Bible Reading Plan – Day 124

₁*Ndikhoyo, ndibhenela kuwe; nceda ndivelele.

Khawubek' iindlebe, usabele ndakukhala.

₂Umthandazo wam mawube sisiqhumiso kuwe,

ukuphakama kwezandla zam kube ngumnikelo wamatshona.

₃Ndikhoyo, wumisele umlindi umlomo wam;

imilebe yam mayihlale yalusiwe.

₄Ndenze ndikucezele ukwenza ububi,

ndingazixakekisi ngezenzo zenkohlakalo,

ndingahambisani nabantu abakhohlakeleyo.

Mandingaze ndizixhamle izimuncu-muncu zabo.

₅Noba lingandohlwaya ilungisa – yinyhweba leyo;

nokuba liyandikhalimela – yintsikelelo leyo;

ewe, andinakuphikisana nayo.

Umthandazo wam uchasene nezenzo zamatshijolo.

₆Iziphathamandla ke zophoswa emaweni;

izikhohlakali ke zona zotsho ziqonde,

zivume ukuba amazwi am afanelekile.

₇Bosuka baphoxise ke bathi:

“Kutsho kwangathi kuyakhutyelwa,

namathambo ethu nango ethe saa;

ewe, athe xhaxhe ngamangcwaba.”

₈Ke mna ndijonge enkalweni

kuwe, Ndikhoyo, Thixo wam.

Ndilangazelela ukukhuselwa nguwe;

ungandishiyi ndisesichengeni.

₉Ndihlangule kwimigibe abandibekele yona,

nakuzo izabatha zabakhohlakeleyo.

₁₀Abakhohlakeleyo mababanjiswe kwayimigibe yabo,

mna ke ndingabi nawo nomkrwelo.

₁Ndiyabhomboloza, ndizibika *kuNdikhoyo;

ndiyahlahlamba, ndibhenela kuNdikhoyo.

₂Ndiphokoza isikhalo sam phambi kwakhe;

ndimbikela zonke iingxaki zam.

₃Ndakuba ndidakumbile yena uyayazi imeko yam.

Iintshaba zindithiyisela endleleni yam.

₄Ndakukhangela ngasekunene, akakho ozidubayo ngam;

ayikho indawo yokuzimela,

kungekho namntu undikhathaleleyo.

₅Ndibhenela kuwe, Ndikhoyo;

kaloku wena uyinqaba yam,

nguwe ibango lam kweli lizwe.

₆Sibazele iindlebe isikhalo sam,

kuba kaloku ndixhwalekile.

Ndihlangule kwabo banditshutshisayo;

kaloku bona bomelele kunam.

₇Ndikhulule kula makhamandela,

ukuze ndilibonge igama lakho.

Amalungisa aya kundiphahla,

kuba wena undithamsanqele.

₁Wuphulaphule umthandazo wam, *Ndikhoyo;

sive isikhungo sam.

Wena uthembekile, ulilungisa; nceda undiphendule.

₂Musa ukusixoxisa isicaka sakho;

kaloku akukho bani umsulwa phambi kwakho.

₃Kaloku utshaba luthene mbende nam;

lundixushe lwada lwandishikixa.

Lundivalele kwamnyama-ndawo,

ndanga ndingowafa kudala.

₄Xa kungokunje ndiyayoba;

intliziyo yam iyangcungcutheka.

₅Ndikhumbula imihla yamfamlibe,

ndicamanga ngezinto ozenzileyo,

ndiphicotha imisebenzi yezandla zakho.

₆Ndizolulela kuwe izandla zam;

ndikunxanele njengomhlaba owomileyo.

₇Nceda usabele, Ndikhoyo;

umoya wam ufadalele.

Hayi, musa ukundifulathela,

hleze ndifane nâbo baya enzonzobileni.

₈Ububele bakho mandibuve kwakusasa;

kaloku mna ndikholosa ngawe.

Ndifundise indlela endifaneleyo;

kaloku mna ndizibika kuwe.

₉Ndikhoyo, ndihlangule ezintshabeni zam;

kaloku mna ndizimela ngawe.

₁₀Wena unguThixo wam,

ngoko ke ndifundise ukuthanda kwakho.

UMoya wakho wobubele

makandikhokelele endleleni esisithabazi!

₁₁Ndikhoyo, ngenxa yesidima sakho ndihlaziye,

ngenxa yobulungisa bakho ndihlangule ekuxinanisweni.

₁₂Ngenxa yezibele zakho nceda uzinqamle iintshaba zam.

Batshabalalise abanditshutshisayo;

kaloku mna ndisisicaka sakho.

