AMahubo 17

₁Ake ulalele udaba lwami, Simakade,

ulalele ukukhala kwami,

ubeke indlebe yakho emkhulekweni wami

ophuma emlonyeni ongenankohliso.

₂NguWena kuphela ongangikhipha phambili;

amehlo akho ayakubona okuliqiniso.

₃Uyivivinyile inhliziyo yami,

wangihambela ebusuku; uyangihlolisisa,

kepha awufumani lutho;

nginqumile ukuba ngingoni ngomlomo wami.

₄Angenzi njengabantu abaningi,

ngokuba ngithobela izwi lakho,

ngiyazigwema izindlela zezidlova.

₅Izinyathelo zami zisemkhondweni wakho,

izinyawo zami azizange zishelele.

₆Ngiyakukhala kuwe,

ngokuba uyongiphendula, Nkulunkulu;

beka indlebe yakho kimi,

uzwe engikukhulumayo.

₇Bonakalisa uthando lwakho olungapheliyo,

Wena osindisa ngesokunene sakho

abaphephela kuwe kulabo ababavukelayo.

₈Ngivikele njengenhlamvu yeso,

ungifihle emthunzini wamaphiko akho,

₉kwababi abangicindezelayo,

nasezitheni zami ezingihaqileyo.

₁₀Zivalile izinhliziyo zazo, azinasihe,

zikhuluma zizigqaja ngemilomo yazo.

₁₁Ziyangilandela noma ngiyaphi,

ziyangizungeza,

zingithe njo ngamehlo azo,

ukuze zingithele othulini.

₁₂Ufana nebhubesi elilambile,

nanjengebhongo lengonyama licuthe ehlozini.

₁₃Yima ngomumo, Simakade,

ubhekane nazo,

ziqumbe phansi.

Sindisa umphefumulo wami ngenkemba yakho,

₁₄nakubantu, ngesandla sakho, Simakade,

abantu abasabelo sabo

kulo mhlaba sikulokhu kuphila,

nabazisu zabo uzigcwalisa

ngalokho obabekele khona,

nabashiyela izingane zabo

okuningi okusele kubo.

₁₅Kepha mina ngizobuka ubuso

bakho ekulungeni,

ngeneliswe ngubunjalo bakho lapho ngivuka.