USirakhi 40

₁Ukusebenza nzima kwamiselwa wonke umuntu, ijoka elinzima libekiwe olibeni luka-Adamu, kusukela ekuphumeni kwabo ezizalweni zawonina kuze kube yisikhathi lapho sebebuyela kunina wakho konke okuphilayo. ₂Ukukhathazeka nokwesaba enhliziyweni, nokukhathazeka emqondweni ngosuku lokufa kwabo kungokwabo. ₃Kuye ohlezi esihlalweni esikhazimulayo kuye obubula othulini nasemlotheni, ₄kuye ogqoke ezibubende kanye nomqhele, nakuye ogqoke ezamasaka, kukhona ulaka, nomhawu, nokuhlupheka, nenxushunxushu, nokwesaba ukufa, kanye nolaka nokuxabana.

₅Lapho umuntu ephumule embhedeni wakhe ezijabulisa, kuba sengathi ubuthongo budida umqondo wakhe; ₆kakutholi ukuphumula okuhle; unobunzima obukhulu ekulaleni kwakhe njengoba ebenakho nase mini. Ukhathazwa ngakubona engqondweni yakhe, efana nomuntu osinde empini. ₇Lapho efika endaweni ephephile bese ephaphama, amangaliswe ngukuthi ukwesaba kwakhe kakunasisekelo. ₈Ukufa kuyafika kuyo yonke indalo, esintwini nasezilwaneni, kufike nakwabayizoni ngokuphindwe kasikhombisa. ₉Kuyafika, nokuchitheka kwegazi, nempikiswano, nenkemba, nezinhlekelele, nendlala, nencithakalo, kanye nezishayo. ₁₀Konke lokhu kwenzelwa ababi, nomzamcolo weza ngenxa yabo. ₁₁Konke okungokomhlaba kubuyela emhlabeni nawo onke amanzi abuyela olwandle.

₁₂Konke ukudiza nokusweleka kobulungisa kuyakwesulwa, kodwa ukholo oluhle luyoma kube phakade. ₁₃Ingcebo yababi iyakusha njengomfula, iqhumise okomsindo wombani ngesikhathi sesiphepho. ₁₄Umuntu ozandla zakhe zivulekele ukuphana unesizathu sokuba athokoze, izaphulamthetho ziyokwehluleka. ₁₅Inzalo yabangalungile iveza amagatsha ambalwa nje, ifana nezimpande ezingenampilo edwaleni. ₁₆Umhlanga ongasemanzini noma ngasemfuleni uyakhiwa ngaphambi kokunye okumilileyo. ₁₇Kodwa isisa sifana nensimu yezibusiso, kanye neminikelo eyokuma ingunaphakade.

₁₈Ingcebo kanye nenkokhelo kwenza impilo ibe mnandi, kodwa ukufumana ingcebo kungcono kunakho kokubili lokhu. ₁₉Ukuba nezingane kanye nokwakha umuzi omkhulu kuqinisa igama lomuntu, kodwa ukufumana inhlakanipho kungcono kunakho kokubili. Ukuba nezinkomo kanye nezivande zomvini kwenza umuntu acebe, kodwa umfazi ongenasici ungcono kakhulu kunalokhu.

₂₀Iwayini nomculo kuthokozisa inhliziyo, kodwa ukuthanda ukuhlakanipha kungcono kunalokhu. ₂₁Umtshingo nohabhu kwenza umculo omnandi kodwa iphimbo elimtoti lingcono kunakho. ₂₂Iso lilangazelela ubabalo nobuhle kodwa ihlumela eliluhlaza lohlamvu lungcono kakhulu kunalokhu. ₂₃Umngani uhlala njalo emukelekile, kodwa umfazi onengqondo ungcono kakhulu kunaye. ₂₄Izihlobo nabasizayo bangabesikhathi sokuhlupheka, kodwa iminikelo ikhulula kangcono kunakho kokubili.

₂₅Igolide nesiliva kumenza umuntu ame eqinile, kodwa izeluleko ezinhle zituseka kakhulu kunalo. ₂₆Ingcebo namandla kwenza umuntu angazinyezi, kodwa ukwesaba uNkulunkulu kungcono kukhulu. Akukho ukweswela ekwesabeni uSimakade, kwenza nokuba singabi bikho isidingo sokufuna usizo. ₂₇Ukwesaba uSimakade kufana nensimu yezibusiso, kwembathisa umuntu ngodumo kangcono kunanoma yikuphi okunye.

₂₈Mntanami, ungayiphili impilo yesinqibi; kungcono ukufa kunokunqiba. ₂₉Lapho omunye ehahela okusetafuleni lomunye, impilo yakhe ingefaniswe nempilo. Ngokuba uyalahlekelwa ngukuzihlonipha ngenxa yokudla komunye, kodwa lowo ohlakaniphile futhi efundiswe kahle uyaziqaphela ukuba kungenzeki kuye lokhu. ₃₀Emilonyeni yabangenamahloni, ukunqiba kufana noju, kodwa kokhela umlilo ngaphakathi kwakhe.