KWABASE-EFESU 4

₁Ngakho mina-siboshwa eNkosini ngiyanincenga ukuba nihambe ngokufanele ukubizwa enabizwa ngakho,

₂ngokuthobeka konke nobumnene, ngokubhekakade nokubekezelelana ngothando,

₃nikhuthalele ukugcina ubunye bukaMoya ngesibopho sokuthula;

₄munye umzimba, munye uMoya, njengalokho nabizelwa ethembeni linye lokubizwa kwenu;

₅yinye iNkosi, yinye inkolo, munye umbhapathizo;

₆munye uNkulunkulu, uYise wabo bonke, ophezu kwabo bonke, okubo bonke, ophakathi kwabo bonke.

₇Kepha yilowo nalowo kithina uphiwe umusa ngokwesilinganiso sesipho sikaKristu.

₈Ngalokho uthi:

₉Kepha lokhu ukuthi wenyuka, kuthini, uma kungesikho ukuthi wake wehlela ezindaweni zomhlaba eziphansi na?

₁₀Owehlayo nguyena owenyukela futhi ngaphezu kwamazulu onke, ukuze agcwalise konke.

₁₁Nguyena futhi owanika abanye ukuba babe-ngabaphostoli, abanye abaprofethi, abanye abavangeli, abanye abelusi nabafundisi,

₁₂ukuze abangcwele bapheleliselwe umsebenzi wokukhonza, kwakhiwe umzimba kaKristu,

₁₃size sifinyelele sonke ebunyeni bokukholwa nasekwazini iNdodana kaNkulunkulu, ebudodeni obupheleleyo, esilinganisweni sobukhulu sokugcwala kukaKristu,

₁₄ukuze singabe sisaba-yizingane, sishukunyiswa okwamaza, sipheshulwa yimimoya yonke yezifundiso ngenkohliso yabantu, ngobuqili obunamacebo okudukisa;

₁₅kodwa sithi sikhuluma iqiniso ngothando, sikhulele ngakho konke kuye oyinhloko, uKristu,

₁₆okungaye umzimba wonke uhlanganisiwe, ubambene ngokwelekelelana kwamalungu onke awo njengokusebenza okulinganiselwe yilelo nalelolungu, kukhuliswe kumzimba, ube-yisakhiwo othandweni.

₁₇Ngakho ngisho, ngifakaza eNkosini, ngithi ningabe nisahamba njengalokhu kuhamba abezizwe ebuzeni bengqondo yabo,

₁₈behlelwe emqondweni, behlukanisiwe nokuphila kukaNkulunkulu ngokungazi okukubo ngenxa yobulukhuni benhliziyo yabo,

₁₉abathi bebuthuntu, bazinikela emanyaleni, ukuze basebenze ukungcola konke ngokuhuheka.

₂₀Kepha nina animfundanga uKristu kanjalo,

₂₁uma-ke nimzwile nafundiswa kuye, njengokuba iqiniso likuJesu,

₂₂ukuba nikhumule umuntu omdala ongowenkambo yokuqala, owonakala ngezinkanuko zenkohliso,

₂₃nenziwe-basha emoyeni wengqondo yenu,

₂₄nembathe umuntu omusha owadalwa ngokukaNkulunkulu ekulungeni nasebungcweleni beqiniso.

₂₅Ngakho lahlani amanga, nikhulume iqiniso, yilowo nalowo nomakhelwane wakhe, lokhu singamalungu omunye komunye.

₂₆Thukuthelani ningoni; ilanga malingashoni nisathukuthele.

₂₇Ningamniki uSathane indawo.

₂₈Owebayo angabe eseba, kepha kunalokho akhuthale asebenze okuhle ngezandla zakhe, ukuze abe-nokokwabela osweleyo.

₂₉Makungaphumi emlonyeni wenu nalinye izwi elibolileyo, kodwa kubengelilungele ukwakha njengokuswelekileyo, ukuze libavezele umusa abezwayo.

₃₀Ningamdabukisi uMoya oNgcwele kaNkulunkulu enabekwa uphawu ngaye kuze kube-lusuku lokuhlengwa.

₃₁Konke okubabayo, nentukuthelo, nolaka, nomsindo, nokuhlambalaza makususwe kini kanye nakho konke okubi.

₃₂Maniphathane ngobumnene, nihawukelane, nithethelelane, njengalokho noNkulunkulu wanithethelela ngoKristu.