isicaka sam uYobi? Akakho onjengaye ehlabathini liphela. Yena ngumfo othembekileyo ongenabala, indoda emhlonelayo uThixo, eyicezelayo into embi.”

₉USathana wamphendula uNdikhoyo wathi: “Kungaba kungelize na ukuba uYobi afumane amoyike uThixo? ₁₀Kaloku wena umbiyele; usoloko umphahlile yena nendlu yakhe, nako konke anako. Uwuthamsanqele wonke umsebenzi wezandla zakhe, yaye nemfuyo yakhe iye isanda ngokwanda elizweni. ₁₁Nangoku ke khawolule isandla sakho uchukumise yonke le nto anayo; uya kubona, uya kukushwabulela nawe lo!”

₁₂UNdikhoyo ke wathi kuSathana: “Kulungile ke, ungayenza into oyenzayo kwinto yonke anayo, kodwa uze ungakhe ulinge umchukumise yena siqu.”

USathana ke wemka apho phambi koNdikhoyo.

₁₃Ngenye imini xa oonyana bakaYobi neentombi zakhe babebhiyoza besitya besela endlwini yenkulu yakhe, ₁₄kwafika isigidimi kuYobi, sathi: “Besilima ngeenkabi, zona iidonki zisitya kwalapho kufutshane; ₁₅kwaza kwagaleleka amaSabha, asihlasela, azithimba ezo nkomo needonki. Ke zona izicaka zakho azibulele ngekrele; kusinde mna ndedwa ukuze ndikwazise.”

₁₆Eso sicaka sathi sisathetha njalo kwafika esinye isigidimi, sathi: “Zonke iigusha zakho ngokunjalo nabelusi zibethwe ngumbane zafa; kusinde mna ndedwa ukuze ndikwazise.”

₁₇Sisathetha njalo kwagaleleka esinye, safika sathi: “Sihlaselwe ngamaqela amathathu amaKaledi, afika azithimba iinkamela, abelusi ababulala ngekrele, yandim ndedwa osindayo ukuze ndikwazise.”

₁₈Eso sigidimi sathi sisachaza njalo, kwagaleleka esinye, safika sathi: “Oonyana neentombi zakho bebesendlwini yonyana wakho omkhulu, bebhiyoza, besitya, besela iwayini, ₁₉kwaza kwasuka kwavuthuza inkanyamba, ivela ngasentlango. Isuke yadlikidla amacala omane endlu leyo, yabawela abantwana abo, bafela apho bonke; ndim ndedwa osindileyo. Ewe, ndim kuphela osindileyo ukuze ndikubikele.”

₂₀Kwesi sithuba ke uYobi waphakama, wakrazula umnweba wakhe, wayigugula intloko yakhe, waza ke wee guqaqa wanqula, ₂₁wathi:

“Ndazalwa nguma ndizé, ndaye ke ndiya kunduluka ndikwazé.

NguNdikhoyo onikayo, ikwanguye nothathayo.

Malidunyiswe igama likaNdikhoyo!”

₂₂Kuyo yonke le ntlekele uYobi zange one okanye akhalazele uThixo.

UYOBI 2

UYobi uyavavanywa kwakhona

₁Kwakhona kwathi kwakufika usuku lokuba izidwangube zakwaThixo zihlanganisane phambi *koNdikhoyo noSathana wabakho phakathi kwazo ukuze avele phambi koNdikhoyo. ₂UNdikhoyo wathi kuSathana: “Uvela phi wena?”

Ke yena uSathana wamphendula uNdikhoyo wathi: “Ndivela ekubhaduleni, ndisihla ndinyuka, ndijikeleza ehlabathini.”

₃UNdikhoyo wathi kuSathana: “Usiqondile kodwa isicaka sam uYobi? Akakho onjengaye ehlabathini liphela. Yena ngumfo othembekileyo ongenabala, indoda emhlonelayo uThixo, eyicezelayo into embi. Nangoku usabambelele ekuthembekeni kwakhe, nangona wena undixhokonxele ekubeni ndimonakalisele ngaphandle kwesizathu.”

₄USathana ke wamphendula uNdikhoyo wathi: “Hayi kaloku, isikhumba ngesikhumba! Umntu angancama yonke into anayo ngenxa yobomi bakhe. ₅Nangoku ungathi ukhe wolula isandla sakho wamchukumisa enyameni nasemathanjeni akhe, angakushwabulela nawe lo.”

₆UNdikhoyo ke wathi kuSathana: “Kulungile ke, nanko ndimnikela esandleni sakho; nto nje uze ungabuchukumisi ubomi bakhe.”

₇USathana ke wemka apho phambi koNdikhoyo, wafika wabetha uYobi ngamathumba oyikekayo athi tshitshilili ukuqalela elunyaweni ukuya kutsho entloko. ₈Ke kaloku uYobi wahlala eluthuthwini, wathatha iceba lembiza, wazonwaya ngalo.

