AMahubo 108

₁Inhliziyo yami yethabile,

Nkulunkulu, ngizohlabelela,

ngihube ngakho konke okwami.

₂Vukani, lugubhu nehabhu!

Ngizakuvusa ukusa.

₃Simakade ngizokubonga phakathi kwabantu,

ngikudumise phakathi kwezizwe,

₄ngokuba umusa wakho mkhulu phezu kwamazulu,

ukwethembeka kwakho kufinyelela emafini.

₅Phakama Nkulunkulu, phezu kwamazulu!

Mayibe phezu komhlaba wonke

inkazimulo yakho.

₆Abathandekayo bakho mabakhululwe,

sindisa ngesandla sakho sokunene, ungiphendule.

₇UNkulunkulu ukhulumile ebungcweleni bakhe, wathi:

“Ngiyakwethaba,

ngiyakulidabula iShekhemi,

ngisilinganise isigodi iSukhothi.

₈Ngowami uGileyadi,

ngowami uManase,

u-Efrayimi uyisivikelo sekhanda lami,

uJuda uyintonga yami yokubusa.

₉UMowabi uyisitsha sami sokugezela;

phezu kuka-Edomi

ngiphonsa isicathulo sami;

phezu kweFilistiya,

ngimemeza ngokunqoba.”

₁₀Ngubani oyakungiyisa emzini oyinqaba na?

Ngubani oyakungiholela kwa-Edomi na?

₁₁Akunguwe yini Nkulunkulu osilahlileyo na?

Nkulunkulu, awusaphumi nezimpi zethu.

₁₂Siphe ukuba sisizakale ekuhluphekeni,

ngokuba ukusiza komuntu kuyize.

₁₃NgoNkulunkulu siyakwenza izenzo zamandla,

Yena uyofihliza izitha zethu.