UJEREMIYA 19

₁Washo kanje uJehova, wathi: Hamba uzithengele uphiso lwebumba lombumbi, uthathe amanye amalunga abantu namanye amalunga abapristi,

₂uphume, uye esigodini sendodana kaHinomu esingasesikhaleni seSango seziNdengezi, umemezele khona amazwi engiyakuwasho kuwe,

₃uthi: Zwanini izwi likaJehova ninamakhosi akwaJuda nabakhileyo eJerusalema; usho kanje uJehova-Sebawoti, uNkulunkulu kaIsrayeli, uthi: Bhekani, ngiyakwehlisela okubi phezu kwalendawo, nabo bonke abakuzwayo, izindlebe zabo ziyakunkeneza ngakho.

₄Ngokuba bangishiyile, benzé lendawo ukuba ibe-ngeyabezizwe, bashisela abanye onkulunkulu impepho kuyo, abangabazanga, bona nawoyise namakhosi akwaJuda, bagcwalisa lendawo ngegazi labangenacala,

₅bakha izindawo eziphakemeyo zikaBali ukushisa amadodana abo ngomlilo, abe-yiminikelo yokushiswa kuBali, engingakuyalanga, nengingakukhulumanga, nokungangenanga enhliziyweni yami,

₆ngalokho bhekani, izinsuku ziyeza, usho uJehova, lapho lendawo ayisayikubizwa ngokuthi iThofeti noma isigodi sendodana kaHinomu kepha isiGodi sokuBulala.

₇Ngiyakuchitha kulendawo amasu akwaJuda naseJerusalema, ngibawise ngenkemba phambi kwezitha zabo, nangesandla sabafuna ukuphila kwabo, nginike izidumbu zabo zibe-ngukudla kwezinyoni zezulu nokwezilwane zomhlaba.

₈Ngiyakwenza lomuzi ukuba ube-yisimangaliso nento encimfelwayo; bonke abadlula khona bayakumangala, bancimfe ngenxa yazo zonke izinhlupheko zawo.

₉Ngiyakubadlisa inyama yamadodana abo neyamadodakazi abo, badle, kube-yilowo nalowo inyama yomngane wakhe, ekuvinjezelweni nasekuxinekeni eziyakubaxina ngakho izitha zabo nabafuna ukuphila kwabo.

₁₀Besewaphula uphiso phambi kwamadoda ahamba nawe,

₁₁uthi kuwo: Usho kanje uJehova-Sebawoti, uthi: Ngiyakubulala kanjalo lababantu nalomuzi njengokwaphulwa kwesitsha sombumbi esingasezakubuye sihlanganiswe; bayakumbela eThofeti, ngokuba akuyikubakho-ndawo yokumbela.

₁₂Ngiyakwenze njalo kulendawo, usho uJehova, nakwabakhileyo kuyo, ngenze lomuzi ube-njengeThofeti:

₁₃izindlu zaseJerusalema nezindlu zamakhosi akwaJuda, ezoniweyo, ziyakubanjengeThofeti, yebo, zonke izindlu, abashisele ibandla lasezulwini impepho phezu kwezimpahla zazo, bathulula abanye onkulunkulu iminikelo yokuphuzwa.

₁₄Wayesebuya uJeremiya eThofeti lapho uNkulunkulu ayemthumé khona ukuba aprofethe; wema egcekeni lendlu kaJehova, wathi kubantu bonke:

₁₅Usho kanje uJehova-Sebawoti, uNkulunkulu kaIsrayeli, uthi: Bhekani, ngiyakwehlisela phezu kwalomuzi nemizana yawo konke okubi engikushilo ngawo, ngokuba benzé-lukhuni intamo yabo, ukuze bangezwa amazwi ami.