Bible Reading Plan – Day 105

₁Mbongen' *uNdikhoyo, nina bemi baphezulu;

mnikeni isihomo nesithozela namandla.

₂Lenzelen' imbeko igama lakhe,

ninqule ningcangcazela phambi kwakhe.

₃Sivakal' emanzini elwandl' isandi selizwi lakhe;

utsho kuzongome uThixo onesithozela.

Kaloku nguNdikhoyo ogragramis' iilwandle.

₄Lindongondong' ilizwi lakhe,

ngugquma-barhwaqele ngenkqu.

₅Liwis' imisedare ilizwi likaNdikhoyo;

ndixel' imisedare yaseLibhanon.

₆Lidlobis' iLibhanon ixel' inkonyane;

litsho iSiriyon ixel' ithole lenyathi.

₇Ndith' ilizwi likaNdikhoyo litshawuz' amadangatye;

₈ndith' ilizwi likaNdikhoyo linyakamis' intlango,

ewe, nditsho intlango yaseKadeshe.

₉Litsho kungcangcazele amanxala;

litsho kuvuthuluk' amahlathi.

Batsho bathi bonk' abasendlwini yakhe: “Huntshuu!”

₁₀NguNdikhoyo olawula oozikhukula;

kaloku nguye ukumkani, koda kube nini-nini.

₁₁Wanga angabaph' amandl' abantu bakhe;

wanga angabathamsanqela abaph' inzolo.

₁Ndokudumisa, Ndikhoyo, kuba undisindisile,

akwavuma ukuba zindivuyelel' iintshaba zam.

₂Ndikhoyo, Thixo wam, ndibhenela kuwe;

kuba wena undihlangule ekufeni.

₃Wandikhupha kwelabafileyo wena, Ndikhoyo;

wandikhetha kwabo behlela emhadini.

₄Mbongen' uNdikhoyo, nina milowo yakwakhe,

nilibonge igama lakhe elingcwele.

₅Kaloku yeyomzuzwana ingqumbo yakhe;

ukanti buhlala buhlel' ububele bakhe.

Ewe, zibakho zon' iinzingo ebusuku,

kodwa kusasa kuba yimincili yodwa.

₆Xa izinto zazindilungele,

ndandidla ngokuthi: “Andisoze ndoyisakale.”

₇Ewe, ndandithe zinzi njengentaba

ngenxa yobubele bakho, Ndikhoyo.

Suka wena wasithela;

ndaza mna ndakhathazeka.

₈Kodwa ndithembele kuwe, Ndikhoyo;

ndiyazithoba kuwe, Nkosi yam.

₉Kukho nzuzoni na xa ndiye kwantshabalala?

Lunganako na ukukudumisa uthuli?

Khona lungabalisa na ngokunyaniseka kwakho?

₁₀Ndive, Ndikhoyo, undenzele inceba;

Ndikhoyo, yiba ngumncedi wam.

₁₁Wabuguqula baluvuyo ubunzima bam;

wandikhulul' ezokuzila, wandambathis' ezolonwabo.

₁₂Mandikubonge ndingayeki, Thixo wam;

ewe, ndikubonge kude kube ngunaphakade, Ndikhoyo!

₁*Ndikhoyo, ndizifihla kuwe, mandingadani konke!

Wena lungisa, uzundihlangule!

₂Ndibekele iindlebe, ukhawulez' undihlangule.

Yiba yinqaba endizimela kuyo,

nomkhuseli wam ondisindisayo.

₃Ewe, nguwe inqaba yam nekhusi lam;

ndikhokele, undithundeze, lidunyiswe igama lakho.

₄Ndikhulule kwisabatha ebendigcayiselwe ngaso,

kuba ungamandla am wena.

₅Ndiwunikela ezandleni zakho umoya wam;

kaloku undihlangule wena, Ndikhoyo, Thixo othembekileyo.

₆Ndibathiyile abo banqula izintw' ezingento;

mna ndikholosa ngawe, Ndikhoyo.

₇Ndovuya, ndigcobe ngenxa yezibele zothando lwakho,

kuba uyibonile inkxwaleko yam,

wakugqala nokungcungcutheka kwam.

₈Akundiyekelanga kwingcinezelo yeentshaba;

koko usuke wandinika inkululeko.

₉Ndenzele inceba, Ndikhoyo, ndibandezelekile.

Atsho adumba kukulila amehlo am,

nam ndiphelile kukudinwa.

₁₀Ziyandaluphaza iinkxwaleko zam,

nemihla yam iphelela ekungcungcuthekeni.

Ndiphelelwe ngamandla ngenxa yeentlupheko,

namathambo am selegugile.

