NgokukaLuka 9

₁UJesu esebabizele kuye abali-12, wabanika amandla negunya lokukhipha amadimoni nokuphilisa abagulayo. ₂Wabathuma ukuba bashumayele ngombuso kaNkulunkulu nokuba baphilise abagulayo. ₃Wathi kubo: “Ningaphathi lutho lwendlela: naludondolo, nasikhwama sokuthekela, nasinkwa, namali; ningawaphathi amabhantshi amabili. ₄Noma yiyiphi indlu eningenisa kuyo, hlalani kuyo, nize nihambe lapho. ₅Bonke abangayukunamukela, anothi uma senisuka kulowo muzi, nithintithe uthuli ezinyaweni zenu, ukuze kube ngubufakazi obumelene nabo.”

₆Baphuma-ke, badabula imizi ngemizi, bevangela, futhi bephilisa abagulayo ezindaweni zonke.

₇Kwathi uHerode, uMthethrakhi, ezwa ngakho konke okwakwenzeka, wadideka kakhulu, ngokuba abanye bathi kuye uJohane uvukile kwabafileyo, ₈abanye bathi u-Eliya uvukile, nabanye bathi kuvuke umphrofethi othile wasemandulo. ₉Kepha uHerode wathi: “UJohane ngamnquma ikhanda; pho-ke ngubani lo engizwa ngaye ngalezi zinto na?”

Wafuna ukumbona.

₁₀Sebebuyile abaphostoli, bamlandisa ngakho konke abakwenzileyo; wabathatha, wahamba nabo ngasese, baya emzini okuthiwa yiBhethsayida. ₁₁Kepha izixuku sezazi ngalokho zamlandela; wazemukela, wakhuluma kuzo ngombuso kaNkulunkulu, wabaphulukisa abadinga ukuphiliswa.

₁₂Kuthe seliyozilahla kunina, abafundi abali-12 beza kuye, bathi: “Baxoshe abantu baye emizaneni nasemakhaya azungezileyo, bangenise khona, ukuba bathole ukudla, ngokuba lapha sisendaweni eyihlane.”

₁₃Wathi kubo: “Bapheni nina ukudla.”

Kepha bathi: “Esinakho yizinkwa eziyisihlanu nezinhlanzi ezimbili kuphela, ngaphandle-ke uma singahamba siyothengela bonke laba bantu ukudla.”

₁₄Lapho kwakukhona amadoda ayelinganiselwa ezi-5 000.

Wathi kubafundi bakhe: “Bahlaliseni ngamaqembu angama-50.”

₁₅Benza kanjalo, babahlalisa bonke. ₁₆Wazithatha izinkwa eziyisihlanu nezinhlanzi ezimbili, wabheka ngasezulwini, wazibusisa, wazihlephula, wazinika abafundi ukuba bazabele isixuku sabantu. ₁₇Badla, basutha bonke, kwabuthwa imvuthuluka eyasala kubo, engamaqoma ali-12.

₁₈Kwathi esakhuleka eyedwa, abafundi benaye, wayesebabuza ethi: “Abantu bathi ngingubani na?”

₁₉Baphendula bathi: “UJohane uMbhabhadisi”, kepha abanye bathi: “Ngu-Eliya”, abanye bathi: “Kuvuke umphrofethi othile wasemandulo.”

₂₀Wayesethi kubo: “Nina-ke nithi ngingubani na?”

UPhethro waphendula wathi: “UnguKhristu kaNkulunkulu.”

₂₁Wabadonsa ngendlebe, wabayala ukuba bangakutsheli muntu lokho, ₂₂wathi: “INdodana yomuntu imelwe ukuhlupheka ngokuningi, ilahlwe ngamalunga nabaphristi abakhulu nezazimthetho, ibulawe, ivuswe ngosuku lwesithathu.”

₂₃Wayesethi kubo bonke: “Uma umuntu ethanda ukungilandela, makazidele, athathe isiphambano sakhe imihla ngemihla, angilandele. ₂₄Ngokuba yilowo nalowo othanda ukusindisa ukuphila kwakhe, uyakulahlekelwa yikho; kepha lowo olahlekelwa ngukuphila kwakhe ngenxa yami, uyakukusindisa. ₂₅Ngokuba kuyakumsiza ngani umuntu ukuzuza izwe lonke, kepha yena alahlekelwe noma alimaze ukuphila kwakhe na? ₂₆Ngokuba yilowo nalowo onamahloni ngami nangamazwi ami, iNdodana yomuntu iyakuba namahloni ngalowo lapho iza ngenkazimulo yayo, nekaYise neyezingelosi ezingcwele. ₂₇Kepha nginitshela iqiniso ukuthi bakhona abanye kwabemi lapha abangayukufa, baze bawubone umbuso kaNkulunkulu.”

