IZaga 31

₂“Hhayi, ndodana yami;

hhayi!

Ndodana yesibeletho sami,

kwenzenjani, ndodana yezifungo zami na?

₃Ungabaniki abesifazane amandla akho,

nezindlela zakho, kwababhubhisa amakhosi.

₄“Akusikho okwamakhosi, Lemuweli,

ukuphuza iwayini.

Akusikho nje nempela okwababusi ukuthanda

uphuzo olunamandla;

₅funa baphuze bese bekhohlwa yizimiso,

baguqule amalungelo abahluphekayo.

₆Nika uphuzo olunamandla kobhubhayo,

newayini konomunyu enhliziyweni.

₇Uyophuza, akhohlwe ubuphofu bakhe,

angabe esalukhumbula usizi lwakhe.

₈“Khulumela isimungulu,

umele ilungelo labo bonke abahluphekayo.

₉Vula umlomo wakho wehlulele ngokulunga,

uvikele amalungelo abampofu nabantulayo.”

₁₀Ngubani ongathola umfazi woqobo na?

Uyigugu eledlula inani lamarubhi.

₁₁Inhliziyo yomyeni wakhe iyamethemba,

ayiyukulahlekelwa yinzuzo.

₁₂Uyayenzela okuhle, hhayi okubi,

zonke izinsuku zokuphila kwakhe.

₁₃Ufuna uboya bezimvu nefilakisi,

asebenze ngokuzimisela ngezandla zakhe.

₁₄Unjengemikhumbi yabahwebi,

ukudla kwakhe ukulanda kwelikude izwe.

₁₅Uvuka ngovivi alungisele umndeni

wakhe ukudla,

abele amantombazane amsizayo

imisebenzi azoyenza.

₁₆Ubona insimu, ayithenge;

ngezikhwepha zakhe, utshala isivini.

₁₇Ubhinca amandla okhalo lwakhe,

aqinise izingalo zakhe.

₁₈Uyaqaphela ukuthi akwenzayo kunenzuzo,

isibani sakhe asincinywa nasebusuku.

₁₉Ubeka izandla zakhe

othini lokuphotha izintambo,

neminwe yakhe ibamba

insimbi kakotini.

₂₀Uyamvulela ohluphekayo isandla sakhe,

yebo, uyabapha nabantulayo.

₂₁Akanaluvalo ngabendlu yakhe

ngesikhathi seqhwa,

ngokuba umndeni wakhe

uwugqokisa ezibubende.

₂₂Uyazenzela izingubo zokuzemboza;

izembatho zelineni elicolekileyo nokubukhwebezane.

₂₃Indoda yakhe iyahlonishwa emasangweni

ngesikhathi ihleli namalunga ezwe.

₂₄Wenza izingubo zelineni, azithengise,

athengisele abahwebi amabhande.

₂₅Wembethe amandla nesithunzi,

isikhathi esizayo usemukela ngentokozo.

₂₆Uma evula umlomo wakhe

kuphuma ukuhlakanipha,

nesifundiso somusa sisolimini lwakhe.

₂₇Unakekela okwenzeka emzini wakhe,

akasidli isinkwa sobuvila.

₂₈Abantwana bakhe bayasukuma bambusise;

nendoda yakhe iyamtusa, ithi:

₂₉“Baningi abesifazane abakhutheleyo,

kepha wena ubedlula bonke.”

₃₀Ubuhle buyinkohliso,

nokubukeka kuyize,

kepha owesifazane

owesaba uSimakade uyakudunyiswa.

₃₁Mnike isabelo emsebenzini wezandla zakhe,

mabawudumise umsebenzi wakhe emasangweni.