Bible Reading Plan – Day 114

₁Iintshaba ziwuhlasele umhlaba wakho, Thixo;

ziyixabhele indlu yakho engcwele,

iJerusalem itsho yalinxuwa.

₂Imizimba yezicaka zakho kukutya kweentaka,

izidumbu zazo zityiwa ziinyamakazi.

₃Igazi lazo laphalala njengamanzi,

laba ngumgxobhozo ojikelez' iJerusalem,

kungekho bani wokuzifihla.

₄Sesiyintlekisa kubamelwane;

bayakrwecana bephoxisa ngathi.

₅Koda kube nini, *Ndikhoyo?

Uya kusoloko ucaphukile?

Lohlala livutha ikhwele lakho?

₆Wugalele ezintlangeni umsindo wakho,

kwabo bangakukhathalelanga wena,

kwizikumkani ezingakunquliyo.

₇Kuba bamqwengile uYakobi,

babhuqe bavuthulula konke.

₈Ungasixhibi ngenxa yezono zoobawo;

nceda velana nathi kuba siphelelwe.

₉Khawuncede usisindise, Thixo wethu,

ngenxa yesidima segama lakho.

Sihlangule usixolele amatyala ethu ngenxa yegama lakho.

₁₀Ngani ukuba iintlanga zide zithi:

“Uphi lo Thixo wabo?”

Liphindezele igazi lezicaka zakho;

masikubone uzohlwaya iintlanga.

₁₁Yive incwina yâbo bathinjiweyo;

ngaloo mandla akho basindise abo bagwetyelwe ukufa.

₁₂Babuyisele kasixhenxe abamelwane

ngenxa yezenyeliso abakuthuka ngazo, Mhlekazi.

₁₃Ke thina bantu baziigusha ozalusayo

siya kukubulela njalo-njalo;

ewe, soze sipheze ukukuncoma!

₁Khawubek' iindlebe, malusi kaSirayeli!

Wena makhokel' uJosefu njengomhlambi,

wena osesihlalweni *ngakwizithunywa ezimaphiko,

₂khanya kwaEfrayim nakwaBhenjamin nakwaManase;

ngaloo mandla akho yiza usisindise.

₃Awu, Thixo, yiba nebuyambo;

velana nathi usisindise!

₄*Ndikhoyo Thixo onamandla onke,

koda kube nini ungayamkeli imithandazo yabantu bakho?

₅Wena usondle ngeentsizi,

wasiseza iinyembezi.

₆Usitsho abamelwane baxhwithana ngathi;

ngoku iintshaba zihlekisa ngathi.

₇Awu, Thixo Somandla, yiba nebuyambo;

velana nathi usisindise!

₈Wena weza nomdiliya eJiputa,

wazigxotha iintlanga, watyala wona.

₉Walima wawulungiselela umhlaba,

wamila waxanda emhlabeni wonke.

₁₀Ithunzi lawo lafikelela ezintabeni,

lawagquma amasebe emisedare.

₁₁Amasebe awo afikelela elwandle,

iingcambu zafikelela e-Efrati.

₁₂Uludilizeleni ke uthango lwawo,

abadlulayo sebegqwathula iziqhamo nje?

₁₃Ngoku sewunqunqudwa nayingulube;

iinyamakazi zizifikisela kuwo.

₁₄Khawusivelele, Thixo onamandla onke;

khawuphos' amehlo uzibonele, uwuhlangule umdiliya.

₁₅Nditsho isebe owalityalayo,

ewe, elo latyalwa zizandla zakho.

₁₆Bawugecile baza bawutshisa;

batshabalalise ngomsindo wakho.

₁₇Kodwa ke basindise abantu bakho abayinqobo,

abo uzomelezele bona.

₁₈Thina ke soze sabuya mva;

sihlaziye saye sohlala sikudumisa.

₁₉Awu, Thixo Somandla, yiba nebuyambo;

velana nathi usisindise!

₁Dandulukani ngovuyo, nibonge uThixo osikhuselayo;

memelelani nidumise uThixo kaYakobi.

₂Hlabelani nitsho ngohadi;

dlobani ngoncuthu lweehapu neekatala.

