Bible Reading Plan – Day 112

₁Awu, khawuncede undihlangule, Thixo!

Khawuleza, *Ndikhoyo, undincede!

₂Mabadane badideke abandizondayo;

mabarhoxe baphoxeke abazungula ukundenzakalisa.

₃Mabajike benyoshoza abo bathi tshotsho vityo.

₄Abakulangazelelayo mabavuye bagcobe ngawe;

abaluthandayo usindiso lwakho mabangaphezi ukuthi:

“Huntshu – uyingangalala uThixo!”

₅Ke mna ndilihlwempu, ndiludwayi;

awu, Thixo, khawundivelele!

Umncedi nomhlanguli wam nguwe;

sukuba saphozisa maseko, Ndikhoyo!

₁*Ndikhoyo, ndizimela ngawe, mandingaze ndidaniswe.

₂Njengokuba ulilungisa, ndihlangule undisindise;

ndiphulaphule, undikhulule.

₃Yiba ngumqolomba wokuzimela;

yiba yinqaba endiphephela kuyo.

Thetha ngezwi ndikhuseleke;

kaloku uligwiba elindikhuselayo.

₄Thixo wam, ndihlangule kwabakhohlakeleyo,

ndingabanjwa ngabagwenxa nezikhohlakali.

₅Kaloku ithemba lam nguwe, Nkosi;

ndakholosa ngawe ndisengumntwana, Ndikhoyo.

₆Ndaqamela ngawe kwasekuzalweni;

ndakhutshwa nguwe kumama.

Ndiya kukubonga njalo-njalo.

₇Ndisisimanga kwabaninzi,

kodwa ke wena uyandikhusela.

₈Ndiswel' imilomo yokukubonga,

ndikudumise maxa onke.

₉Ungandilahli ndakuguga;

ungandishiyi ndakuphelelwa ngamandla.

₁₀Iintshaba zifakan' imilomo ngam;

abandizungulayo bayacebisana.

₁₁Bathi: “Ulahliwe nguThixo.

Masimsukele simgxagxamise.

Akukho uya kumhlangula.”

₁₂Sondela kum, Thixo!

Khawuleza undincede, Thixo wam!

₁₃Abandihlaselayo mabahlazeke babhubhe.

Ngamana baphoxeka bahlazeka

abazungula ukundenzakalisa.

₁₄Ndiya kuthembela kuwe rhoqo,

ndikubonge njalo-njalo.

₁₅Ndiya kububhengeza ubulungisa bakho,

ndihlale ndiluvakalisa usindiso lwakho

nakuba lungenakuphicothwa.

₁₆Ndize kukudumisa, Mhlekazi Ndikhoyo,

ngenxa yamandla akho,

ndikubonge ngobulungisa obungakanana.

₁₇Wandifundisa kwasebuncinaneni, Thixo.

Unangoku ndisayincoma imisebenzi yakho,

kuba iyamangalisa.

₁₈Nangona ndiyingwevu nje, sukundilahla, Thixo,

ndide ndiwabhengeze amandla akho

nakwizizukulwana ezizayo.

₁₉Amandla nobulungisa bakho, Thixo,

bufikelela emazulwini.

Kambe zinkulu izinto ozenzileyo.

Awu, Thixo, akakho onjengawe!

₂₀Undithubelezise ezinkathazweni ezininzi;

kambe ke uya kundihlangula ekufeni,

undikhuphe emathunjini omhlaba.

₂₁Uya kundizimasa, undithuthuzele kwakhona.

₂₂Ndiya kubeth' ihapu ndikubonge,

kuba uthembekile, Thixo wam.

Ndobeth' ikatala ndikudumise,

wena Ngcwele kaSirayeli.

₂₃Ndiya kumemelela ndinemincili,

ndicule ngokuzimisela okukhulu

ngenxa yokuba undihlangule.

₂₄Ndiya kubalisa ngobulungisa bakho,

ndithethe ngabo ndingaphezi,

kuba abo babezama ukundenzakalisa

bahlazisiwe batsho baphoxeka.

₁Mthi jize ngobulumko bokulawula ukumkani, Thixo;

mabele ukunyaniseka kwakho umntwan' egazi;

₂ukuze abaphathe ngobulungisa abantu bakho,

abalawule ngokubazelelela abahlelelekileyo.

