UZakhariya 10

₁Celani imvula kuSimakade

ngenkathi yayo entwasahlobo.

USimakade uhlomisa izulu,

anise imvula;

aphe kube yilowo nalowo

okudliwayo kwasendle.

₂Ngokuba amatherafi akhulume inkohliso,

ababhuli babona imibono eyedukisayo,

bakhuluma ngamaphupho angamanga,

baduduza ngokuyize.

Ngakho-ke bazulazula njengezimvu,

bayahlupheka,

ngokuba bengenamelusi.

₃“Intukuthelo yami ivuthela abelusi.

Ngiyakubajezisa abaholi bomhlambi,

ngokuba uSimakade Wamabandla

uyawunakekela umhlambi wakhe,

indlu yakwaJuda.

Uyakubenza bafane nehhashi

lobukhosi bakhe empini.

₄Kuyena kuyakuvela itshe legumbi,

kuvele isikhonkwane,

kuvele umnsalo wempi,

kuvele nababusi bonke ndawonye.

₅Bayakuba njengamaqhawe enyathela udaka

emigwaqweni lapho kuliwa.

Bayakulwa, ngokuba uSimakade ungakubo,

bathelwe ngehlazo abagibeli bamahhashi.

₆“Ngiyakuqinisa abendlu yakwaJuda,

ngihlenge abendlu yakwaJosefa,

ngibabuyise,

ngokuba ngiyabazwela.

Kuyakuba sengathi angikaze ngibalahle,

ngokuba Mina Simakade uNkulunkulu wabo

ngiyakubaphendula.

₇Abakwa-Efrayimi bayakuba njengamaqhawe;

inhliziyo yabo ithokoze

sengathi kungenxa yewayini.

Abantwana babo bayakukubona lokho bajabule;

inhliziyo yabo ithokoze ngoSimakade.

₈“Ngiyakubashayela ikhwelo,

ngibaqoqe,

ngokuba sengibahlengile.

Bayakuba baningi njengakuqala.

₉Ngiyakubahlwanyela phakathi kwezizwe,

kodwa bayakungikhumbula besemajukujukwini,

bona nezingane zabo bayakusinda,

bese bebuya.

₁₀Ngiyakubabuyisa eGibhithe,

ngibaqoqe eSamariya,

ngibayise kwaGileyadi naseLebhanoni,

akuyukutholakala ndawo eyakubanela.

₁₁Bayakudabula olwandle lwezinhlupheko.

Uyakushaya amagagasi olwandle,

nezinzulu zonke zomfula ziyakukoma nkwe,

kuyakudicilelwa phansi ukuzigqaja kwe-Asiriya,

kusuke nentonga yaseGibhithe.

₁₂Ngiyakubaqinisa kuSimakade;

bahambe egameni lakhe,”

kusho uSimakade Wamabandla.