AMAHUBO 20

₁UJehova makakuphendule ngosuku lokuhlupheka;

igama likaNkulunkulu kaJakobe malikuvikele.

₂Makakuthumele usizo lwasendlini engcwele,

akusekele ngamandla aseSiyoni.

₃Makakhumbule yonke iminikelo yakho yokudliwa,

awamukele umnikelo wakho wokushiswa. Sela*.

₄Makakunike njengokwenhliziyo yakho,

afeze icebo lakho lonke.

₅Siyahalalisa ngensindiso yakho,

siphakamise ibhanela* egameni likaNkulunkulu wethu;

uJehova makagcwalise zonke izicelo zakho.

₆Kalokhu ngiyazi ukuthi uJehova uyamsindisa ogcotshiweyo wakhe:

esezulwini lakhe elingcwele uyamphendula

ngamandla okusindisa esandla sakhe sokunene.

₇Abanye izinqola, abanye amahashi,

kepha thina sibonga igama likaJehova uNkulunkulu wethu.

₈Bayathoba, bawe;

kepha thina siyavuka, sime.

₉Sindisa, Jehova!

INkosi mayisiphendule ngosuku lokukhala kwethu.