AMahubo 57

₁Yiba nomusa kimi, Nkulunkulu, ngihawukele.

Ngokuba umphefumulo wami uphephela kuwe.

Ngizokhosela emthunzini wamaphiko akho,

zize zedlule izinhlekelele.

₂Ngizokhala kuNkulunkulu oPhezukonke,

kuNkulunkulu ongiphindiselelayo.

₃Uzothumela esezulwini, angisindise.

Uyamsola ofuna ukungifihliza. Sela

UNkulunkulu uzothumela umusa wakhe

neqiniso lakhe.

₄Umphefumulo wami uphakathi kwamabhubesi,

ngilele phakathi kwabakhafula umlilo,

ngisho nabantwana babantu,

abamazinyo ayimikhonto nemicibisholo,

abalulimi luyinkemba ebukhali.

₅Phakama, Nkulunkulu phezu kwezulu,

inkazimulo yakho ibe phezu

komhlaba wonke.

₆Izinyathelo zami bazicuphe ngogibe,

umphefumulo wami udangele,

bangimbele umgodi,

kwakhalakathela bona kuwo. Sela

₇Inhliziyo yami yethabile, Nkulunkulu,

inhliziyo yami igxilile.

Ngizohlabelela, ngihube.

₈Vuka mphefumulo wami,

vukani lugubhu nehabhu!

Ngizovusa intathakusa.

₉Nkosi ngizokubonga phakathi kwabantu,

ngikuhashe phakathi kwezizwe.

₁₀Ngokuba umusa wakho

mkhulu, kuze kube sezulwini,

nokwethembeka kwakho,

kuze kube semafini.

₁₁Phakama, Nkulunkulu, phezu kwezulu,

inkazimulo yakho ibe phezu

komhlaba wonke.