AMahubo 119

₁Babusisiwe abandlela iqotho,

abahamba ngomthetho kaSimakade.

₂Babusisiwe abagcina imiyalo yakhe,

abamfuna ngenhlizyo epheleleyo,

₃abangakwenzi okungalungile,

kodwa abahamba ezindleleni zakhe.

₄Uyalile ukuba izimiso zakho

zigcinwe impela.

₅Sengathi izindlela zami zingagxila

ekugcineni izimiso zakho;

₆khona ngingeyukujabha,

lapho ngihlonipha yonke imiyalelo yakho.

₇Ngizakukubonga ngenhliziyo eqotho,

lapho ngifunda izehlulelo zakho ezilungileyo.

₈Ngizozigcina izimiso zakho;

uze ungangishiyi.

₉Omusha angayigcina kanjani indlela yakhe

ihlanzekile na?

Ngokugcina okwezwi lakho.

₁₀Ngikufunile ngenhliziyo yami yonke,

mangingaphambuki emiyalweni yakho.

₁₁Enhliziyweni yami ngiyalilonda izwi lakho,

ukuze ngingoni kuwe.

₁₂Mawubongwe Wena Simakade,

ungifundise izimiso zakho.

₁₃Ngomlomo wami ngimemezele zonke izehlulelo

zomlomo wakho.

₁₄Ngithokoza ngendlela yobufakazi bakho

kungathi ngethabela ingcebo.

₁₅Ngizozindla ngeziyalezo zakho,

ngizihloniphe izindlela zakho.

₁₆Ngizothokoza ngezimiso zakho;

angiyukulikhohlwa izwi lakho.

₁₇Yenzele okuhle inceku yakho,

ukuze ngiphile,

ngigcine izwi lakho.

₁₈Vula amehlo ami

ukuba ngibone izimangaliso

ezisemthethweni wakho.

₁₉Ngingumfokazi emhlabeni,

ungangifihleli imiyalo yakho.

₂₀Umphefumulo wami waphukile,

ngokuba ngihlala ngilangazelela

izehlulelo zakho.

₂₁Uyabakhuza abazidlayo, abaqalekisiweyo,

abaduka emiyalweni yakho.

₂₂Susa kimi inhlamba nokweyiswa,

ngokuba ngibugcinile ubufakazi bakho.

₂₃Noma izikhulu zihlala zikhuluma ngami;

inceku yakho izindla ngezimiso zakho.

₂₄Ubufakazi bakho buyintokozo yami,

bungumeluleki wami.

₂₅Umphefumulo wami unamathela othulini;

ngiphilise ngokwezwi lakho.

₂₆Ngimemezele izindlela zami,

Wena wangizwa;

ngifundise izimiso zakho.

₂₇Ngiqondise indlela yeziyalezo zakho

ukuba ngikhulume ngezimangaliso zakho.

₂₈Umphefumulo wami uyakhala ngenxa yosizi;

ngiqinise ngokwezwi lakho.

₂₉Susa kimi indlela yamanga,

ungiphe ngomusa umthetho wakho.

₃₀Ngiyikhethile indlela yeqiniso;

izehlulelo zakho ngizibeke phambi kwami.

₃₁Ngibambelele ebufakazini bakho;

ungangijabhisi, Simakade.

₃₂Ngiyakugijima ngendlela yemiyalo yakho,

ngokuba uyakungivumela

ukuba ngenze kanjalo.

₃₃Simakade, ngikhombise indlela yezimiso zakho;

ngizoyigcina kuze kube sekugcineni.

₃₄Ngiphe ingqondo,

ukuze ngiwuqaphele umthetho wakho,

ngiwugcine ngenhliziyo yami yonke.

₃₅Ngihambise endleleni yemiyalo yakho,

ngokuba ngiyathokoza ngayo.

₃₆Inhliziyo yami yiguqulele ebufakazini bakho,

ukuze ngingafuni nzuzo ngokungalungile.

₃₇Phendula amehlo ami angakuboni okuyize,

ungiphilise endleleni yakho.

₃₈Yigcwalise encekwini yakho

inkulumo yakho

eyenza ukuba wesatshwe.