₁₁Ndiyintlekisa kwiintshaba zam,

isigculelo kubamelwane bam.

Abandaziyo bayandoyika, bandibaleke,

xa badibana nam esitalatweni.

₁₂Sele ndalityalwa mpela;

ndinjengomfi ongasakhunjulwayo;

sendalahlwa kwesinomhlwa.

₁₃Ewe, ndiyivile intlebendwane yabanye;

kuthe saa luloyiko macal' onke,

lo gama bandenzela amayelenqe, beceba ukundibulala.

₁₄Kodwa ithemba lam likuwe, Ndikhoyo;

ewe, unguThixo wam wena.

₁₅Imihla yam isesandleni sakho;

ndihlangule ezintshabeni zam nakwabanditshutshisayo.

₁₆Ndisisicaka sakho, Ndikhoyo, ndikhangele ngobubele;

ndihlangule ezintshabeni zam ngenxa yezibele zakho.

₁₇Mandingadani konke, Ndikhoyo, xa ndizibika kuwe;

mabadane abantw' abagwenxa, banyoshoze baye kufa.

₁₈Watsho athi cwaka amaxoki,

wona anyelisa amalungisa ngeentetho zolunya nendelelo.

₁₉Hayi ubuhle bezinto ozigcinele abo bakuhlonelayo, Ndikhoyo;

zintle kambe izinto ozenzela abo bakholose ngawe!

₂₀Uyabakhusela ngobukho bakho kumayelenqe abantu,

ubagushe phantsi kwephiko lakho, bangagxijwa ziintshaba.

₂₁Makabongwe uNdikhoyo,

kuba undenzele ububele obungummangaliso,

xa ndandixiniwe, ndihlaselwa.

₂₂Ukothuka kwam ndathi ndilahlelwe kude nawe,

kodwa wandiva ndakuzibika kuwe.

₂₃Mthandeni uNdikhoyo, nonke nina milowo yakwakhe,

kuba uyabalondoloza abathembekileyo,

abohlwaye abanekratshi.

₂₄Qinani nibe nesibindi, nonke nina nithembele ngoNdikhoyo.

₁Hay' uyolo lwabo baluxolelweyo ukreqo lwabo nguThixo,

abo bazono zabo zingcwatyiweyo.

₂Ewe, unoyolo lowo athe *uNdikhoyo akabubalela kuye ubugwenxa bakhe,

umnt' ongenayo konke inkohliso.

₃Ndithi ndakungasivumi isono sam,

amandla atsho andiphelele,

ngenxa yesingqala endiba naso imini yonke.

₄Isandla sakho sindicinezele ubusuku nemini,

ndaphelelwa ngamandla, ngathi ndigqatswe lilanga lehlobo.

₅Ndithe ke ndakusivuma kuwe isono sam,

ndabuxela ubugwenxa bam, ndisithi:

“Ndisixela kuwe, Ndikhoyo, isono sam;”

wandixolela wena ityala lam.

₆Yiyo ke loo nto bazibikayo xa kunzima abo banyanisekileyo,

kuba ukufika komsinga abayi kugutyungelwa.

₇Wena uyinqaba endizifihla kuyo;

uyandikhusela xa ndisebunzimeni.

Undirhangqe ngosindiso lwakho;

ngoko ke ndimemelela ndinemincili.

₈Ndokwazisa indlela omawuhambe ngayo,

utsho uNdikhoyo,

ndikufundise, ndikujonge.

₉Mus' ukuba sisititsi, uxel' ihashe nembongolo,

izintw' ezilawulwa ngomkhala ukuze zingadlokovi.

₁₀Bajongene neentsizi ezininzi abantw' abagwenxa,

kodwa yena othembele kuNdikhoyo uphahlwe zizibele zakhe.

₁₁Vuyani, nina malungisa, nichwayite ngenxa kaNdikhoyo;

nina bamthobelayo uNdikhoyo, chulumachani!

₁Mdumiseni *uNdikhoyo, nina malungisa!

Ewe, afanele ukumdumisa uNdikhoyo amalungisa.

₂Mbetheleni uhadi uNdikhoyo,

nimenzele ingoma ngeehapu ezingcingo zilishumi.

₃Mombeleleni ingoma entsha uNdikhoyo;

mdlaleleni ngobuchule nimemelela.

₄Kaloku ilizwi likaNdikhoyo linyanisekile,

nemisebenzi yakhe yonke inyanisekile.

₅UNdikhoyo uyakuthanda ukunyaniseka nokulunga;

lizele ihlabathi zizibele zakhe.

