UEKSODUSI 33

₁UJehova wakhuluma kuMose, wathi: Hamba wenyuke lapha, wena nabantu obakhuphulile ezweni laseGibithe, uye ezweni engalifungela kuAbrahama, nakuIsaka, nakuJakobe, ngathi: Ngiyakulinika inzalo yakho.

₂Ngiyakuthuma ingelosi phambi kwakho, ngiwaxoshe amaKhanani, nama-Amori, namaHeti, namaPherizi, namaHivi, namaJebusi,

₃uye ezweni elichichima ubisi nezinyosi. Angiyikukhuphuka ngiphakathi kwenu, lokhu ningabantu abantamo ilukhuni, funa nginiqede endleleni.

₄Abantu beyizwa lendaba embi badabuka, akwabakho-muntu owafaka izivunulo zakhe.

₅UJehova wayesethi kuMose: Yisho kubantwana bakwaIsrayeli, uthi: Ningabantu abantamo ilukhuni; uma ngikhuphuka ngiphakathi kwenu nangokuphazima kweso nje, ngizakuniqeda. Ngalokho khumulani manje izivunulo zenu, ukuze ngazi ukuthi ngiyakwenzani kini.

₆Abantwana bakwaIsrayeli bazihlubula izivunulo zabo, kusukela entabeni yaseHorebe.

₇UMose wayevama ukulithatha itende, walimisa ngaphandle kwekamu*, libe-kude nekamu, walibiza ngokuthi intende lokuhlangana. Kwathi bonke abamfunayo uJehova baphuma, baya etendeni lokuhlangana elalingaphandle kwekamu.

₈Kwathi uMose ephuma eya etendeni, bonke abantu basukuma bema, kwabayilowo nalowo ngasemnyango wetende lakhe, bambuka uMose waze wangena etendeni.

₉Kwathi uMose engena etendeni, insika yefu yehla, yema ngasemnyango wetende; uJehova wakhuluma noMose.

₁₀Bonke abantu bayibona insika yefu imi ngasemnyango wetende; bonke abantu basukuma, bakhuleka, kwaba-yilowo nalowo ngasemnyango wetende lakhe.

₁₁UJehova wakhuluma kuMose ubuso nobuso, njengalokhu umuntu ekhuluma nomhlobo wakhe. Wabuyela ekamu*, kepha inceku yakhe uJoshuwa indodana kaNuni, insizwa, ayiphumanga etendeni.

₁₂UMose wathi kuJehova: Bheka, uthi kimi: Khuphula lababantu, kepha awungazisanga yena oyakumthuma nami. Nokho ushilo ukuthi: Ngiyakwazi ngegama, ufumene umusa emehlweni ami.

₁₃Ngalokho uma ngifumene umusa emehlweni akho, ake ungibonise izindlela zakho ukuba ngikwazi, ukuze ngifumane umusa emehlweni akho, ubhekisise ukuthi lesisizwe singabantu bakho.

₁₄Wayesethi: Ngiyakuhamba mina uqobo, ngikuphumuze, na?

₁₅Wathi kuye: Uma ungahambi wena uqobo, ungasikhuphuli lapha.

₁₆Ngokuba kuyakwaziwa ngani ukuthi ngifumene umusa emehlweni akho, mina nabantu bakho, na? Akungalokhu yini ukuthi uhamba nathi, ukuze sahlukaniswe, mina nabantu bakho, nabanye abantu abasebusweni bomhlaba na?

₁₇UJehova wathi kuMose: Ngiyakwenza nalokho okushiloyo, ngokuba ufumene umusa emehlweni ami; ngiyakwazi ngegama.

₁₈Wayesethi: Ake ngibone inkazimulo yakho.

₁₉Wathi: Ngiyakudlulisa phambi kwakho ubuhle bami, ngilimemezele igama likaJehova phambi kwakho, ngibe-nomusa kuyena engithanda ukuba-nomusa kuye, ngibe-nesihe kuyena engithanda ukuba-nesihe kuye.

₂₀Wathi: Awunakubona ubuso bami, ngokuba akukho-muntu ongangibona, aphile.

₂₁UJehova wathi: Bheka, nansi indawo kimi; uyakuma edwaleni.

₂₂Kuyakuthi isadlula inkazimulo yami, ngiyakukufaka ofantwini lwedwala, ngikumboze ngesandla sami, ngize ngidlule.

₂₃Besengisusa isandla sami, ubone umhlane wami, kepha ubuso bami abuyikubonwa.