₃Vuthelani ixilongo ukuthwasa kwenyanga,

nasekuhlanganeni kwenyanga mhla ngetheko.

₄Kaloku lowo ngummiselo wakwaSirayeli,

lisiko loThixo kaYakobi.

₅Walenza langummiselo kwaSirayeli,

mhla wahlasela elamaJiputa.

Ndiva ilizwi endingaliqondiyo, lisithi:

₆“Ndawothula umthwalo owawusemagxeni enu,

zaxibilika iingobozi ezandleni.

₇Nakhala ngomhla wengxingongo, ndanihlangula;

ndaniphendula ndingabonakali ndisezindudumeni;

ndanivavanya emthonjeni waseMeribha.

₈“Ndathi sigqaleni isilumkiso sam, bantu bam;

Sirayeli, akwaba ubuya kundiva!

₉Ze ningamnquli *uthixo wesinye isizwe;

ongomnye eningamaziyo ze ningamnquli.

₁₀Ndim mna *Ndikhoyo uThixo wenu

owanikhuphayo kwelamaJiputa;

khamisani, mna ndiza kunifunza.

₁₁“Phi ke! Abantu bam zange baphulaphule;

abafunanga nokuva oku ngam.

₁₂Ndaza ke ndabayekela kwezo nkani zabo,

ukuze benze ngokuthanda kwabo.

₁₃Ngamana nandiphulaphula, bantu bam;

akwaba ubungandithobela, Sirayeli.

₁₄Bendingazigeqayo iintshaba zakho;

ewe, bendiya kuzinyhasha iintshaba zakho.

₁₅Abamthiyileyo uNdikhoyo bebeya kushwabana,

isigwebo sabo sibe ngumlibe.

₁₆Bendiya kunondla ngeyona-yona ngqolowa,

ndinanelise ngobusi obupholileyo.”

₁UThixo uchophele intlanganiso *yoothixo;

nguye olawulayo koothixo bonke;

₂uthi: “Kunini nilawula ngegobe,

nibabonelela abakhohlakeleyo!

₃Khanilungiselele abaxakekileyo neenkedama,

nibonelele iintsizana namahlwempu.

₄Khanikhulule abahlelelekileyo nama-athalala;

bahlanguleni abagonyamelwa zizikhohlakali.

₅“Basemnyameni ombode-mbode;

bayafathula njengempumputhela,

nangona lona ihlabathi lizama-zama.

₆Ndithi: Ewe kambe, ningoothixo;

nonke ningoonyana bakaPhezukonke.

₇Kambe ke niya kufa njengamntu wonke,

nibhange njengamatshawe.”

₈Awu, Thixo, khawulingenele ngomgwebo ihlabathi;

andithi kaloku zonke izizwe zisesandleni sakho!

₁Awu, Thixo, ungathini ukuthi cwaka?

Ngani ukuba wonwabe, Thixo?

₂Nâzo iintshaba zakho zikuvukela.

Nâbo abakuthiyileyo bephithizela.

₃Ewe, babenzela amayelenqe abantu bakho;

badibene ngabo abo ubakhuselayo.

₄Bathi: “Yizani sisibhangise esi sizwe,

uSirayeli angabi sakhunjulwa.”

₅Kaloku bona bathetha nto-nye,

bevana ngawe ngegobe.

₆Nditsho amaEdom namaIshmayeli,

amaMowabhi kunye namaHagare,

₇amaGebhali, ama-Amoni, nama-Amaleki,

amaFilistiya nabemi baseTire.

₈Angenelele nama-Asiriya,

bebonke bancedisana nenzala kaLothe.

₉Khawubafumanise esamaMidiyan

ngomhla kaSisera noJabhin entlanjeni iKishon,

₁₀abatshabalela e-Endore,

banyhashwa batsho bangumgquba.

₁₁Iinjengele zabo zifanise no-Orebhe noZebhe;

amatshawe abo wanyhashe njengoZebha noZalmuna.

₁₂Kaloku bona bafuna ukuwohlutha

umhlaba wabantu olibango likaThixo.

₁₃Thixo wam, baphephethe njengothuli,

babe njengomququ ophetshethwa ngumoya.