₆Wathetha nje ngelizwi, akho amazulu,

wadala ilanga, inyanga, noozinkwenkwezi.

₇Wawaqokelela amanzi olwandle ngathi uwatha eselweni,

wazivalela iinzulu zolwandle ngathi kukoovimba.

₈Malimbong' uNdikhoyo lonke ihlabathi,

bamhlonele bonke abemi balo.

₉Wathetha kaloku, laza ladalwa;

wawisa umyalelo, kwatsho kwavel' indalo.

₁₀Uyawaphuthisa uNdikhoyo amayelenqe ezizwe,

awaphanzise amacebo eentlanga.

₁₁Kodwa awakhe amacebo ohlala ehleli;

zohlala zikho iingcinga zakhe kude kube nini-nini.

₁₂Sinoyolo isizwe esiThixo unguNdikhoyo,

eso asinyule sangabantu bakhe.

₁₃Wondela phantsi uNdikhoyo esezulwini,

ababone bonke oonyana babantu.

₁₄Ubaqwalasele bonke abemi behlabathi,

engqendeve kwibhotwe lakhe.

₁₅Zidalwe nguye iintliziyo zabo;

uyazazi zonke izinto abazenzayo.

₁₆Asimkhosi mkhulu ohlangula ikumkani;

asimandla agorha alisindisayo.

₁₇Akuthenjelwa ngahashe edabini,

kungemandla alo amsindisayo umntu.

₁₈UNdikhoyo uyabanakekela abo bamhlonelayo

nabo bathembe izibele zenceba yakhe,

₁₉aze abahlangule ekufeni,

abondle ngelixa lendlala.

₂₀Thina sithembele kuNdikhoyo,

kuba nguye umncedi nomkhuseli wethu.

₂₁Ewe, siya kuchulumacha ngenxa kaNdikhoyo,

kuba sithembele kwigama lakhe elidumileyo.

₂₂Ndikhoyo, senzele ububele nenceba,

njengoko kaloku sithembele kuwe.

₁Ndohlala ndimbonga *uNdikhoyo;

andisayi kuyeka ukumdumisa.

₂Ndoqhayisa ngezinto andenzele zona uNdikhoyo,

batsho bavuye abo babandezelekileyo.

₃Mbongeni uNdikhoyo, kunye nam;

masilidumise kunye igama lakhe.

₄Ndazibika kuNdikhoyo waza wandiva,

wandikhulula kuko konke ukoyika kwam.

₅Abacinezelweyo bathembela kuNdikhoyo, bagcobe;

ewe, abasayi kuze badakumbe bona.

₆Lwazibika udwayi, waluva uNdikhoyo,

walukhupha kuzo zonke iinkxwaleko zalo.

₇Bonke abahlonela uNdikhoyo isithunywa sakhe siyabakhusela, sibahlangule.

₈Khanibuxhamle ububele bukaNdikhoyo;

ngenene unoyolo umntu othembela ngoNdikhoyo!

₉Mhloneleni uNdikhoyo, nina milowo yakwakhe,

kuba abayi kuswela nto abo bamhlonelayo.

₁₀Neengonyama ziyaswela zilambe,

kodwa abo bamfunayo uNdikhoyo akukho nto intle bayiswelayo.

₁₁Yizani, lusatshana; ndiphulaphuleni;

ndonifundisa ukuhlonela uNdikhoyo.

₁₂Lowo unga angadla ubomi, abe nenkqubela,

lowo unga angafumana imihla emnandi,

₁₃makazilumle ekuthetheni kakubi,

ayeke ukuthetha ubuxoki;

₁₄makahlukane nobubi, enze okulungileyo;

makaphuthume uxolo, ahlale kulo.

₁₅Kaloku uNdikhoyo uwalusile amalungisa,

uyayiva imithandazo yawo;

₁₆kodwa ubafulathele abenzi bobubi,

abaphanzise bangabi sakhunjulwa emhlabeni.

₁₇Uyaweva amalungisa akuzibika kuye,

awakhulule kuzo zonke iinzima zawo.

₁₈UNdikhoyo ukufuphi nâbo badakumbileyo,

ebaphakamisa abo baphelelwe lithemba.

₁₉Zininzi iingxaki ezivelela ilungisa,

kodwa uyalikhulula kuzo zonke uNdikhoyo;

₂₀uwagcina onke amathambo alo,

kungaphuki nalinye kuwo.

₂₁Abantw' abagwenxa bobulawa ngobubi babo,

bagwetywe abo balithiyayo ilungisa.

₂₂UNdikhoyo wozihlangula izicaka zakhe;

bonke abakholose ngaye abayi kugwetywa.