KWABASEROMA 16

₁Ngiyamncoma kini uFebe, udadewethu oyisikhonzi sebandla laseKenikreya,

₂ukuze nimamukele eNkosini njengokufanele abangcwele, nimsize noma kuyiphi into angase ayidinge kini, ngokuba yena ubé-ngumsizi wabaningi, nowami uqobo.

₃Khonzani koPriska noAkwila, izisebenzi ezikanye nami kuKristu Jesu,

₄abadela ukuphila kwabo ngenxa yokuphila kwami, engibabongayo, kungeyimi ngedwa, kodwa namabandla onke abezizwe.

₅Khonzani nasebandleni elisendlini yabo. Khonzani kuEphenetu, isithandwa sami, ongulibo lwaseAsiya kuKristu.

₆Khonzani kuMariya owanisebenzela kakhulu.

₇Khonzani koAnidroniku noJuniya abayizihlobo zami, ababeyiziboshwa kanye nami, abaqhamileyo kubaphostoli nababekuKristu ngaphambi kwami.

₈Khonzani kuAmpiliyatu, isithandwa sami eNkosini.

₉Khonzani ku-Urbanu, isisebenzi kanye nathi kuKristu nakuStaku, isithandwa sami.

₁₀Khonzani kuAphele, othembekileyo kuKristu. Khonzani kwabakwa-Arisitobulu.

₁₁Khonzani kuHerodiyone, isihlobo sami. Khonzani kwabakwaNarkisu abaseNkosini.

₁₂Khonzani koTrifina noTrifosa abakhandleka eNkosini. Khonzani kuPersisi othandekayo, owakhandleka kakhulu eNkosini.

₁₃Khonzani kuRufu okhethiweyo eNkosini nakunina engumame.

₁₄Khonzani koAsinkiritu, noFilegu, noHerme, noPhatroba, noHerma nabazalwane abanabo.

₁₅Khonzani koFilologu noJuliya, kuNerewu nodadewabo, nakuOlimpa nakwabangcwele bonke abanabo.

₁₆Bingelelanani ngokwanga okungcwele. Ayakhonza kini onke amabandla kaKristu.

₁₇Ngiyanincenga, bazalwane, ukuba niqaphele ababanga ukwahlukana nokukhubekisa, bephambene nesifundiso enafundiswa sona nina, nahlukane nabo;

₁₈ngokuba abanjalo abayikhonzi iNkosi yethu uKristu, bakhonza isisu sabo; nangamazwi amahle namnandi bakhohlisa izinhliziyo zabangenacala.

₁₉Ngokuba ukulalela kwenu kuzwakele kubo bonke; ngakho-ke ngiyathokoza ngani, kepha ngithanda ukuba nihlakaniphe kokuhle, nibe-ngabangahlakaniphile kokubi.

₂₀Kepha uNkulunkulu wokuthula uzakumchoboza masinyane uSathane phansi kwezinyawo zenu. Umusa weNkosi yethu uKristu mawube-nani.

₂₁Uyakhonza kini uThimothewu, isisebenzi kanye nami, noLukiyu, noJasoni, noSosiphatru, izihlobo zami.

₂₂Mina-Tertiyu engilobé lencwadi ngiyakhonza kini eNkosini.

₂₃Uyakhonza kini uGayu ongingenisé kwakhe, mina nebandla lonke. Uyakhonza kini uErastu, umphathisikhwama womuzi, noKwartu umzalwane.

₂₄Umusa weNkosi yethu uJesu Kristu mawube-nani nonke. Amen.

₂₅Kuye onamandla okuniqinisa ngokwevangeli lami nentshumayelo kaJesu Kristu, ngokwambulwa kwemfihlakalo eyayifihliwe ngezikhathi zaphakade

₂₆kepha manje isibonakalisiwe ngemibhalo yabaprofethi, ngokomyalo kaNkulunkulu ongunaphakade, yazisiwe ezizweni zonke, kube-ngukulalela kokukholwa,

₂₇kuye uNkulunkulu onokwazi yedwa akube-kuye inkazimulo ngoJesu Kristu kuze kube-phakade. Amen.