IZaga 21

₁Inhliziyo yenkosi injengemifula yamanzi

esandleni sikaSimakade,

uyiphendula iye noma kuphi

lapho ethanda khona.

₂Zonke izindlela zomuntu

zimsulwa emehlweni akhe,

kodwa nguSimakade ohlolisisa izinhliziyo.

₃Ukwenza ukulunga nobulungiswa

kuyathandeka kuSimakade,

ngaphezu kwemihlatshelo.

₄Amehlo aziqhenyayo,

inhliziyo eqhoshayo,

nentokozo yezikhohlakali, kuyisono.

₅Izinhlelo zokhutheleyo ziholela enzuzweni,

kodwa wonke ophangisayo

ziyomyisa ebuphofini bodwa.

₆Ukuthola ingcebo ngolimi lwamanga

kuyize elidlula njengomhwamuko

nanjengezingibe zokufa.

₇Ubudlova bezikhohlakali buzishonisa phansi,

ngoba zenqaba ukwenza ubulungiswa.

₈Indlela yonecala igwegwile,

kodwa inkambo yolungileyo iqondile.

₉Kungcono ukukhosela ekhoneni lophahla,

kunokuhlala ndlininye nowesifazane onothuthuva.

₁₀Umphefumulo wesikhohlakali ufisa okubi;

umakhelwane waso

akafumani sisa emehlweni aso.

₁₁Lapho isedeleli sijeziswa,

ongenalwazi uyahlakanipha,

nalapho ohlakaniphileyo efundiswa,

uthola ulwazi.

₁₂Olungileyo uyayibhekisisa indlu yomubi;

izikhohlakali ziqumbeka phansi, zibhubhe.

₁₃Ovala indlebe ekukhaleni kwabampofu,

naye uyokhala angaphendulwa.

₁₄Isipho esikhishwa ekusithekeni sibohlisa ulaka,

nomfumbathiso obuthukuswe esifubeni

uyayidambisa intukuthelo enkulu.

₁₅Kuyintokozo kolungileyo ukwenza ubulungiswa,

kepha kuyimbubhiso kwabenza inkohlakalo.

₁₆Umuntu oweduka endleleni yokuhlakanipha

uyakuphumula ebandleni labafileyo.

₁₇Othanda injabulo uyakuba mpofu,

nothanda iwayini namafutha akayukuceba.

₁₈Isikhohlakali siyinhlawulo kolungileyo,

kanjalo nombuluzayo, esikhundleni soqotho.

₁₉Kungcono ukuhlala ezweni eliyihlane,

kunokuhlala nowesifazane onochuku nonolaka.

₂₀Kukhona ingcebo enxanelekayo

namafutha endlini yohlakaniphileyo,

kepha umuntu oyisiwula uyakugwinya.

₂₁Olandela ukulunga nokwethembeka

ufumana ukuphila, ukulunga, nodumo.

₂₂Ohlakaniphileyo angenyukela emzini wamaqhawe,

ayiwise inqaba athembele kuyo.

₂₃Ogcina umlomo wakhe nolimi lwakhe

ulonda umphefumulo wakhe ezinsizini.

₂₄Ozidlayo nozigabisayo yisedeleli igama lakhe,

yena owenza konke ngokuziphakamisa okukhulu.

₂₅Isifiso sevila siyalibulala,

ngokuba izandla zalo

ziyenqaba ukusebenza.

₂₆Onomhobholo ufisa usuku lonke,

kepha olungileyo uyapha,

angagodli lutho.

₂₇Umhlatshelo wezikhohlakali uyisinengiso;

kakhulu kangakanani-ke

uma ulethwa ngenhloso embi.

₂₈Ufakazi wamanga uyakubhujiswa,

kepha umuntu olalelayo angakhuluma njalo.

₂₉Umuntu okhohlakele uqinisa ubuso,

kepha oqotho uyayinaka indlela yakhe.

₃₀Akukho ukuhlakanipha,

akukho ukuqonda,

asikho iseluleko,

okungamelana noSimakade.

₃₁Ihhashi lilungiselwa usuku lokulwa,

kepha ukunqoba kungokukaSimakade.