USirakhi 14

₁Ubusisiwe umuntu ongaphahluki akhulume kabi ngomlomo wakhe, futhi ongenabuhlungu bokuzisola ngezono. ₂Ubusisiwe lowo onembeza wakhe ungabonaze umdumaze, nongalilahlile ithemba. ₃Ingcebo kayimfanele umuntu onomqondo omfushane, futhi inalusizo luni ingcebo kumuntu ophilisa okwesichaka na? ₄Lokho azincisha khona uyakuqongelela bese abanye bezitika ngengcebo yakhe. ₅Uma umuntu eliqonqela angakwazi kanjani ukupha abanye na? Akasoze ayithokozela ingcebo yakhe. ₆Akekho umuntu owedlula lowo ozibophe yena uqobo, ubuqonqela bakhe buyisijeziso kuye uqobo. ₇Uma kukhona okuhle akwenzile, kwenzeka ngephutha kodwa ekugcineni kuvela ububi nobuze bakhe.

₈Umuntu omubi oliqonqela ulukhuni, uzishaya ongaboni futhi kazinaki izidingo zempilo. ₉Umuntu oneso lomona keneliswa ngokwakhe kanti, ubugovu obungenabulungisa buyawubhashisa umphefumulo. ₁₀Umuntu oliqonqela kakwazi ngisho ukukunika isinkwa lesi, futhi uqoma ukuba itafula lakhe lihlale lingenakudla. ₁₁Mntanami, uma unamandla ziphilise kahle, unikele iminikelo efanele kuNkulunkulu. ₁₂Khumbula ukuthi ukufa kukulindele, nesinqumo sasehayidesi asikembulwa kuwe. ₁₃Yenza okuhle kubangani bakho ungakafi, yelula isandla ubaphe ngokulingene namandla akho. ₁₄Ungazincishi ukuthokoza nje kosuku; ungavumi ukuba isabelo sakho sobuhle obulangazelayo sikwedlule. ₁₅Awunakusishiya yini isithelo somsebenzi wakho komunye, nalokho okuzuze ngesithukuthuku kwehlukaniswe ngonkatho na? ₁₆Yipha, wamukele, futhi uthokozise umphefumulo wakho, ngokuba eHayidesi akukho ukufuna ukunethezeka.

₁₇Zonke izidalwa ziyaguga okwengubo, ngokuba isinqumo sasemandulo singukuthi: “Sifanele ukufa.” ₁₈Njengamaqabunga amaningi esihlahleni esikhulayo, esiwisa amanye sihlumise amanye, zinjalo nezizukulwane zesintu, ezingezenyama negazi: omunye uyafa omunye azalwe. ₁₉Wonke umsebenzi uyabola uphele ungabe usabakho, nalowo owenzile uyakudlula kanye nawo.

₂₀Ubusisiwe umuntu ozindla ngenhlakanipho azindle ngokuqonda, ₂₁ozindlayo enhliziyweni yakhe ngezindlela zakho, acabangisise ngokufihlakeleyo kwakho, ₂₂akuxoshise okomzingeli, futhi akucuthele ezindleleni zakho. ₂₃Lowo olunguza emafasiteleni akho, alalele ngasezicabheni zakho, ₂₄ogoba amadlangala eduze kwendlu yakho, obethela izikhonkwane zethende lakhe obondeni lwakho; ₂₅ogxumeka ithende lakhe eduze nakho, esetholile indawo enhle yokuhlala, ₂₆onjalo wobeka izingane zakhe endaweni ephephile futhi ziyophumula emthunzini wamagatsha akho; ₂₇zivikelwe yikho ekushiseni, futhi ziyakuphumula enkazimulweni yakho.