ILevithikhusi 25

₁USimakade wakhuluma kuMose entabeni iSinayi, wathi: ₂“Yisho kubantu bakwa-Israyeli, uthi kubo: ‘Lapho senifikile ezweni engininika lona, izwe liyogcina isabatha kuSimakade. ₃Uyakulima insimu yakho iminyaka eyisithupha, iminyaka eyisithupha uthene isivini sakho, ubuthe izithelo zaso, ₄kodwa ngonyaka wesikhombisa kuyakuba khona isabatha lokuphumula kwezwe, isabatha kuSimakade. Awuyukulima insimu yakho, futhi awuyukusithena nesivini sakho. ₅Amakhikhizela esivuno sakho awuyukuwavuna, nezithelo zomvini wakho ongatheniwe awuyukuzikha; kuyakuba ngunyaka wokuphumula kwezwe. ₆Okuyozimilela ngonyaka wesabatha kuyoba ngukudla kwenu: okwakho nenceku yakho, nencekukazi yakho, nesisebenzi sakho, nomfokazi ogogobele kwakho, ₇ngisho nemfuyo yakho nezilwane zasendle, konke okuzimilele ezweni kuyakuba ngukudla kwenu.

₈“ ‘Uyozibalela amasabatha ayisikhombisa eminyaka, iminyaka eyisikhombisa iphindwe kasikhombisa, izinsuku eziyisikhombisa zamasabatha ayisikhombisa ngonyaka, okwenza iminyaka engama-49. ₉Uyoshaya icilongo limpompoloze kuzwakale kulo lonke izwe lakini, ngosuku lweshumi lwenyanga yesikhombisa, okuwusuku lokubuyisana. ₁₀Unyaka wama-50 niyakuwungcwelisa, nimemezele ukukhululeka kwazo zonke izakhamuzi. Kuyakuba ngunyaka wejubhili kini, niyakubuyela, kube yilowo nalowo efeni lakhe, yilowo nalowo abuyele emndenini wakubo. ₁₁Unyaka wama-50 uyoba yijubhili kini; aniyukulima, aniyukuwavuna amakhikhizela awo, aniyukuzikha izithelo zomvini ongatheniwe. ₁₂Uyijubhili, ngakho-ke uyakuba ngcwele kini, niyodla okuvela emasimini.

₁₃“ ‘Ngonyaka wejubhili, yilowo nalowo uyobuyela efeni lakhe.

₁₄“ ‘Lapho uthengisela owezwe lakini okuthile noma ukuthenga kuye, aniyukuqolana; ₁₅niyakuthengiselana nomakhelwane wakho kuye ngenani leminyaka emva kwejubhili nangenani leminyaka yomkhiqizo. ₁₆Uyakuyikhuphula intengo kuye ngobuningi beminyaka, kodwa uma iminyaka imincane, uyakuyinciphisa intengo, ngokuba yinani leminyaka yesivuno enithengiselana ngayo. ₁₇Ningaqolani, kepha uyomesaba uNkulunkulu wakho, ngokuba nginguSimakade uNkulunkulu wakho.

₁₈“ ‘Niyogcina zonke izimiso zami, nezehlulelo zami nizenze, ukuze nihlale nivikelekile ezweni. ₁₉Izwe liyakuthela izithelo zalo ngobuningi bazo, nidle nisuthe, nihlale kulo nivikelekile. ₂₀Uma nithi: “Siyakudlani ngonyaka wesikhombisa na? Bheka, asiyukulima, asiyukuvuna kudla;” ₂₁khona ngiyakuyala isibusiso sami sehlele phezu kwenu ngonyaka wesithupha, ukuze uthele ukudla kweminyaka emithathu. ₂₂Niyolima ngonyaka wesishiyagalombili, nibe nisadla izithelo enizigcinile; kuze kufike unyaka wesishiyagalolunye, kungene izithelo zawo, niyakudla okugcinwe ezinqolobaneni.

₂₃“ ‘Izwe aniyukulithengisa kuze kube phakade, ngokuba izwe lingelami, nina-ke ningabafokazi abagogobeleyo nami. ₂₄Izwe lonke eliyifa lenu niyakuba nelungelo lokulihlenga.

₂₅“ ‘Uma umfowenu eba mpofu, bese ethengisa ngefa lakhe, kuyofika umhlengi oyisihlobo sakhe esisondele silihlenge ifa umfowabo athengise ngalo. ₂₆Uma umuntu engenaye umhlengi oyisihlobo sakhe, kodwa bese eba ngocebileyo, athole okwanele ukulihlenga, ₂₇ uyobala iminyaka selokhu alithengisa, bese kuthi okuseleyo akudlulisele kulowo muntu ayemthengisele lona, yena abuyele efeni lakhe. ₂₈Uma engawatholi amandla okulibuyisela kuye, lelo ayelithengisile liyakusala esandleni sowalithengayo, kuze kufike unyaka wejubhili. Liyokhululeka ngejubhili, bese ebuyela efeni lakhe.

