Inhlakanipho kaSolomoni 6

₁“Ngakho-ke lalelani nina makhosi, niqonde. Fundani, nina bahluleli bemikhawulo yomhlaba. ₂Lalelani, nina enibusa izinkumbi zabantu, niziphakamisa ngezizwe eziningi. ₃Ngokuba umbuso wenu nawuphiwa yiNkosi, nobukhosi benu buvela koPhezukonke; uyakuyihlola imisebenzi yenu futhi abuzisise ngamacebo enu. ₄Ngokuba anibusanga kahle njengezinceku zombuso wakhe, futhi aniwugcinanga umthetho, noma nihambe njengokwezimiso zikaNkulunkulu. ₅Uyakuza kini kanzima nangokushesha, ngokuba izahlulelo zakhe ezinzima zehlela labo abasezikhundleni eziphakeme. ₆Ngokuba abathotshisiweyo bayakuthethelelwa ngomusa, kodwa abaphakeme bayakuvivinywa kakhulu.

₇“INkosi yabo bonke ayesabi muntu, futhi ayinatwetwe ngabakhulu; ngokuba yiyo uMdali wabakhulu nabancane, futhi ibakhumbula bonke ngokufanayo. ₈Kodwa abaphakanyisiweyo nabanamandla bayakuhlolwa ngokunzulu. ₉Ngakho-ke amazwi ami abhekiswe kini babusi, ukuze nifunde ukuhlakanipha futhi ningephuli imithetho. ₁₀Ngokuba bayakwenziwa ngcwele abagcina izinto ezingcwele ngobungcwele; nalabo abafundiswe ngazo bayakuthola amazwi okuzivikela. ₁₁Ngakho-ke langazelelani amazwi ami, womeleni khona niyakufundiswa.”

₁₂Ukuhlakanipha kuyabengezela ngukukhazimula futhi kakugqwali, abakuthandayo basheshe bakubone nabakufunayo bakuthole. ₁₃Kuyakhawuleza kuhlaluke kulabo abakuphokopheleleyo. ₁₄Novuka ekuseni akufune kayikufumana bunzima, ngokuba kuyakutholakala kuhlezi esangweni lakho. ₁₅Ukubeka ingqondo yakho kukho kungukuqonda okuphelele, nohlezi ephapheme ngenxa yakho uyakukhululwa kweminye iminako, ₁₆ngokuba kuyahamba kufuna labo abakufanele, futhi kuyazibonakalisa kubo ezindleleni zabo, kuhlangabezana nabo nakumuphi umcabango wabo.

₁₇Ukuqala kokuhlakanipha kungukulangazelela okuhle kofuna ukufundiswa, futhi ukukhathazeka ngokufundiswa kungukukuthanda khona impela, ₁₈ukukuthanda kungukugcina imiyalo yakho, ukulalela imithetho yakho kuyisiqiniseko sokuphila okuphakade, ₁₉ukuphila okuphakade kusondeza umuntu kuNkulunkulu; ₂₀ngakho-ke ukulangazelela ukuhlakanipha kuholela embusweni kaNkulunkulu. ₂₁Ngakho-ke uma nina babusi babantu nithokoziswa yizihlalo nezintonga zokubusa, kuhlonipheni ukuhlakanipha, ukuze nibuse phakade.

₂₂Ngizakunitshela ukuthi ukuhlakanipha kuyini nokuthi kwavela kanjani, angizukunifihlela lutho kodwa ngizakulanda ngezindlela zakho kusukela ekuqaleni kokudalwa, ngiveze ngokusobala ulwazi ngakho, anginakuligwema iqiniso, ₂₃futhi angiyukuba mdibimunye nabanomhawu, ngokuba umhawu awunabudlelwano nokuhlakanipha. ₂₄Ubuningi babahlakaniphileyo buyinsindiso yomhlaba, ukuhlakanipha kweNkosi kunikeza ukuthula kunoma yimuphi umuntu. ₂₅Ngakho-ke fundani emazwini ami khona-ke niyozuza.