USirakhi 31

₁Ukukhathazeka ngengcebo kuyokunciphisa emzimbeni, uphelelwe ngubuthongo. ₂Ukukhathazeka ngengcebo kuqeda ubuthongo futhi kudala ukugula okukhulu. ₃Umuntu ocebile uyasebenza ukuze andise ingcebo yakhe kuthi lapho esephumule azitike ngobumnandi bayo. ₄Ompofu uyasebenza ukuze akwazi ukuphila, uma ethi uyaphumula, ugcina esentule kakhulu. ₅Lowo othanda igolide kanakulungisiswa, nalowo oxoshana nemali iyomchezula endleleni. ₆Baningi abawile ngenxa yegolide, ukubhubha kwabo kwabaqonda ngqo.

₇Liyisikhubekiso kulabo abalilangazelelayo. Bonke abayiziduphunga baphenduka iziboshwa zalo. ₈Ubusisiwe umuntu ocebile futhi ofunyanwa engenasici, ongahambi ethungatha ingcebo. ₉Ungubani lowo, ukuze nathi simdumise? Ngokuba wenze izimangaliso phakathi kwabantu bakhe. ₁₀Ngubani osewake wavivinywa yilo wafumaniseka ephelele? Makazishaye isifuba ngalakho. Ngubani osewake wanamandla okweqa umthetho kodwa akaze awephula, owaba namandla okwenza okubi kodwa akaze akwenza na? ₁₁Impumelelo yakhe iyakumiswa kuthi umbuthano wabantu uphakamise izenzo zakhe zothando.

₁₂Ngabe uhleli etafuleni lezikhulu na? Ungalihawukeli, ungasho futhi ukuthi: “Kungakanani ukudla okukhona lapha!”

₁₃Khumbula ukuthi ukuba nomona yinto embi. Yini enye kokudaliweyo enomona ukwedlula iso na? Ngakho-ke likhala izinyembezi nangasiphi isizathu. ₁₄Ungaseluleli isandla sakho kukho konke okubonayo, futhi ungamcinanisi umakhelwano wakho ekudleni. ₁₅Zibuze ukuthi umakhelwano wakho ukuthatha kanjani lokho ngokuba ukubhekise kuwe, makuthi ezintweni zonke umcabangele omunye umuntu.

₁₆Dlana okubekwe phambi kwakho njengomuntu okhuliswe kahle, ungahlafuni ngobugovu funa ukhube omunye. ₁₇Yiba ngowokuqala ukuma, njengoba kufanele kumuntu ofundiswe kahle, ungabi ngonganeliswa funa umkhube omunye. ₁₈Uma udla neningi, ungaziphakeli wena kuqala bengakaphaki abanye. ₁₉Nokuncane kangakanani kuyamenelisa umuntu oqeqeshekile! Akahoni nalapho elele. ₂₀Ukulala kahle kwencike ekudleni ngokuzithiba; uvuka ekuseni azizwe ephile engumqemane. Ukukhathazeka kokungalali nokucanuzela kwenhliziyo nesilungulela, konke lokho kungokwezidla ukudla.

₂₁Uma udle ngokwedlulele, vuka uhlanze, uzothola ukukhululeka. ₂₂Ngilalele, mntanami, ungawabukeli phansi amazwi ami, ekugcineni amazwi ami ayoba yigugu kuwe. Kukho konke okwenzayo zithibe, awuyikuphathwa zifo. ₂₃Abantu bayambusisa umuntu ophanayo ngokudla, futhi abakushoyo ngokuphana kwakhe kuyiqiniso. ₂₄Umuzi uyakhononda ngomuntu oncishanayo, nabakusho ngaye ngokuncishana kwakhe kushaya emhlolweni.

₂₅Ungazami ukukhombisa amandla akho ngokuphuza iwayini, ngokuba iwayini libhubhise abaningi. ₂₆Njengokuba isithando somlilo sihlola umsebenzi womcangcathi wensimbi, ngakho-ke newayini liyazihlola izinhliziyo lapho kusuka impikiswano enokwedelela.

₂₇Iwayini liyimpilo yoqobo kubantu uma liphuzwa ngokuzithiba kungeqiswa, Iyini impilo kulowo ongenalo iwayini? Lidalelwe ukwenza abantu ukuba bajabule. ₂₈Iwayini eliphuzwa ngesikhathi esifanele futhi ngokungeqisi lithokozisa inhliziyo lijabulise nomphefumulo. ₂₉Iwayini eliphuzwa ngokweqile liholela emoyeni omunyu, ekuxabaneni kanye nasekudiyazeleni. ₃₀Ukudakwa kuyalwandisa ulaka lwesiphukuphuku sigcine ngokuzilimaza, kusinciphisela amandla kusandisele amanxeba. ₃₁Ungamthethisi umakhelwano wakho lapho kuphuzwa khona iwayini, futhi ungambukeli phansi ngesikhathi sokuthokoza kwakhe, ungakhulumi-zwi kuye lokumsola, futhi ungamethwesi nasisindo ngokuba kube nezinto ozifuna kuye.