₃Mazihlaziyeke iinduli neentaba ziqhame;

makube yinzolo inkqubela nobulungisa.

₄Ngamana yena wawakhusela amahlwempu,

abancede abo bahlelelekileyo,

abanyhashe abacinezeli.

₅Abantu mabambuse bamkhonze

xa lisaman' ukuvela ilanga,

lo gama isakhanyisa nenyanga,

kuye kwizizukulwana ngezizukulwana.

₆Makabe njengemvula emasimini,

abe njengomvimbi emhlabeni.

₇Makande amalungisa ngemihla yakhe;

ewe, axhamle inzolo de ingabi sabikho inyanga.

₈Ngamana olwakhe ulawulo

lwasuka elwandle lwesa elwandle,

lusuke emlanjeni iEfrati

luse eziphelweni zehlabathi.

₉Ngamana baqubuda kuye abasentlango,

iintshaba zakhe zity' umhlaba.

₁₀Ngamana ookumkani baseTashishe nabeziqithi bakhuph' imirhumo,

abaseSheba nabaseSebha bakhuph' isithabathaba.

₁₁Bonk' ookumkani mabakhahlele kuye,

zonk' izizwe zimbuse.

₁₂Uyabahlangula abakhalayo,

amahlwempu nabangenabani.

₁₃Uyavelana nababuthathaka neentsizana,

abasindise abahlelelekileyo.

₁₄Ubakhulula kwingcinezelo nakwizibhovubhovu;

kuye lixabisekile igazi labo.

₁₅Kuye sithi: “Mpilo-nde-ntle!”

Mayize kuye igolide yaseShebha;

makathandazelwe njalo-njalo,

iintsikelelo zihlale zivuza phezu kwakhe.

₁₆Ngamana kwayindyebo emhlabeni,

neencopho zeentaba ziqhame,

kuchume njengaseLebhanon.

Mabanyakazele abantu ezixekweni,

baxel' ingca emadlelweni.

₁₇Igama lakhe malingaze liphele;

malibe sisimakade lixel' ilanga.

Ngamana bonk' abantu bamdumisa;

ewe, mabamnqwenelele iintsikelelo,

zonk' izizwe zimthamsanqele.

₁₈Ngamana wadunyiswa *uNdikhoyo, uThixo kaSirayeli,

ekukuphela kwakhe owenza imimangaliso enje.

₁₉Huntshu-u-u!

Masibongwe isidima segama lakhe kude kube nini nanini!

Ngamana waphuphuma umhlaba sisihomo nesithozela sakhe!

Huntshu-u-u!

₁Ngenene uThixo umphethe kakuhle uSirayeli;

ulungile kwabantliziyo zinyulu.

₂Kodwa ke mna suka ndathandabuza,

ewe, gcwizi ndityibilike,

₃kuba ndinekhwele ngabaqhayisayo,

kukubona inkqubela yabakhohlakeleyo.

₄Kaloku bona abazani nantlungu;

baphile bayimiqaba-qaba.

₅Abakhathazwa nto njengabanye abantu;

abafunyanwa zizibetho njengabanye.

₆Ngoko ke bagaxel' ikratshi;

bathi wambu ugonyamelo.

₇Badumb' amehlo kukutyeba;

iintliziyo ziphuphum' ubuqhophololo.

₈Bayangcikiva benentlamba;

baziphakamisile basongela ngengcinezelo.

₉Bangcikiva nkqu namazulu;

batheth' unothanda emhlabeni.

₁₀Ke bona abantu bayabamkela;

barhorhozela emva kwabo.

₁₁Bathi: “UThixo ngeke aqonde;

uPhezukonke ngeke asibhaqe.”

₁₂Banjalo ke abakhohlakeleyo;

abazihluphi nganto, kodwa bayahluma.

₁₃Ngani ke ukuba ndiziphathe kakuhle,

ndizigcine ndinyulu?

₁₄Kaloku andahlukani nentlupheko;

miso le ndiyohlwaywa.

₁₅Xa bendithetha kanjalo

bendingaba ndingcatsha abantu bakho.

₁₆Ndizamile ukuyiphonononga le nyewe,

kodwa suka yayinkinge kum.