₉Inkosikazi yakhe yathi kuye: “Nangoku usabambelele kule ntembeko yakho? Mqalekise lo Thixo, ufe kube kanye!”

₁₀Ke yena wamphendula wathi: “Ukuthetha kwakho nqwa nokomfazi ongaqiqiyo! Kakade, uthi masiyolelwe zizinto ezintle zodwa esiziphiwa nguThixo, singazamkeli ezimbi?”

Kuyo yonke le ntlekele uYobi zange one ngomlomo wakhe.

UYobi uhanjelwa zizihlobo

₁₁Ke uYobi wayenezihlobo ezithathu ezathi zeva ngayo yonke le nkxwaleko emhleleyo. Yaseso isihlobo ke seza sivela kowaso umzi, inguElifazi waseTeman, uBhildadi waseShuwa, noZofare waseNama. Zazivumelene ngento yokuba ziye kumkhuza uYobi, zimthuthuzele. ₁₂Ke kaloku zathi zisemgama zambona uYobi, phofu ke azamazi. Kambe ke zathi zakumqonda zangqukruleka zalila, zakrazula iminweba yazo, zizigalela ngothuli entloko, ziphosa uthuli emoyeni. ₁₃Ke kaloku zahlala naye apho phantsi iintsuku ezisixhenxe nobusuku bazo kungekho nasinye sithetha naye, kuba zazibona ukuba umva-ndedwa wakhe mkhulu gqitha.

UYOBI 3

UYobi uqalekisa umhla awazalwa ngawo

₁Emva koko ke uYobi wathetha wawuqalekisa umhla awazalwa ngawo. ₂Ewe, uYobi uvakele esithi:

₃“Ngamana zange wathwasa umhla endazalwa ngawo;

nditsho nobo busuku apho kwathiwa: ‘Namhlanje kukhawulwe indoda!’

₄Akwaba loo mini yayingumnyam' ombonde-mbonde;

mini leyo noThixo kweliphezulu angayihoyanga;

mini ingazange yabonana nokukhanya!

₅Ngeyambathiswe sisiphitha-nyongo sobumnyama;

ngeyisityekelwe ziingqimba zamafu.

Loo mini ngeyirhwaqeliswe sisithokothoko sobumnyama;

₆nobo busuku ngebambathiswe sisithokothoko,

suka àbabalelwa kwimihla yonyaka,

àbakhankanywa phakathi kweentsuku zeenyanga.

₇Ewe, akwaba obo busuku babuludlolo;

akwaba kwakungavakalanga kumemelela kubo.

₈Iinkintsela zokuqalekisa imihla ngeziyiqalekisile loo mini;

ngeziyifunze ngengwenya.

₉Iinkwenkwezi zangorhatya ngezimnyama;

loo mini ngeyilindele ukusa kodwa kungaze kufike,

nomsobomvu ungaze uthi chapha!

₁₀Kaloku ayizivalanga iingcango zesizalo esandizalayo,

ayandiphephisa kule nkxwaleko ndikuyo.

₁₁“Kwakungani ndingafi ndingekazalwa nje,

okanye ndife ndisazalwa?

₁₂Ngani ukuba uma andisingathe emadolweni?

Khona, kwakutheni ukuba andincancise ibele?

₁₃Kuba xa bekungenjalo, ngendalala ndazola;

ewe, ngendiphumle kobandayo,

₁₄ndawonye nezikumkani namaphakathi,

lawo awavusayo amanxuwa;

₁₅ngoku ngendikunye namatshawe,

azindlu zazizele yigolide nesiliva.

₁₆Ngani ukuba ndingafihlwanga njengomphunzo,

njengemveku engalibonanga ilanga?

₁₇Kaloku apho nezikhohlakali azikhathazi mntu,

nabadiniweyo baxhamla ukuphumla.

₁₈Khona amabanjwa azonwabele;

ahlukene nokungxoliswa yinduna yawo.

₁₉Apho bandawonye abaphakamileyo nabaphantsi,

nkqu nekhoboka likhululekile kumninilo.

₂₀“Ngani ukuba abaza kubandezeleka balibone ilanga,

abangcungcuthekayo babudle ubomi?

₂₁Bona balangazelela ukufa, kungafiki noko;

bakuzingela ngathi bafuna ubutyebi.

₂₂Abavuyi bayachulumacha,

bachwayitile xa bedibana nengcwaba.

₂₃Ngani ukuba balibone ilanga abandlela imfiliba,

abo babiyelweyo nguThixo?

₂₄Kuba ukutya kwam yincwina;

ukugcuma kumpompoza njengamanzi.

₂₅Kuba ndihlelwa zezo zinto zindinkwantyisayo;

ezindinxunguphalisayo zezona zindihlelayo.

₂₆Andinako ukuzola, ndingenako nokonwaba;

Andifumani kuphumla, kuba ndasoloko ndijijitheka.”

UYOBI 4

UElifazi: Obhangayo ngonetyala

₁Kwesi sithuba ke kuphendule uElifazi waseTeman, wathi:

₂“Ngaba xa umntu enokukuphendula awungekhathazeki kodwa?

