UOBADIYA 1

Sizwile imibiko evela kuJehova,

kuthunyiwe isithunywa phakathi kwabezizwe ngokuthi:

Vukani, simvukele ngokulwa.

₂Bheka, ngiyakukwenza ube-mncane phakathi kwabezizwe;

udeleleke kakhulu.

₃Ukuzidla kwenhliziyo yakho kukukhohlisile

wena ohlezi emifantwini yamawa,

ondawo yakho yokuhlala iphakeme,

othi enhliziyweni yakho:

Ngubani ongangehlisela phansi na?

₄Noma uphakama njengokhozi,

kubekwe isidleke sakho phakathi kwezinkanyezi,

ngiyakukwehlisa khona, usho uJehova.

₅Uma amasela efika kuwe,

nabaphangi ebusuku —

yeka ukuchithwa kwakho —

bebengayikweba baze baneliswe na?

Uma abavuna izithelo zomvini befika kuwe,

bebengayikushiya umkhothozo na?

₆Yeka ukufunisiswa kukaEsawu,

yeka ukuphenywa kwamagugu akhe afihliweyo!

₇Bonke abantu besivumelwano sakho

bayakukuxosha emkhawulweni;

abantu ababehlalisana nawe ngokuthula bayakukukhohlisa,

bakwahlule;

abadla isinkwa sakho

bayakubeka ugibe phansi kwakho;

akakho oluqondayo.

₈Angithi ngiyakuchitha abahlakaniphileyo kwaEdomi

ngalolosuku, usho uJehova,

nokuqonda entabeni yakwaEsawu, na?

₉Amaqhawe akho, Themani, ayakuphela amandla,

ukuze yilowo nalowo anqunywe entabeni yakwaEsawu ngokubulawa.

₁₀Ngenxa yendluzula eyenziwa kumfowenu uJakobe,

amahloni ayakukusibekela,

unqunywe kuze kube-phakade.

₁₁Ngosuku owema kude ngalo,

ngosuku abafokazi abasusa ngalo imfuyo yakhe,

nabezizwe bangena ngamasango akhe,

benza inkatho ngeJerusalema,

nawe wawunjengomunye wabo.

₁₂Kepha ungabheki usuku lomfowenu

ngosuku lobufokazi bakhe,

ungathokozi ngabantwana bakwaJuda

ngosuku lokuchithwa kwabo,

ungaqhalazi

ngosuku losizi.

₁₃Ungangeni ngesango labantu bami

ngosuku lwesigemegeme sabo,

ungabheki ukuhlupheka kwabo

ngosuku lwesigemegeme sabo,

ningabeki-sandla emfuyweni yabo

ngosuku lwesigemegeme sabo.

₁₄Ungemi enhlanganweni yezindlela

ukunquma abaphunyukileyo bakhe,

ungakhapheli abaseleyo bakhe

ngosuku losizi.

₁₅Ngokuba usuku lukaJehova lusondele ezizweni zonke;

njengokwenza kwakho kuyakwenziwa kanjalo kuwe;

izenzo zakho ziyakubuyela ekhanda lakho.

₁₆Ngokuba njengalokho niphuzile entabeni yami engcwele,

bayakuphuza kanjalo bonke abezizwe,

baphuze, bagwinye,

babe-njengokungathi abazange babekhona.

₁₇Kepha entabeni yaseSiyoni kuyakubakhona abasindayo,

ibe-ngcwele,

nendlu yakwaJakobe iyakudla ifa layo.

₁₈Indlu yakwaJakobe iyakuba-ngumlilo,

indlu kaJosefa ibe-yilangabi,

indlu kaEsawu ibe-ngamabibi,

bawashise, bawaqede;

akuyikubakho oseleyo endlini kaEsawu,

ngokuba uJehova ukhulumile.

₁₉Abaseningizimu bayakudla ifa lentaba yakwaEsawu,

nabasehlanzeni ifa lamaFilisti,

badle ifa lezwe lakwaEfrayimi nezwe laseSamariya,

uBenjamini adle iGileyadi.

₂₀Abathunjwa balempi yabantwana bakwaIsrayeli

abaphakathi kwamaKhanani kuze kube-seSarefati

nabathunjwa baseJerusalema abaseSefaradi

bayakudla ifa lemizi yaseningizimu.

₂₁Abasindisi bayakukhuphukela entabeni yaseSiyoni

ukuyakwahlulela intaba yakwaEsawu,

umbuso besewuba-ngokaJehova.