₂₉“ ‘Uma umuntu ethengisa ngendlu yokuhlala emzini onogange, angayihlenga uma unyaka ungakapheli ithengisiwe, ngokuba unyaka wonke uyakuba nalo ilungelo lokuyihlenga. ₃₀Uma engayihlenganga kwaze kwaphela unyaka, leyo ndlu esemzini onogange isiyohlala ingeyalowo oyithengileyo kuze kube phakade ezizukulwaneni zakhe. Ayiyukubuyiselwa koyithengisileyo ngejubhili. ₃₁Kepha izindlu zemizana engenalo ugange macala wonke ziyakubalwa namasimu; zinokuhlengwa, zibuyiselwe kubaninizo ngejubhili.

₃₂“ ‘Kepha imizi yabaLevi, izindlu zemizi eyifa labo, abaLevi bayoba nelungelo lokuzihlenga noma nini izindlu ezisemizini eyifa labo. ₃₃Uma umLevi engeke akwazi ukuyihlenga indlu eyayithengisiwe, izindlu okwathengiselwana ngazo emizini eyifa labo, ziyobuyiselwa kuye ngejubhili, ngokuba izindlu zemizi yabaLevi ziyifa labo phakathi kwabantu bakwa-Israyeli. ₃₄Amasimu namadlelo omuzi wabo akunakuthengiswa, ngokuba kuyifa labo, kuze kube phakade.

₃₅“ ‘Uma umfowenu eba mpofu, bese encika kuwe, uyakumsekela, ahlale nawe njengomfokazi nogogobele kwakho. ₃₆Awuyukuthatha kuye inzalo nenzuzo, kodwa uyomesaba uNkulunkulu wakho, ukuze umfowenu ahlale nawe. ₃₇Awuyukumboleka imali ukuze uthole inzalo, awuyukumnika ukudla kwakho bese umfuna inzuzo. ₃₈NginguSimakade uNkulunkulu wenu, owanikhipha eGibhithe ukuninika iKhanani, ukuze ngibe nguNkulunkulu wenu.

₃₉“ ‘Uma umfowenu eba mpofu ehlala nawe, azithengise kuwe, awuyukumsebenzisa njengesigqila. ₄₀Kepha uyokuba njengesisebenzi nogogobele kwakho; uyokusebenzela kuze kufike unyaka wejubhili, ₄₁bese eyasuka angabe esahlala nawe. Uyobuyela nabantwana bakhe emndenini wakubo nasefeni lokhokho bakhe. ₄₂Bayizinceku zami engazikhipha eGibhithe, akuyukuthengiswa ngabo babe yizigqila. ₄₃Awuyukumphatha ngesihluku, kodwa uyomesaba uNkulunkulu wakho.

₄₄“ ‘Izigqila zakho zesilisa nezesifazane oyokuba nazo, uyakuzithenga kwabezizwe abanizungezileyo. ₄₅Uyakuzithenga emadodaneni abafokazi abagogobele phakathi kwenu. Nalezi zingane ezizalelwe ezweni lakini ziyoba yifa lenu, niyozithenga kwabomndeni wakubo. ₄₆Niyakuzishiyela amadodana enu zibe yifa lawo kuze kube phakade. Kepha makungabi bikho muntu oyophatha ngesihluku umfowabo kubantu bakwa-Israyeli.

₄₇“ ‘Uma umfokazi ogogobele kwakho eba nengcebo, omunye kubafowenu abe mpofu, bese ezithengisa kumfokazi noma kwenye ingxenye yomndeni wabafokazi, ₄₈uma esezithengisile unelungelo lokuhlengwa. Omunye wabafowabo angamhlenga; ₄₉kungaba nguyisekazi noma indodana kayisekazi engamhlenga, noma omunye oyisihlobo sakhe segazi angamhlenga, kodwa uma eba ngocebileyo angazihlenga yena. ₅₀Uyokhuluma nalowo omthengileyo babalelane inani leminyaka esasele kuze kufike unyaka wejubhili. Intengo okumele ayikhokhe iyoba ngangenani leminyaka; isikhathi abe naso phansi komthengi wakhe siyolingana neminyaka yokuqashwa kwakhe. ₅₁Uma kusasele iminyaka eminingi, uyakukhokha komthengileyo imali elingana naleyo athengwa ngayo. ₅₂Uma sekusele iminyaka emincane kufike unyaka wejubhili, uyobalisana naye imali njengeminyaka yakhe yokuhlengwa. ₅₃Njengesisebenzi esiqashwa iminyaka ngeminyaka, uyakuba ngaphansi kwesandla sakhe, kodwa akayukumphatha ngesihluku emehlweni akho.

₅₄“ ‘Uma engahlengwanga ngalezi zindlela, ngonyaka wejubhili uyokhululeka nabantwana bakhe. ₅₅Abantu bakwa-Israyeli bayizinceku, izinceku zami engazikhipha eGibhithe; nginguSimakade uNkulunkulu wenu.