UJEREMIYA 12

₁Ulungile wena-Jehova, noma ngimelana nawe;

ngiyakukhuluma nawe ngokwahlulela:

iphumelelani indlela yababi,

kungani ukuba babe-nokuthula abakhohlisa nokukhohlisa, na?

₂Ubatshalile, futhi bagxilile;

bayakhula, bathela izithelo;

useduze nomlomo wabo, kepha ukude nezinhliziyo zabo.

₃Kepha wena-Jehova uyangazi,

uyangibona, uvivinya inhliziyo yami

ukuthi injani kuwe;

bakhiphe njengezimvu zokuhlatshwa,

ubalungisele usuku lokuhlatshwa.

₄Koze kube-nini izwe lidabuka,

nemifino yonke yasendle ibuna, na?

Ngobubi babakhileyo khona

izinkomo nezinyoni ziyabhubha,

ngokuba bathi: Akayikubona ukugcina kwethu.

₅Uma ugijimile nemigundatshani, yakukhathaza,

ungancintisana kanjani namahashi na?

Uma wethemba ezweni lokuthula kuphela,

uyakwenze-njani ekukhukhumaleni kweJordani na?

₆Ngokuba nabafowenu nendlu kayihlo nabo bakukhohlisile,

nabo bamemeza kakhulu emva kwakho;

ungabethembi, noma bekhuluma okuhle kuwe.

₇Ngiyishiyile indlu yami,

ngililahlile ifa lami,

nginikele othandiweyo womphefumulo wami

esandleni sezitha zakhe.

₈Ifa lami likimi

njengengonyama ehlathini;

lingiphumisele izwi; ngalokho ngiyalizonda.

₉Ifa lami liyinqe elimanakanaka kimi,

amanqe angakulo alihaqile nxazonke;

hambani, nibuthe zonke izilwane zasendle,

nizilethe, zidle.

₁₀Abelusi abaningi basichithile isivini sami,

basinyathele phansi isabelo sami,

benzé ifa lami elinxanelekayo ihlane elichithakeleyo.

₁₁Basenzé incithakalo;

siyincithakalo, sikhala kimi;

izwe lonke lichithiwe,

kepha akakho okubeka enhliziyweni.

₁₂Abaphangi bafikele onke amaduli angenalutho,

ngokuba inkemba kaJehova iyadla,

kusukela komunye umkhawulo womhlaba

kuze kufike komunye,

nenyama enokuthula ayikho.

₁₃Bahlwanyele ukolweni, bavuna ameva,

bakhandlekile bengasizakalanga;

yebo, niyakuba-namahloni ngezithelo zenu

ngenxa yokufutheka okuvuthayo kukaJehova.