AMahubo 5

₁Simakade, yizwa amazwi ami,

uqaphele ukububula kwami.

₂Yizwa izwi lokukhala kwami,

Nkosi yami, Nkulunkulu wami,

ngokuba ngikhuleka kuwe.

₃Simakade, ekuseni

uyalizwa izwi lami;

ekuseni ngethula kuwe

isicelo sami, ngilinde.

₄Ngokuba Wena unguNkulunkulu

ongabuthokozeli ububi;

ububi abunakuhlala kuwe.

₅Abazigqajayo abayukuma phambi kwamehlo akho.

Uyabazonda bonke abenza okubi.

₆Uyababhubhisa bonke abakhuluma amanga;

uSimakade uyabenyanya abachitha igazi nabakhohlisi.

₇Kepha mina ngiyakungena endlini yakho,

ngenxa yobuningi bomusa wakho,

ngikhothame ngokuthobeka

ethempelini lakho elingcwele.

₈Simakade, ngihole ngokulunga kwakho,

uqondise indlela yakho phambi kwami,

ngenxa yezitha zami.

₉Ngokuba alikho iqiniso emilonyeni yabo;

izibilini zabo zingukonakala:

umphimbo wabo uyithuna elivulekileyo;

bayathopha ngolimi lwabo.

₁₀Balahle ngecala, Nkulunkulu.

Mabawe ngenxa yamacebo abo,

badingise ngenxa yobuningi

beziphambeko zabo,

ngokuba bayamelana nawe.

₁₁Kepha mabajabule bonke abaphephela kuwe,

mabakhamuluke ngenjabulo phakade,

ubasibekele, bajabule kuwe

abathanda igama lakho.

₁₂Simakade, Wena uyambusisa olungileyo;

umhaqa ngomusa njengesihlangu.