NgokukaMakhu 6

₁UJesu wasuka lapho, waya ezweni lakubo; abafundi bakhe bamlandela. ₂Selifikile isabatha, waqala ukufundisa esinagogeni. Abaningi ababelalele bamangala, bathi: “Ngabe lo ukuthatha kuphi lokhu na? Kuhlakanipha kuni lokhu akunikiwe na? Zimangaliso zini futhi lezi azenza ngezandla zakhe? ₃Lo akusiye yini umbazi, indodana kaMariya, nomfowabo kaJakobe, uJose, uJuda noSimoni na? Nodadewabo abekho yini lapha phakathi kwethu na?”

Base bekhubeka ngaye.

₄UJesu wayesethi kubo: “Umphrofethi akadelelwa ezizweni, ngaphandle kwelakubo, nasezihlotsheni zakhe, nakwabendlu yakwabo.”

₅Akakwazanga ukwenza lapho nesisodwa isimangaliso, ngaphandle nje kokubeka izandla phezu kwabagulayo abayingcosana; wabaphulukisa. ₆Wamangala ngokungakholwa kwabo.

Wahamba imizi ngemizana efundisa.

₇UJesu wayesebiza abali-12, waqala ukubathuma ngababili, wabanika igunya lokukhipha omoya abangcolileyo. ₈Wabayala ukuba bangaphathi lutho lwendlela, baphathe kuphela udondolo; bangaphathi sinkwa, sikhwama sokuthekela, namali emigodleni yabo. ₉Bafake izicathulo, kepha bangembathi amabhantshi amabili. ₁₀Wayesethi kubo: “Nakuyiphi indlu eniyakungenisa kuyo, hlalani kuyo nize nihambe lapho. ₁₁Noma kuyiphi indawo lapho bengayukunamukela khona, nalapho bengayukunilalela khona, anothi uma senisuka kuyo, nithintithe uthuli oluphansi kwezinyawo zenu, lokho kube ngubufakazi kubo.”

₁₂Bahamba-ke beshumayela ukuba abantu baphenduke. ₁₃Bakhipha amadimoni amaningi, bagcoba abaningi abagulayo ngamafutha, babaphulukisa.

₁₄INkosi uHerode yezwa ngalokhu, ngokuba igama likaJesu lase lidumile. Kwakuthiwa uJohane uMbhabhadisi uvukile kwabafileyo, yingakho enza izimangaliso ezingaka kuye. ₁₅Kepha abanye bathi: “Ngu-Eliya;” abanye bathi: “Ngumphrofethi onjengabanye abaphrofethi.”

₁₆Kepha uHerode esekuzwile lokho, wathi: “UJohane, lo engamnquma ikhanda, uvusiwe.”

₁₇UHerode uqobo nguye owayethumele ukuba abanjwe uJohane, wayesemfaka ejele, ngenxa kaHerodiya umkaFiliphu umfowabo, ngokuba wamthatha wamgana. ₁₈Phela uJohane wayethe kuHerode: “Awuvunyelwe ukungena umkamfowenu.”

₁₉Ngakho-ke uHerodiya wambambela igqubu, wafuna ukumbulala, kodwa akabanga nawo amandla. ₂₀UHerode wayemesaba uJohane, emazi ukuthi uyindoda elungileyo, engcwele, futhi wayemvikela. Lapho uHerode emlalela uJohane wayesala ekhathazekile kakhulu, nokho wayethanda ukumlalela.

₂₁Ekugcineni lwafika olungaliyo, lapho uHerode ngosuku lwakhe lokuzalwa wenzela izikhulu zakhe idili; izinduna zempi nabanumzane baseGalile; ₂₂kwase kungena indodakazi kaHerodiya; yasina, yajabulisa uHerode nababehleli naye. Inkosi yathi entombazaneni: “Cela kimi noma yini oyithandayo, ngizakukunika yona.”

₂₃Yafunga kuyo yathi: “Noma yini oyicelayo kimi ngizakukunika yona, noma ngabe yingxenye yombuso wami.”

₂₄Intombazane yaphuma, yathi kunina: “Ngizakucelani na?”

Yena wathi: “Ikhanda likaJohane uMbhabhadisi.”

₂₅Yabuyela enkosini ngokushesha, yacela yathi: “Ngithanda ukuba ungiphe, khona manje ngomcengezi, ikhanda likaJohane uMbhabhadisi.”

