USirakhi 1

₁Yonke inhlakanipho ivela eNkosini, futhi ihlala kuyuze kube phakade. ₂Ubani ongabala isihlabathi solwandle, namathonsi emvula, noma izinsuku zaphakade na? ₃Ubani ongahlolisisa ukuphakama kwezulu, ububanzi bomhlaba noma ukujula kwesihogo nokuhlakanipha na? ₄Ukuhlakanipha kungokokuqala ezintweni ezidaliweyo, ukuqonda kwakukhona kwasemaphakadeni. ₅Umthombo wokuhlakanipha uyizwi likaNkulunkulu elihlala ekuphakameni kwezulu, izindlela zakho imiyalo yaphakade. ₆Kukubani lapho yabonakaliswa kuqala impande yokuhlakanipha na? Ubani owazi izindlela zakho ezifihlakeleyo na? ₇Ulwazi lokuhlakanipha lwambulelwe bani na? Futhi ubani oke waqonda ulwazi lwakho oluningi na? ₈Munye kuphela ohlakaniphileyo, yiNkosi eyesabekayo, ehlezi esihlalweni sayo. ₉Yiyo eyakudala, yakubona, yakubala futhi yakuthululela phezu kwayo yonke imisebenzi yayo.

₁₀Ibaphile bonke okuthile kwenhlakanipho, ibaphe ngesihle nangokungagodli labo abayithandayo. ₁₁Ukumesaba uSimakade kuletha ukuhlonipheka nokuziqhenya, intokozo nomqhele wenjabulo. ₁₂Ukwesaba uSimakade kuthokozisa inhliziyo; kuletha injabulo nentokozo nempilo ende. ₁₃Lowo owesaba uSimakade uyakuba nesiphetho esihle, izibusiso zibe ngezakhe ngosuku lokufa kwakhe.

₁₄Ukumesaba uSimakade kungukuqala kokuhlakanipha, kwamumathwa esizalweni nabathembekileyo, ₁₅Kwakhile isisekelo esingunaphakade phakathi kwabantu. Kuyakwethembeka nasenzalweni yabo. ₁₆Ukuhlakanipha okuphelele kungukumesaba uNkulunkulu; kuyabesuthisa abantu ngezithelo zakho. ₁₇Kugcwalisa ikhaya lakho ngakho konke okuthandwa inhliziyo yakho, nezinqolobane zakho ngezithelo zakho. ₁₈Umqhele wokuhlakanipha ungukumesaba uNkulunkulu, uqhakaza ngokuthula nempilo enhle. ₁₉Ukuhlakanipha kunisa ubungcweti nolwazi lokuqonda njengemvula, kunikeza udumo olukhulu kulabo ababambelela baqine kukho. ₂₀Ukuhlakanipha kumile kwagxila ekumesabeni uNkulunkulu, impilo ende imila ikhule emagatsheni akho. ₂₁Ukwesaba uSimakade kuxosha izono, lapho kuhlala khona kuphebeza yonke intukuthelo.

₂₂Ulaka olungafanele alunakwemukeleka neze; nxa ulaka lumgabha umuntu, lokho kungukuwa kwakhe. ₂₃Uma kungakabi sikhathi umuntu onokubekezela uyazibamba, bese kuthi emva kwalokho kuqhakaze ukwenama kuye. ₂₄Uma kungakabi sikhathi esifanele ugcina imicabango yakhe kuye; lapho ekhuluma imilomo yabaningi iyakuzwakalisa ukwazi kwakhe.

₂₅Enqolobaneni yokuhlakanipha kugcwele izisho ezihlakaniphile, kodwa ukumesaba uNkulunkulu kuyenyanyeka koyisoni. ₂₆Uma womele ukuhlakanipha, gcina imiyalo, yikhona iNkosi iyakukupha khona ngokwevile. ₂₇Ukumesaba uNkulunkulu kungukuhlakanipha nokufundiswa, ukwethembeka nentobeko kuyintokozo yakhe. ₂₈Ungakushayi indiva ukwesaba uNkulunkulu, noma usondele kuye unhliziyombili. ₂₉Ungazenzi ongeyikho emehlweni abantu bomhlaba, faka isimfonyo emlonyeni wakho. ₃₀Ungaziphakamisi ngoba uzakuwa ulethe indumalo emphefumulweni wakho; iNkosi iyakuziveza obala zonke izimfihlo nemikhuba yakho, ikuthobise phambi kwebandla, ngoba obekukuqhuba bekungesikhona ukwesaba iNkosi: inhliziyo yakho ibigcwele inkohliso.