Bible Reading Plan – Day 211

“Khangela ukuvumbuluka kwamanzi ngasentla

atsho abe ngumdolomba oya kugubungela umhlaba

nako konke okukuwo,

izixeko nabemi bazo.

Abantu baya kukhala,

batsho ngesijwili bonke abemi balapha.

₃Ngenxa yesingqi sokuphala kweembalasane zamahashe,

nokugoqoza kweenqwelo,

nokuxokozela kwamavili,

ooyise babashiye enyanyeni abantwana,

kuba izandla zabo ziwile.

₄Kaloku ufikile umhla wokutshatyalaliswa kwawo onke amaFilistiya,

nokuphanziswa kwawo onke amasalela anokunceda iTire neSidon.

Kaloku uNdikhoyo uza kuyitshabalalisa iFilistiya

elisalela lababevela kwisiqithi saseKafetori.

₅IGaza iza kucheba izile,

iAshkelon yona ikhwankqiswe.

Masalelandini asemathafeni,

koda kube nini na nizicenta nimbambazela?

₆“ ‘Hayi bo, krelendini likaNdikhoyo,

wopheza nini na?

Rhoxa ubuyele esingxotyeni,

uphumle uzole.’

₇Kambe ke lingathini ukuphumla

uNdikhoyo elinike umsebenzi nje eAshkelon

nakumathafa angaselwandle?

Uthe maliye kutyakatya apho.”

“Kunyembelekile!

INebho ibhukuqiwe!

Yona iKiriyatayim ihlazekile, ithinjiwe;

inqaba idiliziwe yahlazeka.

₂Luphele nya udumo lwakwaMowabhi.

EHeshbhon baceba ububi ngoMowabhi,

bathi: ‘Yizani simphanzise, angabi saba luhlanga.’

Nawe Mademena, uza kucinyw' igama;

ikrele liza kukusukela.

₃Yivani, naso isililo sivela eHoronayim:

‘Lubhukuqo nogonyamelo!’

₄UMowabhi ubhukuqiwe!

Iimveku zakhe zivakala zikhala.

₅Amadoda anyuka induli yaseLuhiti ehamba elila engaphezi.

Endleleni ehlayo eya eHoronayim ayambambazela;

atsho ngesimbonono ngenxa yobhukuqo lukaMowabhi.

₆Balekani nizisindise, oku kweqwarha lasentlango.

₇Ngenxa yokuba uthembele ngamandla nobutyebi bakho nawe uza kubanjwa,

aze uthixo wakho uKemoshe athinjwe,

yena kunye nababingeleli namagosa akhe.

₈Umtshabalalisi uza kuzifikela zonke iidolophu,

kungasindi nanye.

Intili yoba ngumqwebedu,

ithafa lona lonakaliswe,

njengoko watshoyo uNdikhoyo.

₉Lumkisani uMowabhi,

nithi uza kudilizwa.

Makasabe uMowabhi;

makaphume abaleke.

Iidolophu zakhe ziza kuba ngamabhodlo,

kungabikho mntu uhlala kuzo.

₁₀“Uqalekisiwe owenza ngobuvila umsebenzi awuphathiswe nguNdikhoyo.

Uqalekisiwe lowo unqenayo ukuphalaza igazi ngekrele lakhe.

₁₁“Kwamhla-mnene uMowabhi ebehlala onwabile;

ebezolile njengewayini ecwengileyo, ezibi zayo zisezantsi.

Ewe, njengewayini engathululwanga ikhutshelwa kwenye ingqayi,

naye akazange asiwe ekuthinjweni.

Ngoko ke usenalaa ncasa yamandulo,

nevumba lakhe alizange liguquke.”

₁₂Nguwo ke lo umlomo kaNdikhoyo:

“Kuza imihla apho ndiya kuthumela iinjoli eziya kumthulula.

Ziya kuziqwela iibhekile, zizaphule iingqayi.

₁₃UMowabhi uza kuhlazeka ngenxa kaKemoshe

kanye njengoSirayeli owahlazeka ngenxa yokuthembela kwiBhetele.