₂₈Kwathi cishe emva kwezinsuku eziyisishiyagalombili ekukhulumile lokho, wathatha uPhethro, uJohane, noJakobe; wenyukela nabo entabeni ukuba ayokhuleka. ₂₉Esakhuleka, isimo sobuso bakhe saguquka, nezingubo zakhe zaba mhlophe qwa, zacwebezela. ₃₀Kwase kubonakala amadoda amabili, uMose no-Eliya, bekhuluma naye; ₃₁abonakala ngenkazimulo, ekhuluma naye ngohambo lwakhe okumele aluphothule eJerusalema. ₃₂Kepha uPhethro nababenaye babelele zwi, kodwa kuthe sebephapheme, babona inkazimulo yakhe namadoda amabili ayemi naye. ₃₃Kuthe esehlukene naye, uPhethro wathi kuJesu: “Nkosi, kuhle ukuba sibe lapha; masakhe amadokodo amathathu, elinye kube ngelakho, elinye kube ngelikaMose, elinye kube ngelika-Eliya.”

Wayengazi ukuthi uthini.

₃₄Esakhuluma lokhu, kwafika ifu, labasibekela; besaba lapho ifu libamboza. ₃₅Kwezwakala izwi efini, lithi: “Lo uyiNdodana yami ekhethiweyo; yizweni.”

₃₆Kuthe selizwakele izwi, uJesu wabonakala esesele yedwa. Bathula du, abangatshela muntu lokho ababekubonile ngaleyo mihla.

₃₇Kwathi ngosuku olulandelayo, sebehlile entabeni, isixuku esikhulu samhlangabeza. ₃₈Indoda eyayisesixukwini yamemeza yathi: “Mfundisi, ngiyakunxusa ukuba uzongibonela indodana yami, okungukuphela kwayo. ₃₉Umoya uyayidumela, idazuluke masinyane, uyithele phansi, ikhihlize amagwebu, kuthi uqambe uhamba, ibe isiyimvithi nje. ₄₀Ngibanxusile abafundi bakho ukuba bawukhiphe, kepha behluleka.”

₄₁UJesu waphendula wathi: “Hhawu, sizukulwane esingakholwayo nesonakeleyo, kuyoze kube nini nginani, nginibekezelela na? Yilethe lapha indodana yakho.”

₄₂Kuthe iseza, idimoni layiqumba phansi, layihlukumeza kakhulu; uJesu wawukhuza umoya ongcolileyo, umfana waphiliswa, wayesembuyisela kuyise. ₄₃Bamangala bonke ngamandla amakhulu kaNkulunkulu.

Kuthe besamangele bonke ngakho konke akwenzileyo, wathi kubafundi bakhe: ₄₄“Vulani izindlebe zenu nilalele lawa mazwi, ngokuba iNdodana yomuntu izakukhashelwa ezandleni zabantu.”

₄₅Kabaqondanga ukuthi isho ukuthini inkulumo yakhe, ngokuba yayifihliwe kubo, funa bayiqonde, futhi besaba ukumbuza ngayo.

₄₆Kwaqubuka impikiswano phakathi kwabo yokuthi ngubani ongomkhulu kubo. ₄₇UJesu eyazi impikiswano esenhliziyweni yabo, wathatha umntwana, wammisa eduze kwakhe, ₄₈wathi kubo: “Yilowo nalowo oyakwamukela lo mntwana egameni lami, wamukela Mina; ongamukelayo Mina, uyamamukela nongithumileyo, ngokuba omncinyane kini nonke nguye omkhulu.”

₄₉UJohane waphendula wathi: “Nkosi, sibone umuntu ekhipha amadimoni ngegama lakho, samnqabela, ngokuba engahambisani nathi.”

₅₀Kepha uJesu wathi kuye: “Ningamnqabeli, ngokuba ongamelene nani, ungakini.”

₅₁Kwathi sekusondele izinsuku zokuba enyuselwe ezulwini, wanquma ukuya eJerusalema. ₅₂Wathumela izithunywa, zamendulela; zahamba, zangena emzini wamaSamariya ukuba zimlungiselele. ₅₃Kepha awamemukelanga, ngokuba wayelibangise eJerusalema. ₅₄Abafundi bakhe, oJakobe noJohane, bekubona lokho, bathi: “Nkosi, uyathanda yini ukuba sibize umlilo wehle ezulwini, uwabhubhise na?”

₅₅Kepha waphenduka, wabathethisa, wathi: “Anazi ukuthi ningabamuphi umoya. ₅₆Ngokuba iNdodana yomuntu ayizanga ukuzobhubhisa imiphefumulo yabantu, kodwa ukuzoyisindisa;” base bedlulela komunye wemizana.

₅₇Kuthe besahamba endleleni, othile wathi kuye: “Ngizakukulandela, noma kuphi lapho uya khona.”

₅₈UJesu wayesethi kuye: “Izimpungushe zinemigodi, nezinyoni zezulu zinezidleke, kepha iNdodana yomuntu kayinandawo lapho ingacamelisa khona ikhanda.”

₅₉Wayesethi komunye: “Ngilandele.”

Kepha yena wathi: “Ngivumele ngiyongcwaba ubaba kuqala.”

₆₀Kepha wathi kuye: “Yekela abafileyo bambele abafileyo babo, kodwa wena hamba, ushumayele ngombuso kaNkulunkulu.”

₆₁Omunye futhi wathi: “Nkosi, ngizakukulandela, kodwa ngivumele ngiyovalelisa kuqala kwabasekhaya.”

₆₂Kepha uJesu wathi kuye: “Akekho othi esebeke isandla sakhe egejeni, aphinde abheke emuva, owufanele umbuso kaNkulunkulu.”