AMahubo 63

₁Nkulunkulu, Wena unguNkulunkulu wami, ngiyakufuna.

Umphefumulo wami womele Wena,

umzimba wami ulangazelela Wena,

ezweni eligagadekileyo,

lapho kungekho khona amanzi.

₂Yingakho ngikufuna endaweni engcwele,

ngibone amandla akho nenkazimulo yakho.

₃Ngokuba umusa wakho muhle kunokuphila,

izindebe zomlomo wami zizokudumisa.

₄Yingakho ngizokubonga,

inqobo nje uma ngisaphila.

Ngizophakamisa izandla zami egameni lakho.

₅Umphefumulo wami uyosutha

kube sengathi usuthiswe ngamanoni namafutha,

umlomo wami ukudumise ngezindebe ezethabayo,

₆lapho ngikukhumbula embhedeni wami,

ngizindla ngawe kwesikabhadakazi.

₇Wena ungisizile,

ngizokwethaba emthunzini wamaphiko akho.

₈Umphefumulo wami ubambelele kuwe,

esokunene sakho singisekele.

₉Kepha abazingela umphefumulo wami

ukuba bawenzakalise,

bazokwehlela ezindaweni zomhlaba eziphansi.

₁₀Bazonikelwa esandleni senkemba,

babe wukudla kwezimpungushe.

₁₁Kepha inkosi izothokoza ngoNkulunkulu,

bonke abafunga Yena bayomdumisa,

ngokuba imilomo yabakhuluma amanga izovalwa.