IZaga 24

₁Ungabi namhawu ngabantu ababi,

ungafisi ukuba nabo.

₂Ngokuba inhliziyo yabo iceba ubudlova,

nezindebe zabo zibhunga inkathazo.

₃Indlu yakhiwa ngokuhlakanipha,

iqiniswe ngokuqonda.

₄Amakamelo agcwaliswa ngolwazi,

nangayo yonke ingcebo enqabileyo neyigugu.

₅Umuntu ohlakaniphileyo wedlula onamandla,

nonolwazi wedlula onezikhwepha.

₆Ngokucabanga okwephusile ungaphaka impi,

nokunqoba kusebuningini babeluleki.

₇Ukuhlakanipha kuphakeme kakhulu esiwuleni,

sona asiwuvuli umlomo waso esangweni.

₈Ocabanga ukwenza okubi

uyakubizwa ngokuthi

owenza amacebo amabi.

₉Ukuceba ubuwula kuyisono,

nobhinqayo uyisinengiso kubantu.

₁₀Uma uxega amadolo ngosuku lokuhlupheka,

amandla akho mancane.

₁₁Bahlenge abayiswa ekufeni,

ubambe abantengantenga beyobulawa.

₁₂Uma uthi:

“Bheka, besingakwazi lokhu;”

akakuqondi yini lowo

ohlola izinhliziyo na?

Nolonda umphefumulo wakho akakwazi na?

Futhi akayukuphindisela yini kumuntu

ngokwemisebenzi yakhe na?

₁₃Ndodana yami,

yidla uju, ngokuba lumnandi;

uju olusemakhekhebeni luyanambitheka emlonyeni.

₁₄Yazi ukuthi kunjalo

ukuhlakanipha emphefumulweni wakho;

uma ukutholile, likhona ikusasa,

nethemba lakho aliyukushabalala.

₁₅Wena sikhohlakali ungayicutheli indlu yolungileyo,

ungayibhubhisi indawo yakhe yokuphumula,

₁₆ngokuba noma olungileyo angawa kasikhombisa,

uyobuye avuke,

kepha izikhohlakali ziyowiswa ngokubi.

₁₇Ungathokozi lapho isitha sakho siwa,

nenhliziyo yakho mayingajabuli ngokukhubeka kwaso,

₁₈funa uSimakade akubone lokho,

kube kubi phambi kwakhe,

ayisuse intukuthelo yakhe kuso.

₁₉Ungazikhathazi ngabenza okubi,

ungabi namhawu ngezikhohlakali.

₂₀Ngokuba omubi akayukuba nalo ikusasa,

nesibani sezikhohlakali siyakucima.

₂₁Ndodana yami,

mesabe uSimakade nenkosi,

ungazihlanganisi nabamelana nabo,

₂₂ngokuba inhlekelele izobehlela ngokuzuma.

Ngubani owazi ukubhujiswa

okungalethwa yibo bobabili na?

akukuhle ukubheka ubuso

bomuntu lapho wehlulelwa.

₂₄Othi esikhohlakalini:

“Ulungile,”

abantu bayakumqalekisa,

nezizwe ziyakumhlamuka.

₂₅Kwabamthethisayo kuyokuba mnandi,

kwehlele phezu kwabo isibusiso esihle.

₂₆Impendulo eyiqiniso injengokuqabula ezindebeni.

₂₇Qeda umsebenzi wakho ngaphandle,

uzilungiselele wona ensimini yakho,

emveni kwalokho yakha indlu yakho.

₂₈Ungabi ngufakazi

omelana nomakhelwane wakho kungenasizathu;

uyakukhohlisa ngezindebe zakho na?

₂₉Ungabosho ukuthi:

“Njengalokho enzile kimi,

kanjalo ngiyakwenza kanjalo kuye;

ngizakuphindisela kuye njengokwezenzo zakhe.”

₃₀Ngedlula ngasensimini yomuntu oyivila,

nasesivinini somuntu ongenangqondo;

₃₁bheka, kwakumile ukhula lwameva,

kwembozwe gimbici yimbabazane,

nomthangala okubiyeleyo udilikele phansi.

₃₂Mina ngakubona lokho, ngacabanga;

ngabona, ngathola isifundo sokuthi:

₃₃ngokozela kancane,

nokuthatha isihlwathi,

usonge izandla kuze kuyolalwa,

₃₄ubuphofu behlela

phezu kwakho ube njengomhambuma,

weswele njengebutho

elihlale lithwele isihlangu.