AMahubo 27

₁USimakade ungukukhanya kwami

nensindiso yami.

Ngubani engingamesaba na?

USimakade uyinqaba

yokuphila kwami.

Ngubani engingaba

novalo ngaye na?

₂Lapho abenzi bokubi

besondela kimi

ukuba bangisoconge,

abamelene nami

nezitha zami

bayokhubeka,

baqumbeke phansi.

₃Noma impi ingakanisa

imelane nami,

inhliziyo yami ayiyukwesaba,

ngisho impi ingangivukela,

nokho ngiyoba neqholo.

₄Kukodwa zwi

engikucela kuSimakade,

yilokhu nje engizimisele

ukukwenza:

ukuba ngihlale

endlini kaSimakade

zonke izinsuku

zokuphila kwami,

ngibuke ubuhle bukaSimakade,

ngizindle ngisendlini yakhe.

₅Ngokuba uzongifihla

edokodweni lakhe

ngosuku lwenhlupheko,

angicashise endaweni efihlakele

ethendeni lakhe,

angiphakamisele edwaleni.

₆Namanje ikhanda lami

lizakuphakama phezu

kwezitha zami

ezingizungezile.

Ngizonikela ngemihlatshelo,

ngihlokome ngentokozo

ngisethendeni lakhe.

Ngihlabelele, ngidumise

uSimakade ngokhehlegume.

₇Ngizwe Simakade,

lapho ngikunxusa,

ube nomusa kimi,

ungiphendule.

₈Inhliziyo yami ithi uthe:

“Funani ubuso bami,”

inhliziyo yami ithi:

“Ubuso bakho, Simakade,

ngiyabufuna.”

₉Ungabufihli ubuso bakho kimi.

Ungayixoshi inceku yakho

ngentukuthelo;

Wena uwusizo lwami,

uze ungangilahli,

ungangishiyi,

Nkulunkulu wensindiso yami.

₁₀Nakuba ubaba nomame

bengishiyile;

uSimakade uzongemukela.

₁₁Simakade, ngifundise

indlela yakho,

ungihole endleleni ehlelembekile

ngenxa yezitha zami.

₁₂Uze unganginikeli

kokufiswa yizitha zami ngami,

ngokuba ofakazi bamanga

bangivukele,

babhodla umlilo.

₁₃Ngiyethemba ukuthi

ngizobubona

ubuhle bukaSimakade,

ezweni labaphilayo!

₁₄Lindela uSimakade,

uqine,

inhliziyo yakho ime isibindi.

Yebo, lindela uSimakade.