₁Makabongwe *uNdikhoyo ondikhuselayo,

yena ondiqeqeshela idabi,

andenze ndiyiqulele imfazwe.

₂Yena ulixhadi nenqaba yam,

umqolomba nomhlanguli wam,

umkhuseli endincathama ngaye.

Izizwe uzifaka phantsi kwam.

₃Awu, Ndikhoyo, yaz'ba kuxa eyintoni na umntu

le nto ude uzidube ngaye?

Ngani ukuba ude uzikhathaze ngaye?

₄Umntu ufana nqwa nomphunga,

imihla yakhe injengesithunzi sisiya kusithela.

₅Wakuwashukumisa amazulu, Ndikhoyo,

suka akhahleleke phantsi.

Wakuzichukumisa iintaba zithuquza umsi.

₆Lekuza ngemibane, ubasarhaze;

binza ngeentolo batsho baduba-dubeke.

₇Yolula isandla sakho kweliphezulu,

undonyule ndiphume kulo mgxobhozo.

Ndihlangule esandleni seentlanga

₈ezimilomo impompoza ubuxoki,

ezifunga ubuqhophololo.

₉Thixo wam, ndiya kukudumisa ngengoma entsha;

ndiya kukuculela ngekatala.

₁₀Ngumavathis' ookumkani ngoloyiso,

umhlanguli kaDavide isicaka sakhe.

Ndisindise kwikrele lezikhohlakali;

₁₁ndihlangule esandleni seentlanga

ezimilomo impompoza ubuxoki,

ezifunga ubuqhophololo.

₁₂Oonyana bethu ebutsheni babo

banga banganjengezityalo eziyokozelayo;

iintombi zethu zibe njengamatye akroliweyo

alungiselelwe ukuvathisa ibhotwe.

₁₃Akwaba bangaphuphuma oovimba bethu,

bazale ziintlobo ngeentlobo zesivuno.

Akwaba zingazala amawaka iigusha zethu,

zande ngamawaka aphindwe kalishumi emaphandleni.

₁₄Ngamana zathatha iimazi zethu zeenkomo;

zingemi ngenxa yokuphunza.

Ngamana akungebikho zimbonono ezitalatweni zethu;

ewe, singaphithizeliswa kukuthinjwa.

₁₅Hayi uyolo lwabantu abayixhamlayo le ntsikelelo!

Sinenyhweba kambe isizwe esiThixo waso unguNdikhoyo!

₁Ndiya kukuncoma, Thixo ongukumkani wam;

igama lakho ndolibonga nanini nanini.

₂Ndiya kukubulela mihla le;

igama lakho ndolidumisa kude kuse ephakadeni.

₃Ngenene *uNdikhoyo yingangalala, ufanele ukudunyiswa;

obakhe ubukhulu abuphengululeki.

₄Isizukulwana siya kubalisela esilandelayo ngemisebenzi yakho;

siya kuzibhengeza izigigaba zakho kwisizukulwana esilandelayo.

₅Ndiya kucamngca ngemisebenzi yakho emangalisayo,

nesidima sobuqaqawuli bobungangamsha bakho.

₆Abantu baya kububhengeza ubukhulu bezenzo zakho ezikhwankqisayo,

ndaye ndiya kububabaza ubukhulu bakho.

₇Baya kuluxela udumo lokulunga kwakho;

ewe, baya kutsholoza bencoma ubulungisa bakho.

₈UNdikhoyo unesisa, yaye enovelwano.

Yena unomonde; uyimvuze-mvuze bububele.

₉UNdikhoyo uyabalungiselela bonke abantu;

unemfobe ngazo zonke izinto azenzileyo.

₁₀Zonke izinto ozenzileyo ziya kudomboza zibulele, Ndikhoyo;

imilowo yakwakho iya kukudumisa.

₁₁Baya kuyibhengeza indili nesidima solawulo lwakho;

amandla akho aya kuba ngundaba-mlonyeni,

₁₂ukuze uluntu luzazi izigigaba ozenzileyo

kwanesidima nobuqaqawuli bolawulo lwakho.

₁₃Ulawulo lwakho alunamida yasiphelo;

ubukhosi bakho bozityhutyha zonke izizukulwana.

Ilizwi alithethileyo uNdikhoyo alidliwa nja,

yaye unesisa kuko konke akwenzileyo.

₁₄UNdikhoyo uyabaxhasa bonke abagqush' eluthulini,

abaphakamise bonke abathobekileyo.

₁₅Iinto zonke zikhangela kuye ngethemba,

ke yena uyazondla ngexesha elililo.

₁₆Ewe, yena zivulekile izandla zakhe,

izinto zonke uyazanelisa ngokweentswelo zazo.

