AMahubo 109

₁Ungathuli, Nkulunkulu wokubonga kwami.

₂Ngokuba umlomo womubi nomlomo wenkohliso kumelene nami,

kuqamba amanga ngami.

₃Bangizungeza ngamazwi enzondo,

balwa nami kungekho sizathu.

₄Ngenxa yothando lwami bayangizonda,

mina ngisemkhulekweni njalo.

₅Bangibuyisele okubi ngokuhle,

nenzondo ngothando lwami.

₆Beka isikhohlakali phezu kwakhe,

makume omelene naye

ngasesandleni sakhe sokunene.

₇Ekwehlulelweni kwakhe makalahlwe yicala,

umkhuleko wakhe mawube yisono.

₈Mazibe yingcosana izinsuku zakhe,

isikhundla sakhe sithathwe ngomunye.

₉Abantwana bakhe babe yizintandane,

umkakhe abe ngumfelokazi.

₁₀Abantwana bakhe mababe yizintandane, baphanze,

bacele bekude nezindawo zabo eseziyincithakalo.

₁₁Umtshelekisi makakubambe konke anakho,

abafokazi baphange izithelo zomsebenzi wakhe.

₁₂Makungabi bikho omenzela umusa,

futhi kungabi bikho ohawukela

izintandane zakhe.

₁₃Abozalo lwakhe mababhujiswe,

lesulwe igama labo

esizukulwaneni esisazolandela.

₁₄Ububi bokhokho bakhe mabukhumbuleke kuSimakade,

masingesulwa isono sikanina.

₁₅Mabahlale bephambi kukaSimakade njalo,

ukuze akuqede ukukhunjulwa kwabo emhlabeni.

₁₆Kungoba wayengakhumbuli ukwenza umusa,

kodwa ezingela umuntu owentulayo,

ompofu nodabukileyo enhliziyweni,

ukuba ababulale.

₁₇Ethanda ukuqalekisa,

ngakho isiqalekiso sehlela phezu kwakhe,

engathokozi ngesibusiso,

isibusiso saba kude naye.

₁₈Wagqoka isiqalekiso njengengubo,

sangena ezibilini zakhe njengamanzi,

nasemathanjeni akhe njengamafutha.

₁₉Lokhu makube kuye

njengengubo ayigqokayo,

nebhande azibopha ngalo njalo.

₂₀Lokhu makube ngumvuzo wezitha

ovela kuSimakade,

nowabakhuluma kabi ngomphefumulo wami.

₂₁Kepha Wena Simakade, Nkosi yami,

ngiphathe ngomusa ngenxa yegama lakho,

njengokuba umusa wakho ulungile, ngisindise.

₂₂Ngokuba ngingompofu nontulayo,

inhliziyo yami ilimele.

₂₃Njengethunzi eselilide ngiyashabalala,

ngipheshulwa njengesikhonyane.

₂₄Amadolo ami ayaxega ngenxa yokuzila ukudla,

nomzimba wami awusanonophele.

₂₅Ngibe yisethuko sabo,

bangibheka qede banikine amakhanda.

₂₆Ngisize, Simakade Nkulunkulu wami,

ngisindise ngokomusa wakho,

₂₇ukuze bazi ukuthi lokhu kuyisandla sakho,

nguWena Simakade okwenzileyo.

₂₈Mabaqalekise,

kodwa Wena ubusise,

lapho bevuka, mabathelwe ngehlazo,

kodwa inceku yakho ithokoze.

₂₉Abamelene nami mabembeswe amahloni,

bagqoke ukujabha njengesembatho.

₃₀USimakade ngiyombonga ngomlomo wami,

ngimdumise esixukwini.

₃₁Ngokuba umi kwesokunene sontulayo,

ukuze amsindise kulabo abasongela

umphefumulo wakhe.