₁₄“Ningatsho njani ukuthi: ‘Singamagorha;

sizizigantsontso zokulwa’?

₁₅Ufikile umtshabalalisi wakwaMowabhi;

uza kuzibhukuqa iidolophu zakhe,

awubhubhise edabini owona mlisela mhle womkhosi wakhe,”

utsho uKumkani ogama linguNdikhoyo, uThixo onamandla onke.

₁₆“Intlekele imfikele uMowabhi;

ishwangusha limgubungele ngephanyazo.

₁₇Yibani novelwano nguye, nina bamngqongileyo;

nina bangqina udumo lwegama lakhe,

yithini: ‘Yehaa, yaphukile ingwanyalala yomsimelelo;

waphukile umsimbithi wodumo!’

₁₈“Yihlani ewongeni, nina bemi baseDibhon,

nihlale phantsi kwelibharhileyo.

Unifikele umtshabalalisi weMowabhi,

wazidiliza iinqaba zenu.

₁₉Yimani ngasendleleni, nina bemi baseArure, nikhangele.

Buzani kwindoda esabileyo nakumfazi osindileyo, nithi: ‘Ingaba kwenzekeni na?’

₂₀UMowabhi uhlazekile kuba ubhukuqiwe.

Yenzani isijwili nikhale,

nazise abahlala ngaseArnon,

nithi: ‘UMowabhi ubhuqiwe.’

₂₁Yithini isigwebo sifikile kuloo mathafa:

eHoloni, eJaza, naseMefati;

₂₂eDibhon, eNebho, naseBhete-diblatayim;

₂₃eKiriyatayim, eBhete-gamuli, naseBhete-mewon;

₂₄eKeriyoti naseBhozera,

nakuzo zonke iidolophu zakwaMowabhi,

ezikude nezikufuphi.

₂₅Waphulw' iimpondo uMowabhi;

amandla akhe aphanzisiwe.”

Lowo ngumlomo kaNdikhoyo.

₂₆“Mtshoni ayobe uMowabhi, kuba eziphakamisile phambi koNdikhoyo;

makazityikile emhlanzweni wakhe, abe sisigculelo.

₂₇Kanene uSirayeli wayengesosigculelo senu na?

Wakha wabanjwa namasela na uSirayeli

sele nihlunguzela iintloko nje xa nithetha ngaye?

₂₈Phumani ezidolophini zenu, nina bemi bakwaMowabhi,

niye kuhlala ezingxondorheni,

nixele ivukuthu elakhela indlwana phezulu emlonyeni womqolomba.”

₂₉Sivile ngokukratsha kukaMowabhi.

Asilokratshi, kukuzidla nokuzingca;

ngenene, kukuzigwagwisa

nokuziqenya nokukhukhumala kwentliziyo!

₃₀Nguwo ke lo umlomo kaNdikhoyo:

“Ndiyakwazi ukuzidla kukaMowabhi, kodwa kungamampunge;

ukuzigwagwisa kwakhe kulilize.

₃₁Ndiza kwenza isimbonono ngenxa kaMowabhi,

ndikhale ngenxa kaMowabhi ephela,

kuncwinwe ngenxa yamadoda aseKiriheresi.

₃₂Wena mdiliya waseSibhema,

ndiza kukulilela ngaphezu kokulilela iYazere.

Amasebe akho anabe aya kutsho elwandle,

ada afikelela kulwandle lwaseYazere.

Umtshabalalisi uzifikele iidiliya zakho neziqhamo zakho zasehlotyeni.

₃₃Uvuyo nolonwabo lumkile kumasimi nezitiya zeziqhamo zakwaMowabi,

newayini ndiyinqamle esixovulelweni.

Akusavakali nantswahla yabaxovuli;

naxa kukho intswahla asiyontswahla yamivuyo.

₃₄“Isijwili saseHeshbhon sivakele nase-Elale;

siye kufikelela eYahazi.