₂₆Inkosi yadabuka kakhulu, kodwa ngenxa yesifungo eyayisenzile nangenxa yalabo ababehlezi nayo esidlweni, ayithandanga ukwenqaba. ₂₇Inkosi yayisithuma masinyane ozokwenza lokhu, yamyala ukuba alethe ikhanda likaJohane. Wasuka, wamnquma ikhanda ejele. ₂₈Waliletha ikhanda lakhe ngomcengezi, wayinika intombazane, yona yalinika unina. ₂₉Kwathi ukuba abafundi bakhe bakuzwe lokho, beza, bathatha isidumbu sakhe, basibeka ethuneni.

₃₀Abaphostoli babuthana kuJesu, bambikela konke ababekwenzileyo nabakufundisileyo. ₃₁Wayesethi kubo: “Wozani ngasese, nina nodwa, siye endaweni eyihlane, nihlabe ikhefu.”

Ngokuba babebaningi abezayo nabahambayo, abaze balithola nethuba lokuba badle.

₃₂Base behamba ngomkhumbi, baya ngasese, endaweni eyihlane. ₃₃Abaningi bababona behamba, baqonda ukuthi baya kuphi, base begijima ngezinyawo, besuka kuyo yonke imizana, bafika lapho kuqala kunabo. ₃₄Esehlile uJesu, ephuma esikebheni, wabona isixuku esikhulu, wasihawukela, ngokuba sasinjengezimvu ezingenamelusi; wayeseqala esifundisa okuningi.

₃₅Kwathi isikhathi sesihambile, abafundi bakhe beza kuye, bathi: “Le ndawo iyihlane, futhi seliyozilahla kunina. ₃₆Bahambise ukuba baye ezindaweni eziseduze nasemizaneni ukuze bazithengele ukudla.”

₃₇Wayesephendula, ethi kubo: “Bapheni nina ukudla.”

Bathi kuye: “Sihambe yini siyothenga izinkwa zodenariyu abangama-200, sibaphe badle na?”

₃₈Wathi kubo: “Ninezinkwa ezingaki? Hambani niyobheka.”

Sebazi bathi: “Ziyisihlanu, nezinhlanzi ezimbili.”

₃₉Wabayala ukuba bonke bahlale phansi otshanini obuluhlaza, izigaba ngezigaba. ₄₀Base behlala phansi amaqoqo ngamaqoqo, amanye ngekhulu, amanye ngama-50. ₄₁Wazithatha izinkwa eziyisihlanu nezinhlanzi ezimbili, wabheka ngasezulwini, wazibusisa, wazihlephula izinkwa, wazinika abafundi ukuba bazabele abantu; nezinhlanzi ezimbili wababela bonke zona. ₄₂Bonke badla, basutha. ₄₃Babutha imvuthuluka yezinkwa neyezinhlanzi, kwagcwala iziqabetho ezili-12. ₄₄Abadla izinkwa lapho kwakungamadoda ayizi-5 000.

₄₅UJesu wayesephoqa ngokushesha abafundi bakhe ukuba bangene esikebheni, bamandulele ukuya phesheya eBhethsayida, aze yena ahlakaze isixuku. ₄₆Esevalelisile esixukwini, wahamba waya entabeni ukuyokhuleka. ₄₇Kwathi sekuhlwile, isikebhe siphakathi nolwandle, Yena esele yedwa emhlabathini, ₄₈wababona ukuthi banobunzima obukhulu lapho begwedla, ngokuba umoya wawuphambana nabo. Kwathi ngomlindo wesine wobusuku, weza kubo ehamba phezu kolwandle; kwaba sengathi uyadlula kubo. ₄₉Kepha bambona ehamba phezu kolwandle, bacabanga ukuthi ngumungcwi; bakhala. ₅₀Phela bonke bambona, bethuka.

Kepha washesha wakhuluma nabo, wathi kubo: “Yimani isibindi; yiMina, ningesabi.”

₅₁Wayesekhwela esikebheni ababekuso, umoya wanqamuka; bamangala kakhulu impela phakathi kwabo. ₅₂Ngokuba abakuqondanga okwenzeke ezinkweni, lokhu inhliziyo yabo yayilukhuni.

₅₃Kuthe sebewelile, bafika eGenesaretha, babophela isikebhe lapho osebeni. ₅₄Kwathi bephuma nje esikebheni, abantu bambona uJesu. ₅₅Bagijimela kuzo zonke izifunda, baqala ukuletha abagulayo ngezinhlaka, babayisa lapho bezwe kuthiwa ukhona. ₅₆Kwathi noma kuphi lapho engena khona, emizaneni, emizini, nasemakhaya, babeke abagulayo ezigcawini, bamncenge ukuba bathinte noma umphetho wengubo yakhe kuphela; bonke abamthintayo baphiliswa.