IZaga 14

₁Owesifazane ohlakaniphileyo uyayakha indlu yakhe,

kodwa oyisiwula uyibhidliza ngezandla zakhe.

₂Ohamba ngobuqotho uyamesaba uSimakade,

kodwa ozindlela zakhe zigwegile uyamedelela.

₃Emlonyeni wesiwula kuhluma ukuziqhenya,

kepha izindebe zabahlakaniphileyo ziyabalondoloza.

₄Lapho kungenazinkomo khona umkhombe awunalutho,

kepha isivuno esikhulu siba khona

ngenxa yamandla ezinkabi.

₅Ufakazi weqiniso akawaqambi amanga,

kodwa ufakazi wamanga uphafuza inkohliso.

₆Isedeleli sifuna ukuhlakanipha kodwa singakutholi,

kanti ulwazi lutholakala kalula koqondayo.

₇Suka phambi komuntu oyisiwula,

ngokuba lapho awunakuwathola

amazwi anolwazi.

₈Ukuhlakanipha koqondayo kungukuqonda indlela yakhe,

kepha ubuwula beziwula buyinkohliso.

₉Iziwula ziyawudelela umnikelo wecala,

kepha kwabaqotho wemukelekile.

₁₀Inhliziyo iyabazi ubuhlungu bayo,

kodwa umfokazi akanakuhlanganyela entokozweni yayo.

₁₁Indlu yezikhohlakali iyabhujiswa,

kepha ithende labaqotho liyachuma.

₁₂Kukhona indlela

ebonakala sengathi ilungile kumuntu,

kepha ukuphela kwayo kuyindlela yokufa.

₁₃Noma kuhlekwa inhliziyo inobuhlungu,

ukuphela kwentokozo kulusizi.

₁₄Umuntu ohlehlayo uyothola umvuzo

wezindlela zakhe,

kodwa olungileyo uvuna akutshalileyo.

₁₅Ongenalwazi ukholwa yikho konke,

kodwa ohlakaniphileyo uyaziqaphela izinyathelo zakhe.

₁₆Ohlakaniphileyo uyesaba,

futhi uyadeda ebubini,

kodwa isiwula siyaqhosha,

asinaki lutho.

₁₇Umuntu onesififane wenza ubuwula,

nomuntu onamacebo amabi uyazondwa.

₁₈Abangenalwazi badla ifa lobuwula,

kepha abanokuqonda baqheliswa ngolwazi.

₁₉Ababi bakhothama phambi kwabalungileyo,

nezikhohlakali, emasangweni abalungileyo.

₂₀Ompofu uyazondwa ngisho ngumakhelwane wakhe,

kepha ocebileyo uthandwa ngabaningi.

₂₁Owedelela umakhelwane wakhe uyona,

kodwa lowo onomusa kwabampofu ubusisiwe.

₂₂Abaduki yini abaceba okubi na?

Umusa neqiniso kungokwabahlela okuhle.

₂₃Wonke umshikashika unenzuzo,

kepha amazwi omlomo

abanga ukuswela kuphela.

₂₄Umqhele wabahlakaniphileyo uyingcebo yabo,

umgexo weziwula ungubuwula.

₂₅Ufakazi weqiniso uhlenga imiphefumulo,

kepha ophafuza amanga unenkohliso.

₂₆Ekumesabeni uSimakade kunethemba elinamandla;

lokho kubantwana bakhe kuyakuba yisiphephelo.

₂₇Ukwesaba uSimakade kungumthombo wokuphila,

ukuze umuntu adede ezingibeni zokufa.

₂₈Udumo lwenkosi lusebuningini babantu ebabusayo,

kepha ukuswela abantu

kungukubhubha kombusi.

₂₉Owephuzayo ukuthukuthela unokuqonda okukhulu,

kepha lowo othukuthela ngokushesha

uphakamisa ubuwula.

₃₀Ingqondo enokuthula inikeza ukuphila emzimbeni,

kodwa umhawu ukubolisa amathambo.

₃₁Ocindezela ompofu usola uMenzi wakhe,

kodwa onomusa kontulayo

uhlonipha uMenzi wakhe.

₃₂Isikhohlakali siqunjwa phansi ukukhohlakala kwaso,

kodwa olungileyo unenqaba

ngisho ekufeni kwakhe.

₃₃Ukuhlakanipha kuhlala enhliziyweni yonokuqonda,

kodwa eziwuleni, akwaziwa.

₃₄Ukulunga kuyasiphakamisa isizwe,

kodwa ukona kuyihlazo kubantu.

₃₅Isisa senkosi sisencekwini ehlakaniphileyo,

kepha intukuthelo yayo

ikulabo abenza okuyihlazo.