Loo ntsholo inabele eZoware;

iye kutsho eHoronayim nase-Egelati-shelishiya;

kuba kaloku namanzi eNimrim sele atsha qoko.

₃₅Ndiza kumnqumla kwaMowabhi osondeza amadini ezindaweni eziphakamileyo,

nalowo uqhumisela oothixo bakhe.”

Lowo ngumlomo kaNdikhoyo.

₃₆“Yiyo loo nto nditsho ngesililo ngathi ngumrhubhe wengcongolo,

ndililela iMowabhi, nditsho amadoda aseKiriheresi.

Buphelile ubutyebi bawo ababebuqwebile.

₃₇Intloko nganye ichetyiwe,

ngokunjalo neendevu zisusiwe;

isandla ngasinye sicentiwe,

esinqeni ngasinye kwabhinqwa irhonya.

₃₈Emaphahleni ezindlu zonke zakwaMowabhi

nasezindaweni zembutho

kusisijwili nje sodwa,

kuba uMowabhi ndimkrobozile

oku kwengqayi engafunwa bani.”

Lowo ngumlomo kaNdikhoyo.

₃₉“Hayi ukuhlazeka kwakhe;

hayi ukubhombholoza kwabo!

Hayi ukunikela kukaMowabhi ikhosi ngenxa yeentloni.

Usuke waba sisigculelo nesothuso kwabo bamngqongileyo uMowabhi.”

₄₀Utsho uNdikhoyo ukuthi:

“Khangela ukhozi luyandanda,

lutweze amaphiko phezu koMowabhi.

₄₁Iidolophu ziza kuthinjwa,

iinqaba zakhona zihluthwe.

Ngaloo mini intliziyo yamagorha akwaMowabhi

iya kuba njengentliziyo yomfazi ophethwe yinimba.

₄₂UMowabhi uza kuphanziswa angabi saba sisizwe,

kuba eziphakamisile phambi koNdikhoyo.

₄₃Ufikelwe kukunkwantya nomhadi nomgibe, wena mmi waseMowabhi.”

Lowo ngumlomo kaNdikhoyo.

₄₄“Obaleka ngenxa yokunkwantya weyela emhadini;

ophuma emhadini, ubanjiswa ngumgibe.

Konke oko ndiza kukuhlisela uMowabhi ngonyaka wokumohlwaya kwam.”

Lowo ngumlomo kaNdikhoyo.

₄₅“Iimbacu zema emathunzini eHeshbhon zityhafile,

kuba kusuke kwaqhambuka umlilo kuloo Heshbhon.

Kulenya amadangatye kwaSihon;

atshisa ibunzi labakwaMowabhi,

nokhakayi lwabaqhankqalazi abenza ingxolo.

₄₆Yehaa kuwe, Mowabhi!

Batshabalele abantu bakaKemoshe,

kuba umlisela nomthinjana wakho usiwe ekuthinjweni.

₄₇“Kambe ke, kwimihla ezayo ndombuyisela kundalashe uMowabi,

adle ngendebe endala.”

Lowo ngumlomo kaNdikhoyo.

“Akananyana na uSirayeli?

Akanandlalifa na?

Kutheni uMilikom elithimbile ilifa likaGadi?

Kutheni iidolophu zakwaGadi zimiwe ngabantu bakaMilikom?”

₂Kambe ke, nguwo lo umlomo kaNdikhoyo:

“Niyabona, iyeza imihla

endiya kuyihlabela umkhosi iRabha yama-Amon.

Iya kuba yimfumba yamabhodlo,

iilali zayo zitshiswe ngomlilo.

Ewe, uSirayeli uya kubagxotha abo babemgxothile.”

Utsho uNdikhoyo.

₃“Yenza isijwili, wena Heshbhon,

kuba iAyi ibhuqiwe.

Khalani, zilali zaseRabha;

bhinqani ezirhwexayo nizile.

Zula-zulani nididekile,

kuba uMilikom uya kuthinjwa,

nditsho yena kunye nababingeleli neziphathamandla zakhe.

₄Kutheni niqhayisela ngeentili zenu,

iintili zenu ezichumileyo?

