NgokukaMathewu 24

₁Kuthe uJesu esephumile ethempelini, wahamba, kwasondela abafundi bakhe, bamkhombisa izakhiwo zethempeli. ₂Waphendula wathi kubo: “Anikuboni yini konke lokhu na? Ngiqinisile ngithi kini: akuyukushiywa lapha itshe phezu kwelinye elingayikudilizelwa phansi.”

₃Esahleli eNtabeni Yeminqumo, abafundi beza kuye ngasese, bathi: “Sitshele ukuthi lokhu kuyakwenzeka nini, futhi siyakuba yini isibonakaliso sokufika kwakho, nomhla wokuphela na?”

₄UJesu waphendula, wathi kubo: “Qaphelani ningadukiswa muntu. ₅Ngokuba kuyakufika abaningi ngegama lami, bathi: ‘Mina nginguKhristu,’ badukise abaningi. ₆Niyakuzwa ngezimpi, namahemuhemu ezimpi. Nina ningethuki, ngokuba kumele ukuba lokhu kwenzeke, kodwa ukuphela kuyakube kungakafiki. ₇Isizwe siyakuvukela esinye, nombuso uvukele omunye; kuyakuba khona indlala, nokuzamazama komhlaba izindawo ngezindawo. ₈Kepha konke lokho kungukuqala nje kwemihelo.

₉“Ngaleso sikhathi bayakunikhaphela osizini, banibulale, nizondwe yizizwe zonke ngenxa yegama lami. ₁₀Abaningi bayakukhubeka, bakhaphelane, futhi bazondane. ₁₁Kuyakuvela abaphrofethi mbumbulu abaningi, badukise izindimbane zabantu. ₁₂Luyakuphola uthando ngenxa yokwanda kobubi. ₁₃Kepha okhuthazelayo kuze kube sekupheleni, nguyena oyakusindiswa. ₁₄Leli vangeli lombuso liyakushunyayelwa ezweni lonke, kube ngubufakazi ezizweni zonke, andukuba kufike umhla wokuphela.

₁₅“Ngakho-ke uma nibona amanyala anyantisayo, akhuluma ngawo uDaniyeli umphrofethi emi endaweni engcwele – ofundayo makaqaphele ukuthi kusho ukuthini. ₁₆AbaseJudiya mababalekele ezintabeni; ₁₇ophezu kophahla lwendlu, makangehli ukuyothatha okusendlini yakhe; ₁₈osensimini, makangabuyeli emuva ukuyothatha ingubo yakhe. ₁₉Maye, kwabakhulelweyo nabancelisayo ngalezo zinsuku! ₂₀Khulekelani ukuba ukubaleka kwenu kungabi sebusika noma ngesabatha. ₂₁Ngokuba kuyakuba khona usizi olukhulu olungakaze lube khona kwasekuqaleni kwezwe, kuze kube manje, futhi olungasoze lwaba khona. ₂₂Ukuba lezo zinsuku bezingafinyezwanga, bekungesindiswe muntu, kodwa ngenxa yabakhethiweyo ziyakufinyezwa.”

₂₃“Uma umuntu ethi kini: ‘Bhekani, nangu uKhristu,’ noma ethi: ‘Nanguya,’ ningakholwa. ₂₄Ngokuba kuyakuvela okhristu mbumbulu nabaphrofethi bamanga. Bayakuveza izibonakaliso ezinkulu nezimangaliso, ukuze badukise, uma kungenzeka, abakhethiweyo. ₂₅Niyabona-ke, nginitshele kungakenzeki lokho.

₂₆“Ngakho-ke uma bethi kini: ‘Nango usehlane,’ ningayi lapho; noma bethi: ‘Nangu, usendlini,’ ningabakholwa. ₂₇Njengonyazi luphuma empumalanga, lubonakale ngisho entshonalanga, kuyakuba njalo-ke ukufika kweNdodana yomuntu.

₂₈“Noma kuphi lapho kunesidumbu khona, kulapho amanqe ebuthana khona.

₂₉“Masinyane nje emva kosizi lwalezo zinsuku,

₃₀“Khona kuyakubonakala isibonakaliso seNdodana yomuntu ezulwini, bese zikhala zonke izizwe zomhlaba. Zonke ziyakuyibona iNdodana yomuntu iza emafini ezulu, inamandla nenkazimulo enkulu. ₃₁Iyakuthuma izingelosi zayo ngokukhala kwecilongo okukhulu, ziqoqe abakhethiweyo bayo emagumbini omane omhlaba, kusukela emkhawulweni wezulu kuze kube komunye.

₃₂“Fundani emzekelisweni womkhiwane; uma igatsha lawo selithamba, kuhlume amacembe, nisuke senazi-ke ukuthi seliyathwasa ihlobo. ₃₃Kanjalo nani, lapho nibona kwenzeka konke lokhu, yazini ukuthi iNkosi iseduze ngasemnyango. ₃₄Ngiqinisile ngithi kini: lesi sizukulwane asiyukwedlula kungakenzeki konke lokhu. ₃₅Izulu nomhlaba kuyakudlula, kodwa amazwi ami awasoze adlula.

₃₆“Kepha mayelana nalolo lusuku nalelo hora, akekho owazi utho ngalo, ngisho izingelosi zasezulweni, neNdodana uqobo; nguBaba kuphela. ₃₇Ngokuba njengasemihleni kaNowa, kuyakuba njalo ukufika kweNdodana yomuntu. ₃₈Njengasezinsukwini lezo ezandulela uzamcolo babedla, bephuza, beganwa, bendiswa; kwaze kwafika usuku uNowa angena ngalo emkhunjini. ₃₉Abazanga; kwaze kwafika uzamcolo wabakhukhula bonke; kuyakuba njalo nokufika kweNdodana yomuntu. ₄₀Kuyakuba khona ababili ensimini; omunye athathwe, omunye ashiywe. ₄₁Ababili bayakube begaya etsheni lokusila; omunye uyakuthathwa, omunye ashiywe.

₄₂“Ngakho-ke lindani, ngokuba anazi ukuthi iNkosi yenu iyakufika ngaluphi usuku. ₄₃Kepha yazini lokhu ukuthi, ukuba umninindlu ubazi ukuthi isela liyakugasela nini ebusuku, ubeyakulinda, angavumi ukuba indlu yakhe igqekezwe. ₄₄Ngakho-ke nani hlalani nimi ngomumo, ngokuba iNdodana yomuntu iyakufika ningazelele.

₄₅“Pho ngubani oyinceku ethembekileyo nehlakaniphileyo, inkosi yayo eyibeke ukuba yengamele abendlu yayo, ibanike ukudla ngesikhathi esifaneleyo na? ₄₆Ibusisiwe leyo nceku okuyakuthi lapho inkosi yayo ifika, iyifumane isebenza. ₄₇Ngiqinisile ngithi kini, iyakuyibeka yengamele konke enakho. ₄₈Kepha uma leyo nceku embi ithi enhliziyweni yayo: ‘Inkosi yami isalibele,’ ₄₉bese iqala ukushaya izinceku ezikanye nayo, idle, iphuze nezidakwa, ₅₀inkosi yaleyo nceku iyakufika ngosuku engalulindele nangehora engalaziyo, ₅₁iyinqamule kabili, iyabele isabelo sayo nabazenzisi; kuyakuba khona lapho ukukhala nokugedla amazinyo.”