₃₉Dlulisa kimi inhlamba engiyesabayo,

ngokuba izehlulelo zakho zinhle.

₄₀Ngilangazelela iziyalezo zakho;

ngokulunga kwakho ngiphilise.

₄₁Umusa wakho mawuze kimi, Simakade,

insindiso yakho ngokwezwi lakho.

₄₂Khona ngiyakumphendula ongichukuluzayo,

ngokuba ngiyalethemba izwi lakho.

₄₃Ungalisusi emlonyeni wami izwi leqiniso,

ngokuba ngiyazethemba izehlulelo zakho.

₄₄Khona ngiyowugcina njalo umthetho wakho,

kuze kube phakade.

₄₅Ngizohamba ngenkululeko,

ngokuba ngifuna iziyalezo zakho.

₄₆Ngizokhuluma ngobufakazi bakho

phambi kwamakhosi, ngingajabhi.

₄₇Ngiyathokoza ngemiyalo yakho engiyithandayo.

₄₈Ngiyakuyihlonipha imiyalo yakho, engiyithandayo,

futhi ngizozindla ngezimiso zakho.

₄₉Khumbula izwi owalisho encekwini yakho,

owangenza ngalo ngaba nethemba.

₅₀Lokhu kuyinduduzo ekuhluphekeni kwami,

ngokuba izwi lakho lingiphilisile.

₅₁Abazidlayo bangihleka usulu kakhulu,

kepha emthethweni wakho angichezuki.

₅₂Ngiyazikhumbula Simakade,

izehlulelo zakho zasendulo;

ngiyaduduzeka.

₅₃Ukuvutha kolaka kungibambile,

ngenxa yezikhohlakali ezilahla umthetho wakho.

₅₄Izimiso zakho zaba yizihlabelelo kimi,

endlini yokugogobala kwami.

₅₅Simakade, ebusuku ngikhumbula igama lakho,

ngigcine umthetho wakho.

₅₆Lokhu kwaba ngokwami,

ngokuba ngizigcinile iziyalezo zakho.

₅₇USimakade uyisabelo sami;

ngithi amazwi akho ngizowagcina.

₅₈Ngincenga umusa wakho

ngenhliziyo yami yonke;

ngihawukele ngokwezwi lakho.

₅₉Ngizindla ngezindlela zami;

izinyawo zami ngiziqondisa ebufakazini bakho.

₆₀Ngiyashesha,

angilibali ukugcina imiyalo yakho.

₆₁Nakuba izintambo zezikhohlakali zingithandela,

angikhohlwa ngumthetho wakho.

₆₂Phakathi kwamabili ngivuka ngikubonge

ngenxa yezehlulelo zakho ezilungileyo.

₆₃Ngingumngani wabo bonke abakwesabayo,

abagcina iziyalezo zakho.

₆₄Umhlaba ugcwele umusa wakho, Simakade;

ngifundise izimiso zakho.

₆₅Simakade, ngokwezwi lakho

wayenzela okuhle inceku yakho.

₆₆Ngifundise ukwehlulela kahle nokwazi,

ngokuba ngiyayikholwa imiyalo yakho.

₆₇Ngingakahlupheki ngaduka,

kepha manje sengiyaligcina izwi lakho.

₆₈Umuhle Wena,

futhi wenza okuhle;

ngifundise izimiso zakho.

₆₉Abazikhukhumezayo bangiqambela amanga;

ngizozigcina ngenhliziyo yami yonke

iziyalezo zakho.

₇₀Inhliziyo yabo ilukhuni, abezwa lutho,

kodwa mina ngithokoza ngomthetho wakho.

₇₁Kwaba kuhle kimi ukuba ngihlushwe,

ukuze ngifunde izimiso zakho.

₇₂Umthetho womlomo wakho muhle

kunezinkulungwane zegolide nezesiliva.

₇₃Ngenziwe yizandla zakho, zangibumba,

ngiphe umqondo ukuze ngifunde imiyalo yakho.

₇₄Abakwesabayo bayakujabula lapho bengibona,

ngokuba ngethemba izwi lakho.

₇₅Ngiyazi Simakade,

ukuthi izehlulelo zakho zilungile,

nokuthi ngokwethembeka wangijezisa.