Hayi bo, bantundini abakreqayo,

abakholosa ngobutyebi babo!

Nithi: ‘Ngubani onokusihlasela?’

₅Niyabona, ndiza kunihlisela unkwantyo

luvela kubantu abaningqongileyo.”

Lowo ngumlomo weNkosi uNdikhoyo onamandla onke.

“Niya kuchitha-chithwa,

elowo asabe ngeyakhe indlela,

kungabikho bani uzihlanganisayo iimbacu.

₆Kambe ke, emva koko, ndiya kumbuyisela kundalashe uAmon,

adle ngendebe endala.”

Lowo ngumlomo kaNdikhoyo.

“Akusekho bulumko na kwaTeman?

Sezaphelelwa ngamacebo na iingqondi?

Sebutshitshile na ubulumko bazo?

₈Jikani nisabe, nizimele kwimiqolomba emnyama, nina bemi bakwaDedan.

Ndiza kumhlisela ishwangusha uEsawu,

kuba lifikile ixesha lokuba ndimohlwaye.

₉Andithi xa kuvunwa iidiliya ubakho umbhikico oshiyekayo?

Andithi xa kufika amasela ebusuku ayeba ade anele?

₁₀Kodwa mna ndiya kumhluba konke anako uEsawu,

ndimkhuphulule kwezo ndawo azimele kuzo,

angabi nako tu ukufihlakala.

Uya kucinywa igama yena nenzala yakhe,

angabi saba nabo abazalwana nabamelwane.

₁₁Zishiyeni iinkedama zenu – ndiya kuzondla;

kwanabahlolokazi benu mabakholose ngam.”

₁₄Ndive udaba, luvela kuNdikhoyo,

kuthunywe isigidimi ezintlangeni ukuthi:

“Hlanganani, nilungele imfazwe;

qulani, nizimisele ukuyihlasela.”

₁₅“Edom, ndiza kukwenza ube mncinane ezintlangeni,

udeleke ebantwini.

₁₆Ulahlekisiwe kukoyikeka kwakho nalikratshi lakho,

wena omi ezimfanteni zeengxondorha,

wena ohleli kwiincopho zeentaba.

Nokuba uyakhe phezulu indlu yakho,

yaxela eyokhozi,

ndokuthula apho.”

Lowo ngumlomo kaNdikhoyo.

₁₇“Uya kuba sisothuso uEdom.

Bonke abadlulayo baya kuthi makatha,

baphoxise ngenxa yokubhukuqwa kwakhe.

₁₈Nqwa nokubhukuqwa kweSodom neGomora needolophu ezingqongileyo

kuya kuba njalo ukubhukuqwa kwelamaEdom –

akuyi kuba sabakho bani uhlala khona,

kungabikho kwamphambukeli apho.”

Utsho uNdikhoyo.

₁₉“Njengengonyama ephuma kwiintshinyela zamatyholo aseJordan,

isiya emadlelweni ahlala eyokozela,

kuya kuba njalo ukumgxotha kwam ngephanyazo kwelakowabo uEdom.

Ngubani na onyuliweyo nendiya kumalatha ukuze andenzele oku?

Kakade ngubani na onjengam onokumelana nam,

ingubani umalusi onokuxaba endleleni yam?

₂₀Ke ngoko liveni icebo likaNdikhoyo alicebileyo nge-Edom,

izigqibo zakhe agqibe ngazo ngokubhekiselele kubemi bakwaTeman.

Inene, namatakane aya kuqwengwa,

umhlambi uthi khumnqa ngenxa yawo.

₂₁Ihlabathi liya kunyikima sisithonga sokuwa kwabo.

Isandi sokukhala kwabo siya kuvakala de kuye kutsho kuLwandle oluBomvu.

₂₂Khangela, ukhozi luyantinga lundande;

lutweza amaphiko phezu kweBhozera.

Ngaloo mini intliziyo yamagorha akwaEdom

iya kuba njengentliziyo yomfazi ophethwe yinimba.”