₁₄Mabatshayelwe okwehlathi lilenywa ngumlilo,

okweentaba zibhuqwa ngumlilo.

₁₅Ewe, yiba sisitshu emva kwabo,

barhwaqelise ngesaqhwithi.

₁₆Mabambatshe bade banyoshoze,

ukuze badane bakulangazelele, *Ndikhoyo.

₁₇Baswantsulise, bahlale bengcungcutheka;

ewe, mabafele ehlazweni.

₁₈Mabavume ukuba nguwe wedwa onguNdikhoyo,

uPhezukonke obhijel' ihlabathi jikelele.

₁Hay' ubuhle nokuthandeka komzi wakho,

*Ndikhoyo onamandla onke.

₂Umphefumlo wam uzele lulangazelelo;

ewe, ulangazelela inkundla yakwakho, Ndikhoyo.

Ndiyamemelela ndicula ngochulumacho,

ndidumisa uThixo ophilayo.

₃Namasomi azakhela iindlwana zawo khona;

kwaneenkonjane zifumana ikhaya khona.

Amathole azo ziwagcina *esibingelelweni sakho,

Ndikhoyo onamandla onke, wena kumkani noThixo wam.

₄Hay' ithamsanqa lâbo bahlala endlwini yakho,

abasoloko bentyiloza bememelela bebonga wena.

₅Hay' ithamsanqa labantu abaxhotyiswa nguwe,

abasoloko belangazelela ukuya eZiyon.

₆Bathi xa bedlula kwelibharhileyo

kutsho kugqabhuke imithombo,

iimvula zokuqala zilitsho lithi thande ngamaqula.

₇Baya besomelela ngokomelela,

bade bavele phambi koThixo eZiyon.

₈Ndikhoyo, Thixo Somandla, wuve umthandazo wam;

ndiphulaphule, Thixo kaYakobi.

₉Thixo, mbone ukumkani wethu;

mvelele umamkele umthanjiswa wakho.

₁₀Imini enye echithelwe kwakho, Thixo,

ingaphezulu kwewaka lemihla echithwe ndaweni yimbi.

Kubhetele ndibe ngumgcini-mnyango kwaThixo

ndaweni yokungqendeva phakathi kwezaphula-mthetho.

₁₁Kaloku uNdikhoyo uThixo ngumkhuseli nelanga lethu;

usithi jize ngendili nangobubele.

UNdikhoyo akazibandezi izinto ezintle

kwabo bamthobela ngokupheleleyo.

₁₂Hay' ithamsanqa lomntu okholosa ngawe,

Ndikhoyo onamandla onke!

₁Ewe, *Ndikhoyo, ulazelelele eli lizwe;

uYakobi umthe jize ngendyebo nenkqubela.

₂Ubaxolele abantu bakho ngobugwenxa babo;

ubuye wazilibala izono zabo.

₃Ubuye wayibamba ingqumbo yakho;

uphinde wathomalala umsindo wakho.

₄Yiba nebuyambo, Thixo, usisindise,

ungabi sakhathazeka sithi.

₅Ngani ukuba ungabi saphela umsindo wakho?

Koda kube zizizukulwana ucaphukile na?

₆Nceda ubuye usihlaziye,

abantu bakho bagcobe ngawe.

₇Maziphuphumele kuthi izibele zothando lwakho;

awu, Ndikhoyo, sithi jize ngenkululeko yakho.

₈Mandiweve amazwi kaNdikhoyo uThixo;

kaloku uzisa uxolo kubantu bakhe,

kwabo bayimilowo yakhe engajika-jikiyo.

₉Ngenene usindiso lwakhe lukufuphi kwabo bamthobelayo;

nobungangamsha bakhe bohlala kweli lizwe.

₁₀Kodibana uthando nokunyaniseka,

ubulungisa noxolo bulale ngengub' enye.

₁₁Ukunyaniseka kuya kuntshula emhlabeni;

ubulungisa bona boqwalasela busesibhakabhakeni.

₁₂Ewe, uNdikhoyo wosithi jize ngenkqubela,

lona ilizwe lethu libe yintombazana.

₁₃Yena uya kukhokelwa bubulungisa;

ewe, buya kumgabulela izigcawu.