₇₆Umusa wakho mawube yinduduzo

encekwini yakho, ngokwezwi lakho.

₇₇Ububele bakho mabuze kimi,

ukuze ngiphile,

ngokuba umthetho wakho uyintokozo yami.

₇₈Abazikhukhumezayo mabajabhe,

ngokuba bangicindezela ngaphandle kwesizathu;

nokho mina ngizozindla ngeziyalezo zakho.

₇₉Abakwesabayo nababaziyo ubufakazi bakho

mabaphendukele kimi.

₈₀Inhliziyo yami mayibe msulwa

ezimisweni zakho,

ukuze ngingajabhi.

₈₁Umphefumulo wami ulangazelela insindiso yakho;

ngiyalethemba izwi lakho.

₈₂Amehlo ami alangazelela izwi lakho, ngithi:

“Uyakungiduduza nini na?”

₈₃Noma senginjengemvaba entuthwini,

izimiso zakho angizikhohlwa.

₈₄Zingaki izinsuku zenceku yakho na?

Uyakubehlulela nini abangizingelayo na?

₈₅Abaqhoshayo bangimbela imigodi,

labo abaphambene nomthetho wakho.

₈₆Yonke imiyalo yakho yethembekile,

ngihlushwa ngaphandle kwesizathu; ngisize.

₈₇Bacishe bangiqeda emhlabeni,

kodwa angizishiyanga iziyalezo zakho.

₈₈Ngesihawu sakho hlenga impilo yami,

ukuze ngibugcine ubufakazi bakho

obusho ngomlomo wakho.

₈₉Simakade, izwi lakho

limi liqinile ezulwini,

kuze kube phakade.

₉₀Ezizukulwaneni ngezizukulwane

ukwethembeka kwakho kukhona;

wamisa umhlaba; usemi.

₉₁Ngokwezehlulelo zakho

kusekhona nanamuhla,

ngokuba konke kuyizinceku zakho.

₉₂Ukuba umthetho wakho

ubungesiyo intokozo yami,

ngabe ngibhubhele ekuhluphekeni kwami.

₉₃Iziyalezo zakho angiyukuzikhohlwa

kuze kube phakade,

ngokuba ungiphilisile ngazo.

₉₄Ngingowakho, ngisindise,

ngokuba ngizifunile iziyalezo zakho.

₉₅Izikhohlakali zicuthele ukungibhubhisa,

kodwa mina ngigcina ubufakazi bakho.

₉₆Ngibonile ukuthi konke kunesiphetho,

kodwa umyalo wakho ubanzi kakhulu.

₉₇Umthetho wakho ngiwuthanda kakhulu.

Ngizindla ngawo usuku lonke.

₉₈Ngemiyalo yakho, ngiyahlakanipha kunezitha zami,

ngokuba inami kuze kube phakade.

₉₉Nginokuqonda okubedlula bonke abangifundisayo,

ngokuba ngizindla ngobufakazi bakho.

₁₀₀Ngiqonda ukwedlula izingwevu,

ngokuba ngigcina iziyalezo zakho.

₁₀₁Ngiyazinqanda izinyawo zami

ezindleleni zonke zokubi,

ukuze ngigcine izwi lakho.

₁₀₂Ezehlulelweni zakho, angichezuki,

ngokuba Wena uyangifundisa.

₁₀₃Anambitheka kamnandi amazwi akho,

adlula uju emlonyeni wami.

₁₀₄Ngeziyalezo zakho ngizuza ukuqonda,

ngalokho-ke ngiyazizonda zonke izindlela zamanga.

₁₀₅Izwi lakho liyisibani ezinyaweni zami

nokukhanya endleleni yami.

₁₀₆Ngifungile,

futhi ngakuqinisekisa

ukuthi ngizozigcina izehlulelo zakho ezilungileyo.

₁₀₇Simakade, ngihlupheka kakhulu,

ngiphilise ngokwezwi lakho.

₁₀₈Simakade, yamukela iminikelo yesihle

yomlomo wami,

ungifundise izehlulelo zakho.