₁₇Ndide ke ndabhenela engcweleni kaThixo,

ndacacelwa ke sisiphelo sabo.

₁₈Ngenene ubabeka emtyibilizini,

bawe batshabalale.

₁₉Ngephanyazo baba nesiphelo esilumezayo,

beyela bephanziswa kukunkwantya.

₂₀Nkosi, banjengephupha ekuphaphameni komntu;

ubume balo buyalibaleka akuvuka.

₂₁Ngokuya ndandibindekile,

ndikhathazekile entliziyweni,

₂₂ndandingaqondi, ndisisidenge;

ndandiziphethe njengesilwanyana.

₂₃Kambe ke ndisoloko ndikuwe;

undithe chu ngesandla.

₂₄Ewe, wena uyandithundeza;

kamva ke wondamkelela ewongeni.

₂₅Ndikholosa ngawe usemazulwini;

ungowam nje ke, andilinanze nganto ihlabathi.

₂₆Umzimba nentliziyo zingade ziphelelwe,

wona amandla am nguThixo, ulibango lam naphakade.

₂₇Abakutyeshelayo baya kubhanga;

uyabatshabalalisa abaqhankqalazi.

₂₈Kum ke kuluyolo ukuba kufuphi kuwe, Thixo.

Nkosi yam *Ndikhoyo, ndikhuselwa nguwe,

ukuze ndibalise ngemisebenzi yakho.

₁Awu, Thixo! Ngani ukuba wenjenje ukusilahla?

Awusathothi na umsindo wakho kubantu bakho?

₂Khawulikhumbule ibandla lakho owalifumana mandulo,

owalikhululayo ukuze libe lilifa lakho;

khumbula ikhaya lakho intaba iZiyon.

₃Khawuye kuloo mabhodlo;

iintshaba zabhuqa konke endlwini yakho.

₄Zabharhumla phakathi endaweni engcwele,

zaza zamisa eyazo indwe.

₅Ezo zinxosha-nxosha zabhulula konke,

ngathi ngabagawuli begec' imithi.

₆Zona izinto ezenziwe ngomthi

bazintlekeza ngooncelemba nezando.

₇Zayintumek' umlilo indawo engcwele,

zayixabhela zayidiliza indlu yakho engcwele.

₈Zathi: “Masibabhangise kuthi tu.”

Kulo lonke bazitshisa iindawo zokunqula.

₉Eyakuthi indwe ayisabonakali;

akusekho namshumayeli,

kungekho waziyo ukuba koda kube nini na.

₁₀Koda kube nini, Thixo, utshaba lungcikiva?

Lohlala lukunyelisa njalo-njalo?

₁₁Kutheni ukuba ungasincedi?

Ngani ukuba usonge izandla?

₁₂Kambe ke wena, Thixo, waba ngukumkani kwamandulo.

Uyabahlangula abantu ehlabathini liphela.

₁₃Ngaloo mandla walahlula-hlula ulwandle,

waziqhekez' intloko iingwenya,

₁₄wasintlekeza intloko isilo solwandle,

sakukutya kwelo libharhileyo.

₁₅Wena wampompozisa imithombo nemilanjana,

waza wayomisa imilambo engatshiyo.

₁₆Yadalwa nguwe imini, ngokunjalo nobusuku;

ivela kuwe inyanga, ngokunjalo nelanga.

₁₇Yamiswa nguwe imida yehlabathi;

ngokukwanjalo ihlobo nobusika.

₁₈Awu, *Ndikhoyo, khumbula ukuba iintshaba ziyakusinekela;

izibhoja ziyalingcikiva igama lakho.

₁₉Ungabayekeli ezintshabeni abantu bakho;

khumbula ngokubandezeleka kwabantu bakho.

₂₀Khawucinge ngomnqophiso wakho,

kuba eli lizwe liphethwe zizibhoja

zona zigoxa kwamnyama-ndawo.

₂₁Sukubayekela abacinezelweyo;

nawo amahlwempu neentsizana makakudumise.

₂₂Khawuvuke uhlanganise, Thixo;

izibhoja zisoloko zikungcikiva.

₂₃Sukuyilibala intsholo yotshaba lwakho,

umlembelele wengxolo yabakuchasayo.