USirakhi 39

₁Wehluke kangakanani lowo ozinikelayo ukuba afunde umthetho woPhezukonke, ofuna ukuhlakanipha kwabo bonke abasendulo, futhi okhathazekile ngeziphrofetho; ₂uyazigcina izisho zabadumileyo angenise okwemvukuzane ezimfihlakalweni zemifanekiso; ₃ufuna ulwazi olufihlakele lwezaga, abe engenankinga ngezinto ezifihlakele zemifanekiso. ₄Ukhonza phakathi kwezikhulu avele phambi kwababusi; uhambela amazwe abezizwe, afunde ukuthi yikuphi okuhle nokubi esintwini sonke. ₅Ubeka inhliziyo yakhe ukuba avuke kusesekuseni kakhulu, ukuze afune uNkulunkulu omenzileyo, nokuba enze izicelo zakhe koPhezukonke; uvula umlomo wakhe emkhulekweni, acele intethelelo ngenxa yezono zakhe.

₆Uma uNkulunkulu omkhulu ethanda, uyakugcwaliswa ngomoya wokuqonda; uyakukhuluma amazwi okuhlakanipha avela kuye uqobo futhi anikeze izibongo kuNkulunkulu ngomkhuleko. ₇INkosi iyakuqondisa izeluleko zakhe kanye nokwazi kwakhe, lapho ezindla ngezimfihlakalo zayo. ₈Uyakukhombisa ubuhlakani ngalokho akufundile, athokoze ngomthetho wesivumelwano seNkosi. ₉Abaningi bayakutusa ukuqonda kwakhe; akunakucinywa lutho. Ukukhunjulwa kwakhe akusoze kwakhohlakala, negama lakhe liyakuhlala ezizukulwaneni ngezizukulwane.

₁₀Izizwe ziyakukhuluma ngokuhlakanipha kwakhe, namabandla aphakamise ukudunyiswa kwakhe. ₁₁Uma ephila kade, uyakushiya igama elikhulu kunezinkulungwane, uma eya ekuphumuleni, kuyobe kwanele ngokwakhe.

₁₂Kuningi okusemqondweni wami engifisa ukukukhuluma, ngigcwele okwenyanga egcwele. ₁₃Ngilaleleni, zingane zami ezikholekile, niqhakaze njengembali emile ngasemifuleni yamanzi. ₁₄Thumela iphunga njengempepho, uqhakaze njengembali. Iphunga lakho maligcwalise indawo, bese ucula iculo lokudumisa; udumise iNkosi ngayo yonke imisebenzi yayo. ₁₅Nikani igama lakhe ubukhosi, nimbonge ngezindumiso, nimhubele amaculo ngohabhu; yilokhu eniyakusho ekubongeni kwenu: ₁₆“Yonke imisebenzi yeNkosi mihle, nakho konke ekuyalile kuyakwenzeka ngesikhathi esifaneleyo.”

₁₇Akekho ongathi: “Kuyini lokhu?”

Noma “Kuyini lokhuya?” Ngokuba ngesikhathi esimisiweyo yonke leyo mibuzo iyophendulwa. Ngokukhuluma kwakhe amanzi ama aba yintaba, aba yizinqolobane zamanzi ekukhulumeni komlomo wakhe. ₁₈Lapho eyala, injongo yakhe iyafezeka, akekho ongavimba amandla akhe okusindisa. ₁₉Imisebenzi yabo bonke iphambi kwakhe, akukho nokufihlakele phambi kwakhe. ₂₀Kusukela ekuqaleni kuze kube sekugcineni kwesikhathi, ubona konke, akukho okuyisimangaliso kuye. ₂₁Akekho ongathi: “Kuyini lokhu?”

Noma “Kuyini lokhuya?” Ngokuba konke kudalelwe injongo yakhe. ₂₂Isibusiso sakhe semboza umhlaba owomile njengomfula, siwumatise njengesikhukhula. ₂₃Kodwa ulaka lwakhe luchitha izizwe, njengoba aphendula izwe eligcwele amanzi laba ngusawoti. ₂₄Kwabakholekileyo izindlela zakhe ziqondile, kodwa kwababi zigcwele imigodi nezihibe. ₂₅Kusukela ekuqaleni izinto ezinhle zazenzelwe okuhle, kodwa kwabayizoni zenzelwe okuhle nokubi. ₂₆Izidingo zempilo yomuntu zingamanzi, nomlilo, nensimbi, nosawoti, nokolweni, nobisi, nezinyosi, nesithelo somvini, namafutha kanye nezimpahla zokugqoka. ₂₇Zonke lezi zinto zinhle kwabalungileyo, kodwa kulabo abayizoni ziphenduka zibe ngububi. ₂₈Ikhona imimoya edalelwe ukuphindisela, futhi lapho ithukuthele ingagudluza izintaba; ngosuku lwempindiselo iyathulula amandla ayo, iphozise ulaka loMdali wayo. ₂₉Umlilo nesichotho nendlala kanye nezifo, konke lokhu kwenzelwe impindiselo; ₃₀kungamazinyo ezilwane zasendle agcwele ubuthi, kungofezela kanye nezinyoka, kuyinkemba yokushaya abangalungile ngencithakalo. ₃₁Kuyathokoziswa ngukulalela intando kaSimakade, kuhlala kulungele ukwenza umsebenzi wakhe emhlabeni; lapho isikhathi sakho sesifikile akulokothi nakancu kungawuthobeli umyalo wakhe.

₃₂Ngakho-ke kusukela ekuqaleni ngibe nesiqiniseko ngalokhu, ngikucabangisisile ngase ngikushiya ngikulobile: ₃₃Yonke imisebenzi yeNkosi mihle, yenelisa nayisiphi isidingo ngesikhathi saso. ₃₄Akekho ongathi: “Lokhu akukuhle kunalokhuya,” ngokuba konke kuzibonakalisa kukuhle ngesikhathi sakho esimisiweyo. ₃₅Ngakho-ke manje, hlabelela udumise ngenhliziyo yakho nangephimbo lakho, utuse igama likaSimakade.