₁₀₉Umphefumulo wami usesandleni sami njalo,

nokho umthetho wakho angiwukhohlwa.

₁₁₀Izikhohlakali zingicuphile,

kepha angichezukanga eziyalezweni zakho.

₁₁₁Ubufakazi bakho buyifa lami laphakade,

ngokuba buwukuthokoza kwenhliziyo yami.

₁₁₂Inhliziyo yami ngiyinamathelise ekwenzeni

izimiso zakho,

kuze kube sekupheleni.

₁₁₃Ngiyabazonda abanhliziyo mbili,

kepha umthetho wakho ngiyawuthanda.

₁₁₄Wena uyisiphephelo sami nesihlangu sami;

ngiyalethemba izwi lakho.

₁₁₅Sukani kimi, nina enenza okubi,

ngokuba mina ngizoyigcina imiyalo kaNkulunkulu wami.

₁₁₆Ngiphase ngokwezwi lakho,

ukuze ngiphile,

ngingajabhi ngethemba lami.

₁₁₇Ngisekele, ngize ngisindiswe,

ukuze ngiqikelele

ukugcina izimiso zakho njalo.

₁₁₈Uyabalahla bonke abachezuka ezimisweni zakho,

ngokuba ubuqili babo buyize.

₁₁₉Zonke izikhohlakali emhlabeni uzichitha njengamanyela,

ngalokho-ke ngiyabuthanda ubufakazi bakho.

₁₂₀Umzimba wami uyathuthumela

ngenxa yokukwesaba,

ngiyazesaba izehlulelo zakho.

₁₂₁Ngenze ubulungiswa nokulunga;

unganginikeli kwabangicindezelayo.

₁₂₂Qinisekisa inhlalakahle yenceku yakho;

ungabavumeli abazidlayo bangicindezele.

₁₂₃Amehlo ami alangazelela insindiso yakho

nezwi lokulunga kwakho.

₁₂₄Inceku yakho iphathe ngomusa wakho,

ungifundise izimiso zakho.

₁₂₅Ngiyinceku yakho;

ngiphe ingqondo

ukuba ngazi ubufakazi bakho.

₁₂₆Sekuyisikhathi sokuba uSimakade asukume,

ngokuba bawuphulile umthetho wakho.

₁₂₇Ngalokho ngiyayithanda imiyalo yakho kunegolide,

impela kunegolide elicwengekileyo.

₁₂₈Ngakho-ke ngiyavuma

ukuthi imiyalo yakho yonke ilungile;

ngiyazizonda zonke izindlela zamanga.

₁₂₉Ubufakazi bakho buyamangalisa,

yingakho umphefumulo wami ubugcina.

₁₃₀Ukwambulwa kwamazwi akho kunika ukukhanya,

kuyabaqondisa abangenalwazi.

₁₃₁Ngivula umlomo wami, nginelukuluku,

ngokuba ngiyayilangazelela imiyalo yakho.

₁₃₂Bheka ngakimi,

ube nomusa kimi njengoba wenza

kwabathanda iGama lakho.

₁₃₃Izinyathelo zami ziqinise ezwini lakho;

mangingabuswa nayinye inkohlakalo.

₁₃₄Ngihlenge ekucindezelweni ngabantu,

ukuze ngizigcine iziyalezo zakho.

₁₃₅Yikhanyisele inceku yakho ubuso bakho,

ngifundise izimiso zakho.

₁₃₆Kugobhoza imifula yamanzi emehlweni ami,

ngokuba abawugcini umthetho wakho.

₁₃₇Wena Simakade ulungile;

izehlulelo zakho ziqotho.

₁₃₈Ubufakazi bakho ubuqoke ngokulunga

nangokwethembeka okukhulu.

₁₃₉Ukushisekela kwami kungidlile,

ngokuba izitha zami zikhohliwe ngamazwi akho.

₁₄₀Izwi lakho lihloliwe kakhulu,

yingakho inceku yakho ilithanda.

₁₄₁Ngimncane, ngedelelekile;

nokho iziyalezo zakho angizilibali.

₁₄₂Ukulunga kwakho kungukulunga okuphakade;

umthetho wakho uyiqiniso.

