ABAHLULELI 1

₁Kwathi emva kokufa kukaJoshuwa abantwana bakwaIsrayeli bambuza uJehova, bathi: Ngubani phakathi kwethu oyakusikhuphukelela kuwo amaKhanani kuqala ukulwa nawo na?

₂UJehova wathi: Kuyakukhuphuka uJuda; bheka, ngilinikele izwe esandleni sakhe.

₃UJuda wayesethi kuSimeyoni umfowabo: Khuphuka nami, siye esabelweni sami, silwe namaKhanani, nami ngiye esabelweni sakho. USimeyoni wayesehamba naye.

₄UJuda wakhuphuka; uJehova wanikela esandleni sabo amaKhanani namaPherizi, babulala kuwo abantu abayizinkulungwane eziyishumi eBezeki.

₅EBezeki bafumana uAdoni-Bezeki, balwa naye, bawabulala amaKhanani namaPherizi.

₆Kepha uAdoni-Bezeki wabaleka; bamxosha, bambamba, bamnquma izithupha nawoqukula.

₇Wayesethi uAdoni-Bezeki: Amakhosi angamashumi ayisikhombisa enqunyiwe izithupha nawoqukula acosha ukudla kwawo phansi kwetafula lami; njengalokho ngenzile, kanjalo uNkulunkulu uphindisele kimi. Bamyisa eJerusalema, wafela khona.

₈Abantwana bakwaJuda balwa neJerusalema, balithatha, balichitha ngosiko lwenkemba, bathungela umuzi ngomlilo.

₉Ngasemuva behla abantwana bakwaJuda ukuba balwe namaKhanani ayakhé ezintabeni, nangaseningizimu, nasenzansi.

₁₀UJuda wayesehlasela amaKhanani ayakhé eHebroni-igama leHebroni laliyiKiriyati-Araba kuqala-babulala oSheshayi, noAhimani, noTalimayi.

₁₁Wasuka lapho, waya kwabakhé eDebiri; igama leDebiri laliyiKiriyati-Seferi kuqala.

₁₂UKalebi wathi: Onqoba iKiriyati-Seferi, alithathe, yena ngiyakumnika uAkisa indodakazi yami abe-ngumkakhe.

₁₃UOtheniyeli indodana kaKenazi, umnawe kaKalebi, walithatha; wayesemnika uAkisa indodakazi yakhe abe-ngumkakhe.

₁₄Kwathi ekufikeni kwakhe wamnxusa ukuba acele insimu kuyise; wehla embongolweni yakhe; uKalebi wathi kuye: Ukhala ngani?

₁₅Wathi kuye: Ngiphe isipho; lokhu unginiké izwe laseningizimu, ngiphe nemithombo yamanzi. UKalebi wamupha imithombo yasenhla nemithombo yasenzansi.

₁₆Abantwana bomKheni umukhwe kaMose benyuka emzini wamasundu nabantwana bakwaJuda, baya ehlane lakwaJuda elingaseningizimu kwaseAradi; baya bakha nabantu bakhona.

₁₇UJuda wahamba noSimeyoni umfowabo, bachitha amaKhanani ayakhé eSefati, baliqothula. Igama lomuzi laliyiHorma.

₁₈UJuda wathatha iGaza nomkhawulo walo, neAshikeloni nomkhawulo walo, ne-Ekroni nomkhawulo walo.

₁₉UJehova wayenaye uJuda, waxosha abasezintabeni; wayengenakuxosha kodwa abakhé esigodini, lokhu bebenezinqola zensimbi.

₂₀Bamnika uKalebi iHebroni, njengalokho ebekhulumile uMose; waxosha khona amadodana amathathu ka-Anaki.

₂₁Abantwana bakwaBenjamini abawaxoshanga amaJebusi ayakhé eJerusalema, kepha amaJebusi ahlala nabantwana bakwaBenjamini eJerusalema kuze kube-namuhla.

₂₂Kwenyukela eBethele nabendlu kaJosefa; uJehova wayenabo.

₂₃Abendlu kaJosefa bathuma bahlola iBethele; igama lomuzi laliyiLuze kuqala.

₂₄Zase zibona izinhloli umuntu ephuma emzini, zathi kuye: Ake usikhombise intuba yokungena emzini, siyakukwenzela umusa.

₂₅Wazikhombisa intuba yokungena emzini, zawuchitha umuzi ngosiko lwenkemba; kepha zamvumela lowomuntu nomndeni wakhe ukuba bahambe.

₂₆Lowomuntu wayesengena ezweni lamaHeti, wakha umuzi, waqamba igama lawo ngokuthi iLuze okuyigama lawo kuze kube-namuhla.

₂₇UManase akaxoshanga abaseBeti-Sheyani nemizana yalo, nabase Thahanaki nemizana yalo, nabakhé eDori nemizana yalo, nabakhé eJibileyamu nemizana yalo, nabakhé eMegido nemizana yalo; amaKhanani aphumelela ukuhlala kulelozwe.

₂₈Kwathi uIsrayeli esenamandla, bawasebenzisa amaKhanani, kepha abawaxoshanga nokuwaxosha.

₂₉Naye uEfrayimi akaxoshanga amaKhanani ayakhé eGezeri; kepha amaKhanani ahlala phakathi kwabo eGezeri.

₃₀UZebuloni akaxoshanga abakhé eKitroni, nabakhé eNahaloli; kepha amaKhanani ahlala phakathi kwabo, asetshenziswa.

₃₁UAsheri akaxoshanga abakhé eAko, nabakhé eSidoni, naseAhlabi, naseAkizibi, naseHelba, naseAfiki, naseRehobe;

₃₂kepha ama-Asheri ahlala phakathi kwamaKhanani ayakhé kulelozwe, ngokuba abawaxoshanga.

₃₃UNafetali akaxoshanga abakhé eBeti-Shemeshi nabakhé eBeti-Anati, kepha wahlala phakathi kwamaKhanani ayakhé kulelozwe; kodwa abakhé eBeti-Shemeshi naseBeti-Anati basetshenziswa yibo.

₃₄Ama-Amori adudulela abantwana bakwaDani ezintabeni, ngokuba awabavumelanga ukwehlela esigodini.

₃₅Kepha ama-Amori aphumelela ukuhlala entabeni yaseHeresi, naseAjaloni, naseShahalabimi; kodwa isandla sendlu kaJosefa sahlula, aze asetshenziswa.

₃₆Umkhawulo wama-Amori wasukela ekwenyukeni kweAkarabimi naseSela, waya ngenhla njalo.