USirakhi 6

₁Ungabi yisitha esikhundleni sokuba uthande. Ngokuba ububi bunikeza igama elibi futhi buyahlazisa, ngaleyo ndlela nesono siyadumaza. ₂Ungavumi ukubuswa yinkanuko ukuze umphefumulo wakho ungabi njengontwengulwe yinkunzi. ₃Inkanuko iyoshwabadela uloya lwakho ichithe isithelo sakho, usale usufana nesihlahla esomileyo. ₄Izinkanuko ezimbi ziyamlimaza ozifukameleyo, futhi zimenze inhlekisa ezitheni zakhe.

₅Amazwi amnandi akwandisela abangani, ukukhuluma ngokucophelela kwandisa ubungani. ₆Mabande labo abanobungane nawe, kodwa mababe yingcosana abeluleki bakho. ₇Nxa uthola umngane qala ngokumhlola, ungasheshi ukumethemba. ₈Ngokuba omunye umngane wethembekile uma izinto zivuna yena, kodwa akulaxaze ngesikhathi sobunzima. ₉Omunye uphenduka isitha akuvukele akwembule izinqe phambi kwabantu. ₁₀Kukhona ohlala nawe ekudleni kodwa ngesikhathi sobunzima akushiye obishini.

₁₁Nxa izinto zikuhambela kahle baba njengewele lakho, bakhulume kamnandi nezisebenzi zakho, ₁₂kepha lapho usushaywe umhlaba bakuphendukele bangabe besabonwa nangalukhalo. ₁₃Hambela kude nezitha zakho, ubaqaphele abangani bakho. ₁₄Umngani othembekile ungumpheme wokuphephela, othola onjalo ufumene ingcebo yoqobo. ₁₅Umngani othembekileyo angelinganiswe nantengo, ukubaluleka kwakhe akulinganiseki. ₁₆Umngani oqotho uyikhambi lokuhlenga impilo, utholwa kuphela yilabo abesaba iNkosi. ₁₇Lowo owesaba uSimakade uba nobungani obuphilayo, ngalokho-ke uyaphilelana nomakhelwane wakhe.

₁₈Mntanami, khetha ukuzithiba ebusheni bakho khona kothi lapho sewungwevu ufumane ukuhlakanipha. ₁₉Yiza ekuhlakanipheni njengomlimi olima atshale, bese ulindela isivuno sakho esihle. Ngokuba awuyikuzikhandla kakhulu, masinyane bese udla isithelo sakho. ₂₀Kubukeka kunesihluku kwabangenakho ukuzithiba akunasikhathi neziphukuphuku, ₂₁njengetshe elisindayo kuyamhlola oyisiwula kuzwe amandla akhe, azichithi sikhathi iziwula ukuba zikudicilele phansi. ₂₂Ukuhlakanipha kufana negama lakho, akukho obala kwabaningi.

₂₃Lalela mntanami, wamukele izahlulelo zami, ungasenqabi iseluleko sami. ₂₄Bopha izinyawo zakho ngamaketango okuhlakanipha, nentamo yakho ejokeni lakho. ₂₅Thobisa amahlombe akho ukwetshathe, ungakhonondi lapho usejokeni lakho. ₂₆Yiza kukho ngenhliziyo yakho yonke, ugcine izindlela zakho ngamandla akho onke. ₂₇Kufune, ukufunisise khona kuyokuzibonakalisa kuwe, kubambise okwezikhali zamantungwa, ungakudedeli. ₂₈Ngokuba ekugcineni kuyakukunikeza ukuthula, kuyakuguqulwa kube yintokozo kuwe. ₂₉Izibopho zakho ziyoba yinqaba yokukuvikela, kuthi ijoka lakho, libe yimvunulo yakwanokusho. ₃₀Ngokuba ijoka lakho lingumhlobiso wegolide, nezibopho zakho ziyintambo ebubende. ₃₁Uyokwembatha njengemvunulo enhle, ukugqoke njengomqhele wentokozo. ₃₂Uma uthanda, mntanami, uyoqeqeshwa, uma ubeka umphefumulo wakho kukho, uyakuhlakanipha; ₃₃uma uthanda ukulalela, uyakuthola ulwazi; uma ubeka indlebe, uyokhula ekuhlakanipheni. ₃₄Zihlanganise nezingwevu zebandla. Ukhona ohlakaniphile na? Zihlanganise nonjalo.

₃₅Hlala ulungele ukulalela izinkulumo ezakhayo; makungabikho mqondo ohlakaniphile okweqayo. ₃₆Uma uthola umuntu ohlakaniphile, vuka entathatha uyokumvakashela, izinyawo zakho zibhudule kwakhe. ₃₇Zindla ngezimiso zeNkosi, ujule njalo ngemithetho yayo. Yiyo eyakuhlalukisa ingqondo yakho, iphumelelise isifiso sakho sokuhlakanipha.