₁₇UNdikhoyo ulilungisa ngeendlela zonke,

unobubele kuko konke akwenzayo.

₁₈UNdikhoyo ukufuphi kwabo babhenela kuye,

kwabo bamfuna benyanisekile.

₁₉Uyabahlangabeza abo bamhlonelayo;

uyasabela bakuzibika, abahlangule.

₂₀UNdikhoyo uyabalondoloza abo bamthandayo;

ke bona abakhohlakeleyo uya kubatshabalalisa.

₂₁UNdikhoyo ndiya kusoloko ndimdumisa.

Mazimdumise zonke izidalwa,

zilincome igama lakhe elihloniphekileyo;

ewe, kude kube ngunaphakade.

₁Aa! Bayethe, Mhlekazi!

Duma ukhahlele *kuNdikhoyo, mphefumlo wam!

₂Ndiya kumbonga uNdikhoyo lo gama ndisadla ubomi;

ndiya kuhlabela indumiso,

ndibonge uThixo wam bonke ubomi bam.

₃Musa ukukholosa ngamanene;

sukuthemba umntu, kuba akaloncedo.

₄Uthi akuba efile abuyele emhlabeni;

ngaloo mini buyatshitsha ubuchule bakhe.

₅Hay' inyhweba yalowo uluncedo lunguThixo kaYakobi,

lowo uthembele ngoNdikhoyo uThixo wakhe;

₆ongumenzi wamazulu nehlabathi,

ulwandle neento zonke ezilapho kulo;

yena ungajikiyo kwizithembiso zakhe;

₇umthetheleli wâbo baxhatshazwayo;

umondli wâbo balambayo.

UNdikhoyo uwathi jize ngenkululeko amabanjwa.

₈UNdikhoyo ngumvuli wamehlo eemfama,

umphakamisi wâbo bawileyo.

UNdikhoyo ngumathand' amalungisa.

₉UNdikhoyo ngumkhuseli wabahambi nabangeneleli,

umxhasi wabahlolokazi neenkedama.

Ke bona abakhohlakeleyo uyabatshabalalisa.

₁₀Kambe ke yena uNdikhoyo uya kulawula naphakade,

uThixo wakho, Ziyon, kuzo zonke izizukulwana.

Siyakhahlela, sithi: “Bayethe, Mhlekazi!”

₁Dumani nithi: “Bayethe, Mhlekazi!”

Kaloku yinto entle ukumemelela, sibonge uThixo wethu;

ewe, luyolo, kwaye kufanelekile ukumdumisa.

₂*NguNdikhoyo umakhi weJerusalem,

umqokeleli weembacu zakwaSirayeli,

₃umnyangi wabantliziyo zenzakeleyo,

ewe, umbophi wamanxeba abo.

₄Ngumqingqi wenani leenkwenkwezi;

iyileyo naleyo kuzo uyibiza ngegama layo.

₅Hay' ubukhulu bukaNdikhoyo, uyingangalala ngamandla!

Ubulumko bakhe abunamda.

₆UNdikhoyo uyabaphakamisa abagqush' eluthulini;

ke bona abakhohlakeleyo ubakhahlela phantsi.

₇Hlabelani nimombelele uNdikhoyo nibulela;

tsholozani niculele uThixo wethu ngezeengcingo –

₈umtwabululi wamafu afihl' isibhakabhaka,

nguye owabela umhlaba imvula,

ulontshulis' ingca ezintabeni,

₉umondli wezilwanyana ngokutya kwazo,

umfunzeli wamathol' ehlungulu azibikayo.

₁₀Yena akakuhoye nganto ukukhalipha kwehashe,

engabukhathalele nobungwanyalala bezitho zendoda,

₁₁koko yena uNdikhoyo uthanda abamhlonelayo,

abo bakholosa ngezibele zakhe ezingatshitshiyo.

₁₂Duma ubonge uNdikhoyo, Jerusalem!

Mbonge uThixo wakho, Ziyon!

₁₃Kaloku nguye owomeleza imivalo yamasango akho;

nguye othamsanqela abantu bakho.

₁₄Nguye omisela inzolo phakathi kwemida yakho;

ikwanguye okwanelisa ngeyona-yona ngqolowa.

₁₅Yena uthetha ngelizwi nje qha,

ngoko nangoko lityhutyhe ihlabathi.

₁₆Ukhitikisa ikhephu, libe njengoboya;

unisa iqabaka, kube mhlophe okothuthu.

₁₇Usarhaza umkhenkce, ngathi sisichotho;

ngubani onokumelana nengqele yakhe?

₁₈Uthetha ngelizwi, zinyibilike ezo zinto;

athumele umoya, kubaleke amanzi.

