UNahumi 3

₁Maye kuwe muzi ochitha igazi!

Wonke ugcwele inkohliso nempango,

ukuphanga akupheli.

₂Kuqhuma isiswebhu,

nomsindo wokugodlozela kwamasondo,

nogabadula kwamahhashi,

nokugxuma kwezinqola.

₃Abagibeli bamahhashi bayawagadulisa,

kumenyezela inkemba,

kunyazime ukhonto,

baningi ababuleweyo

nezindumbu ezidindilizile,

akukho ukuphela kwezidumbu;

abantu bayakhubeka ngezidumbu zabo,

₄ngokuba budlangile ubufebe

besifebe esibukekayo,

umpetha wokuyenga,

umkhunkuli othengisa izizwe ngobufebe bakhe,

nemindeni ngokukhunkula kwakhe.

₅Uyabona-ke, ngimelene nawe;

ngiyakuphakamisa isidwaba sakho

sikwemboze ubuso,

ngikhombise izizwe ubunqunu bakho,

nemibuso ihlazo lakho.

₆Ngiyakuphosa phezu kwakho okunengekayo,

ngikubukele phansi,

ngikwenze ube yinhlekisa.

₇Kuyakuthi bonke abakubonayo bakubalekele, bathi:

“INineve isiyincithakalo,

ngubani oyakulizwela na?

Ngiyakubafunaphi abaduduzi bakho na?”

₈Umuhle yini wena kuneNo Amoni

elaliphakathi kwemifula,

lizungezwe ngamanzi,

ugange lwalo kuwulwandle,

nodonga lwalo kungamanzi na?

₉IKhushe neGibhithe kwakungamandla alo angenakuphela;

uPhuthi namaLibhiya kungabasizi bakho.

₁₀Nalo laya ekuthunjweni.

Ekuthunjweni izingane zalo zaphahlazwa

ezinhlanganweni zemigwaqo;

benza unkatho ngezikhulu zalo,

bonke abaholi balo baboshwa ngamaketango.

₁₁Nawe uyakudakwa, ufihlwe;

uyakufuna inqaba yokucashela izitha.

₁₂Zonke izinqaba zakho ziyimikhiwane

enamakhiwane okuqala asevuthiwe;

uma inyakaziswa awela emlonyeni wodlayo.

₁₃Bheka nje, abantu bakho

onabo bangamanina.

Amasango ezwe lakho avulekele izitha zakho,

umlilo uyakungqongqisa imigoqo yakho.

₁₄Zikhelele amanzi ngoba uzovinjezelwa,

uqinise izinqaba zakho;

uxove udaka, ubumbe izitini.

₁₅Lapho uyakukungqongqiswa ngumlilo,

udliwe yinkemba,

ikudle njengesikhonyane,

zandise njengokhumbintethe,

uzandise njengesikhonyane!

₁₆Wandisile abahwebi bakho

ukwedlula izinkanyezi zezulu;

isikhonyane sahluba,

qede sandizela kude.

₁₇Abalindi bakho banjengokhumbintethe,

nezikhulu zakho zifana nequlu lesikhonyane

sihlezi odongeni ngosuku lwamakhaza,

kuthi lapho kuphuma ilanga sindize,

singabe sisaziwa ukuthi sikuyiphi indawo.

₁₈Abelusi bakho balele,

nkosi yase-Asiriya;

abahloniphekileyo bakho bayaphumula;

abantu bakho bahlakazekele ezintabeni,

akekho obaqoqayo.

₁₉Akukho ukwelashwa kokuphuka kwakho;

isilonda sakho sinzima;

bonke abezwa umbiko ngawe bashaya ihlombe,

ngokuba ngubani obungadlulelanga njalo

phezu kwakhe ububi bakho na?