Phofu ke ibingubani onokuthula nje?

₃Khumbula kaloku ukuba baninzi abantu obaqeqeshileyo,

ubakhuthaza ubomeleza abazandla zinomkhinkqi!

₄Ngamazwi akho ubaxhasile abakhubekayo,

wabaqinisa abamadolo agevezelayo.

₅Namhlanje ke kungawe, naku ke wena ungenakunyamezela;

ewe, zidla kuwe, ngoku ke wena suka wadideka.

₆Andithi na kaloku wena ukholosa ngokuhlonela uThixo?

Ewe kaloku, qamela ngobunyulu beendlela zakho, ukholose!

₇“Hayi kaloku, khawuzikise ukucinga;

ngubani owakha wabhanga emsulwa?

Ingubani khona owakhe watshabalala kodwa engenabala?

₈Ke kwawam amava, abalima ububi, batyale inkathazo,

bavuna loo nto bayilimileyo.

₉Ewe kaloku, ngokuphefumla nje kukaThixo batsho badake;

ngenene yena ufutha kube kanye batsho baphel' emehlweni!

₁₀Bona banjengeengonyama ezikroboke amazinyo:

nokuba ziyagquma zibhavumle ngokurhwaqelisayo,

₁₁ziyatshabalala kukuswela amaxhoba,

nawo amathole azo asuke abe ziintsali.”

UElifazi: Akukho mntu ulilungisa kunoThixo

₁₂“Ndakha ndee rhithi udaba bunkente-nkente;

ewe, iindlebe zam zeva amarhe ngathi kuyasetyezwa.

₁₃Kanye ngaloo mathuba emiva-ndedwa yemibono ebusuku,

xa kanye ndikobentlombe,

₁₄suka ndarhwaqela ndankwantya,

ada amathambo am anengevane.

₁₅Nako ke kusithi phinzi into phambi kwam;

hayi ke, ndahlathuzela ngamanwele!

₁₆Nantso ke, suka yema bhunxe!

Hayi, andibanga nakuyinakana mpela.

Phofu wona umthinzi wabe uphambi kwam –

hayi ke, kwathi cwaka,

ndada ndeva ilizwi lisithi:

₁₇‘Ngab' ingenzeka na into yokuba umntu abe lilungisa kunoThixo?

Umntu angaba nyulu ngaphezu koMdali wakhe?

₁₈Andithi na kaloku nezicaka zakwakhe akazithembi?

Nditsho nezithunywa zakhe azimkholisi kwaphela.

₁₉Babengoobani ke abantu abahlala ezindlwini zodaka,

abantu abasiseko siluthuli,

abasuka batyumke njengenundu?

₂₀Umntu ungambona ekhona kusasa,

kanti ke kuya kuthi kurhatyela abe selengasekho;

ewe, utshabalala kuphele engakhange aqondakale!

₂₁Kaloku nelo nqugwala lakhe lisuka lincothulwe,

ke yena afe engekabufumani bona ubulumko!’ ”

UYOBI 5

₁“Danduluka kaloku, ukhale,

ubone ukuba ukhona oya kuphendula!

He-e-e, uza kubhenela kwesiphi ke ngoku isithunywa?

₂Ngenene izityhakala zizigwinta ngengcwangu yazo;

lona ikhwele yimfeketho ephelela ekufeni.

₃Ndakha ndasibona isityhakala sihluma;

suka ke mna ndaliqalekisa elo khaya laso.

₄Oonyana baso basesichengeni;

nasenkundleni basisisulu,

akukho bani ubahlangulayo.

₅Isivuno saso sityiwa zizilambi,

zisicubungula naphakathi kwameva.

Amabawa ayaburhogola ubutyebi baso.

₆Kaloku inkxwaleko ayiphumi luthulini,

ibe ke nenkathazo ayintshuli mhlabeni.

₇Umntu nenkathazo ngumtya nethunga,

kwanjengokuba intlantsi ihamba nomlilo!”

UYOBI 1:1-5:7XHO96Vula kumfundi weBhayibhile

Izixhobo ZeBhayibhile

Malunga neBhayibhile

Isishwankathelo seBhayibhile (en)

I-BibleSA app

IiBhayibhile

Ngathi (en)

Ivenkile yeBhayibhile (en)

IBhayibhile Yonke Imihla

Izixhobo Ezongezelelweyo ZeBhayibhile (en)

Iindaba ZeBhayibhile (en)

Umibuzo yeBhayibhile (en)

Izicwangciso Zokufunda

Ivesi-ngosuku (en)

Izixhobo zeCawa

INcwadi yeZibhalo Ezingcwele yeCawa (en)

Ulwandlalo lweNtshumayelo (en)

Umoya kaThixo phakathi kwamaphepha (en)

Umboniso weSoftware (en)

Izikhokelo Zomsebenzisi

Malunga neBibleSA

FAQ (en)