₁₉Ngumazisi wodaba lwakhe kuYakobi,

imithetho nezigqibo zakhe kuSirayeli.

₂₀Kwezinye izizwe zange enjenjalo,

nemimiselo yakhe aziyazi.

Dumani nithi: “Bayethe, Mhlekazi!”

₁Aa! Bayethe, Mhlekazi!

Bongan' *uNdikhoyo, nimdumise emazulwini;

mdumiseni kweliphezulu!

₂Mbongeni, nonke nina zithunywa zakhe;

mdumiseni, nani mikhosi yakhe!

₃Mbongeni, wena langa nawe nyanga;

mdumiseni, nonke zinkwenkwezi eziqaqambileyo!

₄Mbongeni, nani mazulu asemajuku-jukwini;

ewe, makube njalo nakuni, manzi angaphaya kwesibhakabhaka!

₅Ewe, mazilidumise igama likaNdikhoyo;

kaloku yena wathetha ngelizwi, zabakho ke zona.

₆Wazimisela ukuze zihlale zihleli nanini-nanini;

ewe, wazimisela umda ongasoze washukunyiswa.

₇Dumani kuNdikhoyo nalapha emhlabeni!

Nditsho kuni, bominenga, nani nonke, manzi anzongonzongo,

₈wena mlilo, nawe sichotho, khephundini, nani mafu,

nawe saqhwithi sofezekisa ilizwi lakhe.

₉Dumani, zintaba, nani zinduli,

mithi yeziqhamo, nani nonke misedare!

₁₀Mbongeni, nina marhamncwa, nani nonke zinkomo,

nina zinto zirhubuluzayo, nani zintaka ziphaphayo!

₁₁Khahlelani, zikumkani zehlabathi, nani nonke zizwe,

matshawe, nani nonke zinxiba-mxhaka zehlabathi!

₁₂Dumisani xa ninonke, mlisela kwanani mthinjana;

yenzani njalo, maxhego kwanani bantwana!

₁₃Ewe, mabalibonge igama likaNdikhoyo;

kaloku yena ngugama-khulu.

Ke bona ubungangamsha bakhe

bulivelele ihlabathi ndawonye namazulu.

₁₄Ewe, abantu bakhe ubathe jize ngodumo nobungangamela,

ke yona imilowo yakhe ithwel' intshinga yendumiso –

nditsho amaSirayeli, isizwe esisenyongweni kuye.

Masitsho sonke sithi: “Bayethe, Mhlekazi!”

₁Aa! Bayethe, Mhlekazi!

Memelelani niculele *uNdikhoyo ingoma entsha

abongwa ngayo ebandleni lakhe labanyanisekileyo!

₂USirayeli makagcobe agcolode ngoMdali wakhe;

oonyana beZiyon mabachulumache ngoKumkani wabo.

₃Mabadude bamdumise bememelela,

betsholoza bembonga ngegubu nekatala.

₄Kaloku uNdikhoyo akaziva ngosapho lwakhe;

abazithobayo ubathi jize ngoloyiso!

₅Imilowo yakhe mayitaka-take ngemincili;

mayimemelele ngemihlali naxa ilalayo;

₆mayitsho ngentsholo idumisa uThixo,

amakrele abazwe macala esezandleni,

₇ukuze iphakele iintlanga impindezelo,

ixhaphaze izizwe ngesohlwayo,

₈ibasonge ibakhonkxe ookumkani ngamakhamandela,

zona izikhulu zabo izikhuleke ngemixokelelwana,

₉khon' ukuze ifezekise isigwebo sikaThixo phezu kwabo.

Nântso ke intshinga yemilowo yakhe.

Masikhahlele sithi: “Bayethe, Mhlekazi!”

₁Sithi: “Bayethe, Mhlekazi!”

Khahlelani, nimbonge uThixo endlwini yakhe engcwele;

mdumiseni ngenxa yamandla akhe esibhakabhakeni.

₂Mbongeni ngenxa yemisebenzi yobugorha bakhe,

nimdumise kuba yena usisihandiba sesikhulu!

₃Yitshoni ngomtyangampo wexilongo nimdumise;

yombelani nimbonge ngomrhubhe nehapu!

₄Dumisani nimbonge ngegubu nomdudo;

ngqungqani nimbonge ngezeengcingo nesigodlo!

₅Tshilani nimbonge ngamacangci akhenkcezayo;

yitshoni ngentswahla nimdumise ngamacangci ahlokomayo!

₆Ewe, konke okushukumayo makudume kubonge *uNdikhoyo!

Masidanduluke sonke sithi: “Bayethe, Mhlekazi!”