ILevithikhusi 22

₁USimakade wakhuluma kuMose, wathi: ₂“Khuluma ku-Aroni namadodana akhe ukuba bahlukane nezinto ezingcwele zabantu bakwa-Israyeli, abazehlukanisela Mina njengezingcwele, ukuze bangalihlambalazi igama lami elingcwele; nginguSimakade.

₃“Yisho kubo uthi: ‘Yilowo nalowo, ozalweni lwenu lonke nakuzo zonke izizukulwane zenu, oyosondela ezintweni ezingcwele abantu bakwa-Israyeli abazehlukanisile njengezingcwele kuSimakade, ebe engcolile, lowo muntu uyonqunywa phambi kwami; nginguSimakade.

₄“ ‘Yilowo nalowo wozalo luka-Aroni onochoko noma omfimfayo akayukuzidla izinto ezingcwele aze ahlambuluke, nalowo othinta okungcoliswe yisidumbu, noma ngumuntu oshaywe yizibuko, ₅nalowo oyothinta okunwabuzelayo okungamngcolisa, noma yimuphi omunye umuntu ongamngcolisa, noma ngabe unakungcola kwaluhlobo luni. ₆Umuntu oyothinta okunjalo uyokuba ngongcolileyo kuze kuhlwe, angazidli izinto ezingcwele, aze ageze umzimba wakhe ngamanzi. ₇Uma selishonile ilanga uyoba ngohlambulukileyo, bese edla izinto ezingcwele, ngoba zingukudla kwakhe. ₈Akayukuyidla ingcuba nesilwane esidweshulwe yizilwane zasendle, ukuze angazingcolisi ngakho; nginguSimakade.

₉“ ‘Ngakho-ke bayogcina umyalo wami; ukuze bangabi nesono ngenxa yawo, bese befa ngokuba bewujivazile; nginguSimakade obangcwelisayo.

₁₀“ ‘Akukho mfokazi oyakudla okungcwele; ngisho umuntu ogogobele womphristi noma umqashwa, akayukukudla okungcwele. ₁₁Kepha uma umphristi ethenga umuntu, lowo amthenge ngemali yakhe uyokukudla, nalabo abazalelwe kwakhe bayosidla isinkwa sakhe. ₁₂Uma indodakazi yomphristi igana umfokazi, ayinakudla emnikelweni wezinto ezingcwele. ₁₃Kodwa uma indodakazi yomphristi ingumfelokazi noma ilahlwe yindoda, ingenamntwana, bese ibuyela endlini kayise njengasebusheni bayo, iyakusidla isinkwa sikayise, kepha umfokazi akayukusidla.

₁₄“ ‘Uma umuntu edle okungcwele ngephutha, uyothasisela ngokwesihlanu kwakho okungcwele, akunike umphristi. ₁₅Abayukuhlambalaza izinto ezingcwele abanikela ngazo kuSimakade abantu bakwa-Israyeli, ₁₆bazenze babe necala lokudla izinto ezingcwele; nginguSimakade obangcwelisayo.’ ”

₁₇USimakade wakhuluma kuMose, wathi: ₁₈“Yisho ku-Aroni namadodana akhe, nabo bonke abantu bakwa-Israyeli, uthi kubo: ‘Yilowo nalowo wendlu yakwa-Israyeli noma ongumfokazi kwa-Israyeli, onikela ngomnikelo wakhe ngenxa yesifungo nanoma yisiphi, noma umnikelo wakhe wesihle, uyowunikela kuSimakade, ube ngumnikelo wokushiswa. ₁₉Ukuze amukeleke, uyonikela ngeduna lenkomo elingenasici noma lemvu noma lembuzi. ₂₀Aniyukunikela nganoma ngani enesici, ngokuba aniyukwemukeleka. ₂₁Umuntu onikela ngomnikelo womhlatshelo wokuthula kuSimakade ukufeza isithembiso noma owomnikelo wesihle ezinkomeni noma ezimvini, ukuze emukeleke, kuyoba ngengenasici. ₂₂Aniyukunikela ngephuphuthekayo, eyaphukile, elimele, enesilonda, enokhwekhwe nenomuna, futhi aniyukunikela ngazo kuSimakade, zibe ngumnikelo womlilo e-althare lakhe. ₂₃Inkunzi noma imvu enesitho eside kunezinye noma enesitho esincane, ninganikela ngayo ibe ngumnikelo wesihle, kodwa uma kungowesifungo awuyukwamukeleka. ₂₄Aniyukunikela kuSimakade ngethenwe ngokufihlizwa noma ngokuchotshozwa noma ngokudwengulwa noma ngokuhhumpulwa; aniyukwenza kanjalo ezweni lakini. ₂₅Aniyukwemukela lutho esandleni sowezizwe, bese ninikela ngakho kube yisinkwa sikaNkulunkulu wenu, ngokuba kunikelwe kunokungcola kukho, ngakho-ke akuyukwemukeleka.’ ”

₂₆USimakade wakhuluma kuMose, wathi: ₂₇“Uma kuzalwa inkunzi noma inqama noma impongo, iyohlala nonina izinsuku eziyisikhombisa; ngosuku lwesishiyagalombili kuqhubeka iyokwemukeleka ukuba ibe ngumnikelo womlilo kuSimakade. ₂₈Aniyukuyinquma inkabi noma imvu nezinyane layo ngalusuku lunye.

₂₉“Niyohlabela uSimakade umhlatshelo wokubonga; niyakumhlabela ukuze namukeleke. ₃₀Uyakudliwa ngalolo lusuku, aniyukushiya lutho lwawo kuze kube sekuseni; nginguSimakade.

₃₁“Ngakho-ke niyoyigcina imiyalo yami, niyenze; nginguSimakade. ₃₂Aniyukulihlambalaza igama lami elingcwele; ngiyakuzibonakalisa ngingcwele phakathi kwabantu bakwa-Israyeli; nginguSimakade oningcwelisayo, ₃₃owanikhipha eGibhithe, ukuze ngibe nguNkulunkulu wenu; nginguSimakade.”