USirakhi 11

₁Ukuhlakanipha kompofu kumenza ashayele phezulu, kumnikeze indawo phakathi kwezikhulu.

₂Ungamtusi umuntu ngenxa yokubukeka kwakhe noma umenyanye omunye ngenxa yokubukeka kwakhe. ₃Inyosi incane ezinambuzaneni ezindizayo kodwa yeka ubumnandi boju elukhiqizayo. ₄Ungahambi uziphakamisa ngenxa yezimpahla zakho ezinhle noma uthokoze kakhulu lapho udunyiswa. Ngokuba imisebenzi kaNkulunkulu iyamangalisa, imisebenzi yakhe ifihlakele ingebonwe ngamehlo enyama. ₅Maningi amakhosi ehliswa ezihlalweni zawo, kwathi imiqhele yawo yedlulela kubantukazana. ₆Iningi lababusi lithelwe ngehlazo kwathi abahlonishwayo banikelwa ekuphathweni ngabanye.

₇Ungambeki icala umuntu ngaphambi kokuthola ubufakazi; mphenye kuqala bese uncoma noma ugxeke kamuva. ₈Ungaphenduli ungakaziniki isikhathi sokulalela kuqala, futhi ungamphazamisi omunye esakhuluma. ₉Ungazigaxi odabeni olungaqondene nawe, ungahlali nezigilamkhuba nxa ziqula icala. ₁₀Mntanami, ungazenzi izinto eziningi ngasikhathi sinye, uma wenza izinto eziningi kakhulu ngeke uhlale ungasoleki, futhi ngeke uphumelele, ngeke neze wakwazi ukushiya emsebenzini.

₁₁Kukhona abasebenza kanzima nangokuzikhandla okukhulu nokho bahlala bentula. ₁₂Kukhona nabanye abazinokwe, abahlale bedinga ukusizwa ngoba bengenamandla, bakhungethwe ububha kodwa nokho amehlo kaSimakade ahlala ebabheke ngomusa, uyabenyula ebuphansini babo. ₁₃Uyabavusa othulini, iningi likhexe imilomo. ₁₄Inhlanhla neshwa, impilo nokufa, ubuphofu nengcebo, konke kuvela kuSimakade. ₁₅Inhlakanipho, ukuqonda, nokwazi umthetho kuvela kuSimakade; ukuba nothando kanye nemisebenzi emihle nakho kuvela kuye; ₁₆ukuphambuka nobumnyama kwadalwa kanye nezoni; ububi bukhula nomuntu onegqabho.

₁₇Izipho zikaSimakade kwabakholekayo zimi ngunaphakade, kuthi umusa wakhe ubalethele inqubekela-phambili engapheliyo. ₁₈Kukhona ocebile ngenxa yokukhuthala nokuzincisha, umvuzo awumiselwe lowo. ₁₉Lapha ethi: “Ngikutholile ukuphumula, sengizozitika ngempahla yami,” akazi ukuthi kuyoba isikhathi esingakanani ngaphambi kokuba afe ayishiye kwabanye. ₂₀Mana uqine esivumelwaneni sakho usifeze ukhule uze ube mdala emsebenzini wakho. ₂₁Ungawuhawukeli umsebenzi wezoni; kodwa thembela kuSimakade uhlale emsebenzini wakho, ngoba kulula ebusweni bukaSimakade ukuguqula ngokuphazima kweso abampofu abenze izicebi. ₂₂Isibusiso sikaSimakade singumvuzo wabalungileyo, uNkulunkulu uyenza siqhakaze ngokushesha isibusiso sakhe. ₂₃Ungasho ukuthi: “Ngidingani? Nzuzoni eyoba ngeyami kusasa?”

₂₄Ungasho futhi ukuthi: “Mina angidingi lutho nginakho konke; ngeke ngehlelwe lutho olubi.”

₂₅Ubunzima buyakhohlakala ngezikhathi zokutamasa, kanti nokutamasa kuyakhohlakala ngezikhathi zibunzima. ₂₆Nangosuku umuntu afa ngalo kulula eNkosini ukuba imvuze ngokumfaneleyo. ₂₇Inhlupheko yehora nje elilodwa imenza umuntu akhohlwe yizinsuku zokutamasa. Ekupheleni kwezinsuku zomuntu, yembuleka ngokusobala imisebenzi yakhe. ₂₈Ungacabangi ukuthi wonke umuntu uthokozile ngaphambi kokuba afe, ngokuba umuntu waziwa ngezingane zakhe.

₂₉Ungamemeli emzini wakho bonke ohlangana nabo; ngokuba buningi ubuqili obukhona. ₃₀Umqondo womuntu ozikhukhumezayo ufana nodobo oluyengayo nanjengenhloli eqaphe amaphutha akho. ₃₁Ulindele ithuba lokuguqula okuhle akwenze okubi noma asole izenzo ezinhle. ₃₂Inhlansi nje eyodwa ivuthisa amalahle amaningi, kanti icebo lomubi ligcina ngokuphalala kwegazi. ₃₃Aqaphele amaqili ngoba anamacebo angalungile, angahle acekele phansi udumo lwakho phakade. ₃₄Yamukela abantu ongabazi emzini wakho uzoyidela inkani, bayokuvusela uthuthuva, futhi bakwahlukanise nozalo lwakho.