₁₄₃Ukuhlupheka nosizi kungehlele;

imiyalo yakho iyintokozo yami.

₁₄₄Ukulunga kobufakazi bakho

kumi ingunaphakade;

ngiphe ukuqonda ukuze ngiphile.

₁₄₅Ngizwe Simakade,

ngikhala ngenhliziyo yami yonke;

ngizozigcina izimiso zakho.

₁₄₆Ngikhala kuwe, ngisindise;

ngizobugcina ubufakazi bakho.

₁₄₇Ngivuka ekuseni ngovivi ngikhale;

ngiyawethemba amazwi akho.

₁₄₈Ngiqwasha kuze kube kwesikabhadakazi,

ukuze ngizindle ngezwi lakho.

₁₄₉Simakade, yizwa izwi lami

ngokomusa wakho,

ungiphilise ngokwezehlulelo zakho.

₁₅₀Bayasondela abalandela inkohlakalo;

bakude nomthetho wakho.

₁₅₁Wena Simakade useduze;

imiyalo yakho yonke iyiqiniso.

₁₅₂Kade ngazi kwasemandulo ngobufakazi bakho

ukuthi ubusekele kuze kube phakade.

₁₅₃Bheka ukuhlupheka kwami, ungikhulule,

ngokuba angiwukhohlwa umthetho wakho.

₁₅₄Mela indaba yami, ungihlenge,

ungiphilise ngokwezwi lakho.

₁₅₅Ukusindiswa kukude nezikhohlakali,

ngokuba azizifuni izimiso zakho.

₁₅₆Ububele bakho, Simakade, bukhulu;

ngiphilise ngokwezehlulelo zakho.

₁₅₇Abangizingelayo nabayizitha zami baningi,

kodwa angichezuki emiyalelweni yakho.

₁₅₈Uma ngibona amambuka, ngiyadikibala,

ngokuba awaligcini izwi lakho.

₁₅₉Bheka ukuthi ngizithanda

kangakanani iziyalezo zakho, Simakade;

ngiphilise ngokomusa wakho.

₁₆₀Amazwi akho wonke ayiqiniso;

zonke izehlulelo zakho ezilungileyo

zimi kuze kube phakade.

₁₆₁Izikhulu zingizingela ngaphandle kwesizathu,

kodwa inhliziyo yami yesaba izwi lakho.

₁₆₂Ngiyathokoza ngezwi lakho

njengomuntu ejabulela impango eningi.

₁₆₃Amanga ngiyawazonda, futhi ngiyawenyanya,

kodwa ngiyawuthanda umthetho wakho.

₁₆₄Kasikhombisa ngosuku,

ngiyakudumisa ngezehlulelo zokulunga kwakho.

₁₆₅Abathanda umthetho wakho

banokuthula okukhulu;

akukho sikhubekiso kubo.

₁₆₆Simakade, ngethemba insindiso yakho,

futhi nemiyalo yakho ngiyayigcina.

₁₆₇Umphefumulo wami ugcina ubufakazi bakho;

ngibuthanda kakhulu.

₁₆₈Ngigcina iziyalezo zakho nemiyalo yakho,

ngokuba izindlela zami zonke

ziphambi kwakho.

₁₆₉Ukukhala kwami makufinyelele phambi

kwakho, Simakade;

ngiqondise ngokwezwi lakho.

₁₇₀Ukunxusa kwami makufinyelele phambi kwakho;

ngihlenge ngokwezwi lakho.

₁₇₁Umlomo wami mawuchichime indumiso,

ngokuba uyangifundisa izimiso zakho.

₁₇₂Ulimi lwami malukhulume izwi lakho,

ngokuba imiyalo yakho yonke ilungile.

₁₇₃Isandla sakho masibe lusizo kimi,

ngokuba ngikhethe iziyalezo zakho.

₁₇₄Ngiyayilangazelela

insindiso yakho, Simakade;

umthetho wakho uyintokozo yami.

₁₇₅Umphefumulo wami mawuphile, ukudumise;

izehlulelo zakho mazingisize.

₁₇₆Ngiduka njengemvu elahlekileyo;

funa inceku yakho,

ngokuba angiyikhohlwa imiyalo yakho.