IZaga 30

₂“Impela ngiyisiwula kunabanye abantu;

anginakho ukuqonda komuntu.

₃Angifundanga ukuhlakanipha,

ukuze ngazi oNgcwele.

₄Ngubani owenyukele ezulwini,

wabuye wehla na?

Ngubani oqoqele umoya

ezandleni zakhe na?

Ngubani osonge amanzi

ngengubo yakhe na?

Ngubani omise yonke

imikhawulo yomhlaba na?

Ngubani igama lakhe,

ngubani igama lendodana yakhe;

ukhona yini olaziyo na?

₅“Wonke amazwi kaNkulunkulu ahloliwe;

uyisihlangu kwabaphephela kuye.

₆Ungenezeli emazwini akhe, funa akusole,

ufunyanwe ungumqambimanga.

₇“Zimbili izinto engizicela kuwe ngingakafi;

ungangincishi zona.

₈Dedisela kude nami okuyize namanga,

unganginiki ubuphofu noma ingcebo,

kepha ngiphe isinkwa esinganeleyo,

₉funa ngisuthe, bese ngikuphika, ngithi:

‘USimakade ungubani na?’

funa ngibe mpofu, ngebe,

ngilihlambalaze igama likaNkulunkulu wami.

₁₀“Ungayihlebi inceku enkosini yayo,

funa ikuqalekise, ube necala.

₁₁“Kukhona isizukulwane esiqalekisa uyise,

nesingambusisi unina.

₁₂Lesi yisizukulwane esizibona simsulwa

emehlweni aso,

esingahlanzwanga insila yaso.

₁₃Kunesizukulwane esiziqhenya kakhulu,

futhi singamaqhalaqhala.

₁₄Isizukulwane esimazinyo ayizinkemba,

namazinyo emihlathi yaso

ayimimese yokuqeda abampofu emhlabeni,

nabasweleyo kubantu.

₁₅“Umsundu unamadodakazi amabili, athi:

‘Siphe, siphe.’

“Kukhona izinto ezintathu ezingasuthi,

nezine ezingasho

ukuthi: ‘Kwanele!’:

₁₆indawo yabafileyo,

isibeletho soyinyumba,

umhlabathi ongeneliswa ngamanzi,

nomlilo ongasho ukuthi:

‘Sekwanele!’

₁₇“Iso eliklolodela uyise

nelidelela ukulalela unina

liyokopolotwa ngamagwababa asemfuleni,

lidliwe ngamachwane okhozi.

₁₈“Kukhona izinto ezintathu

ezingimangalisa kakhulu,

yebo, ezine engingazaziyo:

₁₉indlela yokhozi emkhathini,

indlela yenyoka edwaleni,

indlela yomkhumbi phakathi nolwandle

nendlela yendoda entombini.

₂₀“Injena-ke indlela yowesifazane ophingayo:

uyadla, bese esula

umlomo wakhe, athi:

“Angenzanga okubi.”

₂₁“Umhlaba uyazamazama phansi kwezinto ezintathu,

yebo, phansi kwezine ongakwazi ukuzithwala:

₂₂lapho inceku ibekwa iba yinkosi,

nesiwula sisutha ngenxa yokudla okwanele,

₂₃nalapho isaliwakazi sigcagca,

nencekukazi ithatha indawo yenkosikazi yayo.

₂₄“Kukhona izinto ezine ezincane emhlabeni,

kodwa zihlakaniphe kakhulu:

₂₅izintuthwane ziyisizwe esingenamandla,

kanti ziyalungisa ukudla kwazo ehlobo;

₂₆izimbila ziyisizwe esibuthakathaka,

kanti ziyakha izindlu zazo edwaleni;

₂₇izinkumbi azinankosi,

kodwa ziyaphuma zonke ngamaviyo;

₂₈isibankwa ungasibamba ngezandla zombili,

kanti sisendlini yenkosi.

₂₉“Kukhona izinto ezintathu ezinyathela ngesizotha,

yebo, ezine ezihamba ngesithunzi:

₃₀ingonyama, iqhawe ezilwaneni,

ayihlehli phambi kwanoma yisiphi esinye;

₃₁ihhashi lempi, impongo,

nenkosi lapho ihola impi yayo.

₃₂“Uma wenze ubuwula waziphakamisa,

noma wakha icebo elibi, thula.

₃₃Ngokuba njengoba ukuphehla ubisi

kuveza ibhotela,

uma ucindezela ikhala kuphuma igazi;

kanjalo uma ucindezela ulaka

udala ingxabano.”